كۋاگەرلەر تۇسىرگەن سۋرەت, tengrinews.kz
ۆەدومستۆو وكىلدەرىنىڭ مالىمەتىنشە, 3 قازاندا كەشكى ۋاقىتتا الماتىدان شىمكەنتكە دارىگەرلەر بريگاداسى اۋىر جاعدايدا جاتقان جۇكتى ايەلگە كومەكتەسۋ ءۇشىن اتتانعان.
«الماتىدان سانيتارلىق اۆياتسيا بريگاداسى ساعات 18.39-دا ۇشىپ شىققان. بورتتا اكۋشەريا, گينەكولوگيا جانە پەريناتالوگيا عىلىمي ورتالىعىنىڭ پروفەسسورى, دارىگەر اكۋشەر-گينەكولوگ پاتساەۆ تالعات اناپي ۇلى مەن كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ رەانيماتولوگ دارىگەرى ارتىقباەۆ جانىبەك تۇكەن ۇلى بولعان», - دەلىنگەن حابارلامادا.
بورتتا ناۋقاستىڭ بولماعانى ايتىلادى. رەسپۋبليكالىق سانيتارلىق اۆياتسيا ورتالىعى مەن East Wing اۋەكومپانياسىنىڭ كەلىسىمشارتى بويىنشا ان-28 ۇشاعىمەن جولعا شىققان. بورتپەن بايلانىس ۇزىلگەن. الماتى تۇبىندە تابىلعان ۇشاقتان 5 ادامنىڭ ءمايىتى تابىلعان.
«قر دەنساۋلىق ساقتاۋ مينيسترلىگى قىزمەتتىك مىندەتىن اتقارۋ كەزىندە قازا تاپقان مەديتسينا قىزمەتكەرلەرىنىڭ وتباسىنا كوڭىل ايتادى جانە مورالدىق ءارى ماتەريالدىق كومەك كورسەتەدى», - دەدى ءباسپاسوز قىزمەتىندەگىلەر.
قازا تاپقان قالعان ۇشەۋى, ازاماتتىق اۆياتسيا كوميتەتى وكىلدەرىنىڭ حابارى بويىنشا, ەكيپاجدىڭ مۇشەلەرى بولعان. ولار – قىرعىزستان ازاماتى, اۋە كەمەسىنىڭ كومانديرى گ.ن.تسوي مەن قازاقستاندىق ە.كۋتافين.
كەشە East Wing اۋەكومپانياسىنىڭ ان-28 ۇشاعى ۇشىپ شىققاننان كەيىن 12 مينۋت وتكەندە راداردان جوعالىپ كەتكەن ەدى. كەيىن ۇشاق الماتى تۇبىندە ورتەنىپ جاتقان جەرىنەن تابىلعان. بورتتا بولعان بەس ادام تۇگەل قازا تاپقان. اۋە كەمەسى پولشادا 1990 جىلى شىعارىلعان.
