قىمباتتى وتانداستار!
قازاقستان حالقى اسسامبلەياسى سىزدەردى بارشا مۇسىلمان قاۋىمىنىڭ ەڭ ۇلىق مەرەكەسى – قۇربان ايتپەن قۇتتىقتايدى!
ەلباسى نۇرسۇلتان نازارباەۆتىڭ جارلىعىمەن بەكىتىلىپ, ومىرىمىزگە ەنگەن بۇل مەيرام ەلىمىزدىڭ مۇسىلماندارىن عانا ەمەس, قازاقستانداعى بارشا حالىقتى بىرىكتىرە ءتۇستى جانە جىل سايىن ىستىق ىقىلاسپەن اتاپ وتىلۋدە.
قۇربان ايت – رۋحاني تازالىق پەن جان ىزگىلىگىن, ادالدىق پەن تەرەڭ سەنىمدى ۇلىقتايتىن مەرەكە. ول – باعاسىن ەشقاشان جوعالتپايتىن قۇندىلىقتاردىڭ: پاراساتتىلىقتىڭ, جان دۇنيە پاكتىگىنىڭ, جومارتتىقتىڭ, بەيبىتشىلىك سۇيگىشتىكتىڭ, ادامدارعا دەگەن جاناشىرلىق پەن سۇيىسپەنشىلىكتىڭ نىشانى.
حالقىمىزدىڭ اۋىزبىرشىلىگىن نىعايتۋعا, مادەني ءھام رۋحاني قۇندىلىقتارىمىزدى دامىتۋعا ەلىمىزدەگى ءتۇرلى ءدىن وكىلدەرىنىڭ تاتۋلىعى سەپتىگىن تيگىزۋدە.
قازاقستان حالقى اسسامبلەياسى ەل ازاماتتارىن ايت كۇندەرى مۇقتاج جاندارعا قايىرىمدىلىق جاساپ, جاقىندارىنا قامقورلىق تانىتۋعا شاقىرادى.
ۇلىق ايت كۇنگى جاساعان نيەت-امالدارىڭىز قابىل بولىپ, شاڭىراقتارىڭىز نۇرعا تولسىن!
ەلىمىزدە ءاردايىم بەيبىتشىلىك, بىرلىك پەن كەلىسىم سالتانات قۇرسىن! مەيرام قۋانىش پەن بەرەكەسىن اكەلسىن!
ايت مۇباراك بولسىن!
قازاقستان حالقى اسسامبلەياسىنىڭ كەڭەسى
