قازىرگى تاڭدا قازاق كۇرەسىنەن قازاقستان ۇلتتىق قۇراماسى ەلوردادا سوڭعى وقۋ-جاتتىعۋ جيىنىن وتكىزۋدە. جيىن قورىتىندىسى بويىنشا «الەم بارىسىندا» ەل نامىسىن قورعايتىن بالۋانداردىڭ ەسىمى بەلگىلى بولماق. جاتتىعۋ جيىنىندا «قازاقستان بارىسى» ءتۋرنيرىنىڭ جەڭىمپازدارى مەن قاتىسۋشىلارى ايبەك نۇعىماروۆ, مۇحيت تۇرسىنوۆ, ايبات سەيتەن, ءادىلجان ىستىباەۆ جانە تاعى باسقا ەسىمدەرى بەلگىلى بالۋاندار بار. ۇلتتىق قۇرامانىڭ بالۋاندارى بيىل جاڭادان تاعايىندالعان باس جاتتىقتىرۋشى ەرلان ەستەكتىڭ قاراماعىندا جاتتىعۋدا. ال بۇعان دەيىنگى تۋرنيرلەرگە بالۋانداردى جەڭىس بيتكوزوۆ جاتتىقتىرعان بولاتىن. ايتا كەتەيىك, ەرلان ەستەكتىڭ ءوزى كەزىندە ۇلتتىق قۇراما ساپىندا «قازاقستان بارىسى», «ەۋرازيا بارىسى» سىندى ءىرى دودالاردا بەلدەسكەن بالۋان.
بالۋانداردىڭ جاتتىعۋىنا قاتىسىپ, باس باپكەر جانە سپورتشىلارمەن از-كەم تىلدەسۋدىڭ ءساتى ءتۇستى. باس جاتتىقتىرۋشىنىڭ ايتۋىنشا, ۇلتتىق قۇراماداعى العاشقى وقۋ-جاتتىعۋ جيىنى جوعارى دەڭگەيدە ءوتىپ جاتىر ەكەن. بالۋانداردىڭ جاتتىعۋىنا ازداپ وزگەرىس ەنگىزىلگەن. «الداعى «الەم بارىسى» تۋرنيرىنە 22 تامىزدان باستاپ كۇنىنە ەكى مەزگىل جاتتىعۋ جاساپ جاتىرمىز. قۇراماعا كەلگەنىمە ەكى اي بولدى. بالۋاندار قازىر بۇرىنعى باپكەرلەرىمىزدىڭ ءادىسى بويىنشا دايىندالۋدا. دەگەنمەن, ءوزىم دە ءبىر-ەكى جاڭا ءادىس قوستىم», دەيدى باس باپكەر.
«الەم بارىسىنا» قاتىساتىن بالۋانداردىڭ ءتىزىمى ناقتى شىقپاعانىمەن, ەرلان ەستەك 2013 جىلى «قازاقستان بارىسى» اتانعان ايبەك نۇعىماروۆ ناعىز بابىندا ەكەنىن ايتتى, جاتتىعۋ كەزىندە جاراقات الىپ قالماسا, الداعى ءدۇبىرلى دودادا ەل نامىسىن قورعايدى دەپ وتىر. «قازىرگى ۋاقىتتا ايبەكتىڭ بابى كەلىسىپ تۇر. جاتتىعۋدا ءوزىن ءالى دە تىڭ ەكەنىن, باسەكەگە دايىن ەكەنىن دالەلدەۋدە. ال تاعى ءبىر ءۇمىت ارتىپ وتىرعان بالۋانىمىز مۇحيت تۇرسىنوۆتىڭ بابى ونشا كەلىسپەي تۇر. ويتكەنى, ول «قازاقستان بارىسىنان» كەيىن بەلىن جاراقاتتاپ العان بولاتىن. دەگەنمەن, ءالى الدا ۋاقىت بار. «الەم بارىسىنا» دەيىن مۇحيت بابىنا تولىق ەنىپ قالار», دەدى ول.
مۇحيت تۇرسىنوۆتىڭ ءوزى بولسا, قىركۇيەك ايىندا وتەتىن دوداعا تولىقتاي دايىن ەكەنىن, ەل ابىرويىن اسقاقتاتۋعا بار كۇشىن سالاتىنىن جەتكىزدى. «كۇنىنە جاتپاي-تۇرماي ەكى مەزگىل جاتتىعامىز. ەگەر, باپكەرلەر قۇرامى مەنى تاڭداپ, ماعان «الەم بارىسىندا» بەلدەسەسىڭ دەسە, ەل نامىسىن قورعاۋعا ارقاشان دايىنمىن», دەيدى ول سەنىمدى تۇردە.
ال ايبەك نۇعىماروۆ بيىل جاڭا باس باپكەردىڭ قاراماعىنداعى جاتتىعۋدىڭ ەرەكشە وتۋدە ەكەنىن ايتادى. سونداي-اق, بيىلعى وقۋ-جاتتىعۋ جيىنىنا تۇڭعىش رەت 30-عا جۋىق بالۋاننىڭ قاتىسىپ جاتقانىن تىلگە تيەك ەتتى. «جاتتىعۋ كەزىندە بالۋانداردىڭ كوپ بولعانى وتە پايدالى. ءبىر سالماقتا ون بالۋان بولسا, ءبىر-بىرىمىزبەن كۇرەسىپ, ءتۇرلى جاتتىعۋلاردى جابىلا ىستەيمىز. ەرلان ەستەك جاس مامان بولعان سوڭ, جاتتىعۋى دا ەرەكشە. بۇيىرسا, بيىلعى «الەم بارىسىندا» توپ جارۋعا تولىق مۇمكىندىگىمىز بار», دەيدى 2013 جىلعى «قازاقستان بارىسىنىڭ» جەڭىمپازى.
ايتا كەتەيىك, بيىلعى «الەم بارىسى» ەكىنشى رەت ۇيىمداستىرىلادى. تۇڭعىش رەت تۋرنير 2014 جىلى پاۆلودار قالاسىندا وتكەن بولاتىن.
ءالي بيتورە,
«ەگەمەن قازاقستان»
