ءىشى كەڭ, تەرەزەلەرىنەن جارىق توگىلگەن عيماراتتا قاريالار ءۇشىن بارلىق جاعداي جاسالعان. دەمالاتىن جۇمساق جيھازدار, تەلەديدار, شاحمات, دويبى وينايتىن, گازەت-جۋرنالدار وقيتىن ۇستەلدەر قويىلعان. قابىرعالارىنا ءۇش ءبيدىڭ سۋرەتى, ارداگەرلەر ۇيىمىنىڭ جۇمىسىنان فوتوسۋرەتتەر ىلىنگەن. ءبىر جاق شەتىندە اۋداندىق ارداگەرلەر كەڭەسى توراعاسىنىڭ بولمەسى دە بار.
سالتاناتتى شارادا اۋدان اكىمى بيبوز شاياحمەتوۆ سويلەپ: «بۇل جەر – اعالارىمىزدىڭ ءوزارا ارالاسىپ وتىرۋىنا قولايلى ورتا. بۇعان دەيىن دە ارداگەرلەر بولمەسىن اۋداندىق مەشىتتە اشقانبىز. الداعى ۋاقىتتا وسى ارداگەرلەر ۇيىندە باس قوسقان جيىندارىڭىز ەلىمىزدىڭ بولاشاعىنا, جاس ۇرپاقتىڭ تاربيەسىنە ۇلكەن سەپتىگىن تيگىزەدى دەگەن سەنىمدەمىن», دەپ جۇمىسىنا ساتتىلىك تىلەدى.
اۋداندىق ارداگەرلەر كەڭەسىنىڭ توراعاسى ورىنعالي قۇمارعاليەۆ: «مۇنداي كەڭ ارداگەرلەر ءۇيى وبلىسىمىزدا ءبىرىنشى رەت ءبىزدىڭ اۋداندا اشىلىپ وتىر», دەپ جينالعاندارعا اق تىلەگىن ارنادى. اۋدان باسشىسى باستاعان ارداگەرلەر عيمارات الدىنا جاس تالدار وتىرعىزدى. قاتىسۋشىلار ارداگەرلەردىڭ ەكسپو-2017 حالىقارالىق مامانداندىرىلعان كورمەسىن ارالاعانى تۇسىرىلگەن بەينەباياندى تاماشالادى.
قانات عۇماروۆ
اتىراۋ وبلىسى,
قۇرمانعازى اۋدانى
