بيىلعى بايقاۋعا ءوز ەلىمىزدەن, رەسەي, وزبەكستان, موڭعوليا, ارمەنيا جانە بولگاريادان جيىلعان 40 شاقتى جاس ءانشى قاتىسپاق. قىركۇيەكتىڭ 5-ءى مەن 10-ى ارالىعىندا وتەتىن بۇل كونكۋرستىڭ نەگىزگى ەرەكشەلىگى – الدىڭعى بايقاۋلاردا جەڭىسكە جەتكەن انشىلەردىڭ قازىلىق ەتۋى. اتاپ ايتقاندا, كسرو حالىق ءارتىسى جانە مەملەكەتتىك سىيلىقتىڭ لاۋرەاتى بيبىگۇل تولەگەنوۆا توراعالىق ەتەتىن قازىلار القاسىنىڭ قۇرامىندا «استانا وپەرا» وپەرا جانە بالەت تەاترىنىڭ جەتەكشى سوليستەرى, قازاقستاننىڭ ەڭبەك سىڭىرگەن قايراتكەرلەرى تالعات مۇساباەۆ, سۇندەت بايعوجين, دينا حامزينا جانە باشقۇرتستان رەسپۋبليكاسىنىڭ ەڭبەك سىڭىرگەن ءارتيسى الفيا كاريموۆا مەن وزبەكستاننىڭ حالىق ءارتىسى راميز ۋسمانوۆ بار.
ءباسپاسوز ءماسليحاتىندا بيبىگۇل تولەگەنوۆا وسىناۋ ونەر بايگەسىنىڭ تاريحى تۋرالى اڭگىمەلەي كەلە, ونىڭ نەگىزىن قالاعان ءوز قىزى ماريامگۇل تولەگەنوۆا ەكەنىن ايتتى. ەگەر ول ءتىرى بولعانىندا بيىل 65 جاسقا تولادى ەكەن. سوندىقتان ءدال وسى جولى وتكىزىلەتىن بايقاۋ ماريامگۇلدى ەسكە الۋعا ارنالاتىنىن مالىمدەدى. سونداي-اق, دارىندى جاستار جۇلدە الىپ جاتاتىن بۇل شارانىڭ ولاردىڭ شىعارماشىلىق ومىرىندەگى ەلەۋلى ءبىر بەلەس ەكەنىن دە جەتكىزدى. ء«بىزدىڭ بايقاۋدا توپ جارعان جاستاردىڭ كوپشىلىگى قازىر جەر ءجۇزىن ارالاپ, ونەر كورسەتىپ ءجۇر. قازىرگى كەزدە ونەرىڭدى تانىتۋدىڭ جولى كوپ. ءبىزدىڭ جاس كەزىمىزدە مۇنداي مۇمكىندىكتەر جوقتىڭ قاسى ەدى», دەدى بۇلبۇل ءانشى. ول سونداي-اق, جۇلدە قورىنىڭ دا قوماقتى ەكەنىن, باس جۇلدەگە 10 مىڭ دوللار كولەمىندە قارجىلاي سىياقى بەرىلەتىنىن العا تارتتى.
بايقاۋ بارىسىندا جاس ورىنداۋشىلار كلاسسيكالىق اندەردى دە, حالىق اندەرىن دە ورىندايتىن بولادى. بۇل جاعىنان العاندا بايقاۋ قازاق مۋزىكاسىنىڭ تاڭداۋلى ۇلگىلەرىن ورىنداۋ مادەنيەتىن جاڭعىرتۋعا دا قىزمەت ەتپەك. سىناق ىرىكتەۋ جانە اقتىق كەزەڭدەردەن تۇرىپ, بارلىق تىڭداۋلار قارۋلى كۇشتەردىڭ ۇلتتىق اسكەري-پاتريوتتىق ورتالىعىندا, كوپشىلىك الدىندا وتپەك. جۇزدەن جۇيرىك جەڭىمپازدار 10 قىركۇيەكتە «قازاقستان» ورتالىق كونتسەرت زالىندا ماراپاتتالادى.
ايگۇل سەيىل,
«ەگەمەن قازاقستان»
