2017-2018 وقۋ جىلىندا وڭىردە 381 مەملەكەتتىك كۇندىزگى جالپى ءبىلىم بەرەتىن مەكتەپتە 94 مىڭنان استام وقۋشى ءبىلىم الادى دەپ كۇتىلۋدە. وڭىردەگى مەكتەپ سانى بىلتىرعى وقۋ جىلىمەن سالىستىرعاندا 3 بىرلىككە ازايعان. قازتالوۆ اۋدانىندا حايرۋش جانە سارالجىن باستاۋىش مەكتەپتەرى, تەرەكتى اۋدانىنداعى قاندىق باستاۋىش مەكتەبى وقۋشى سانى ازايۋىنا بايلانىستى جابىلدى. وقۋشى سانى تۇراقتى كوبەيىپ, دارەجەسى جوعارىلاپ جاتقان ءبىلىم وردالارى دا بار. مىسالى, اقجايىق اۋدانى اتامەكەن اۋىلىنداعى م.وتەمىسوۆ اتىنداعى نەگىزگى مەكتەپ ورتا مەكتەپكە اينالدى. ەندى بۇل مەكتەپكە جاڭا عيمارات كەرەك. جارتى عاسىر بۇرىن سالىنعان كونە مەكتەپ عيماراتىنىڭ جاعدايى سىن كوتەرمەيدى.
ءدال قازىر وبلىستا 9 ءبىلىم نىسانىنىڭ قۇرىلىسى ءجۇرىپ جاتىر. ماسەلەن, ورال قالاسىنىڭ دەركول كەنتىندە ارقايسىسى 600 ورىندىق 2 مەكتەپ, قاشاعان كەنتىندەگى سارىتاۋ شاعىن اۋدانىندا 900 ورىندىق مەكتەپ ۇلتتىق قور ەسەبىنەن جاڭادان سالىنسا, ورال قالاسىندا №4 مەكتەپتىڭ اپاتتى جاعدايداعى عيماراتى دا قايتا كوتەرىلىپ جاتىر. بۇل قۇرىلىستىڭ ءبارى دە بيىلعى قاراشا-جەلتوقسان ايلارىندا پايدالانۋعا بەرىلمەك. سونداي-اق, رەسپۋبليكالىق بيۋدجەت ەسەبىنەن زەلەنوۆ اۋدانى داريان اۋىلىندا 100 ورىندىق ينتەرناتىمەن 300 ورىنعا ارنالعان مەكتەپ عيماراتى سالىنىپ جاتىر. جەرگىلىكتى بيۋدجەت ەسەبىنەن قازتالوۆ اۋىلىنداعى 100 ورىندىق مەكتەپ جانىنداعى ينتەرنات پەن ءبورلى اۋدانىنىڭ كەڭتۇبەك اۋىلىنداعى 50 ورىندىق بالاباقشا عيماراتتارى تۇرعىزىلۋدا. ال ءبورلى اۋدانىنىڭ ارالتال اۋىلىنداعى 300 ورىندىق جانە اقجايىق اۋدانىنىڭ شاردارشاپ اۋىلىنداعى 198 ورىندىق مەكتەپتەر شەتەل ينۆەستيتسياسى ەسەبىنەن سالىنىپ جاتىر.
بۇعان قوسا, جەرگىلىكتى بيۋدجەت ەسەبىنەن 12 ءبىلىم بەرۋ نىسانىنا جالپى سوماسى 1241,0 ملن تەڭگەنى قۇرايتىن كۇردەلى جوندەۋ جۇمىستارى جۇرگىزىلۋدە, دەيدى زاۋرە بازارعاليقىزى. قازىرگى تاڭدا 5 ءبىلىم نىسانىندا كۇردەلى جوندەۋ جۇمىستارى اياقتالعان. ءبىلىم مەكەمەلەرىنىڭ 71%-ىندا جىلىتۋ جۇيەسىنىڭ الداعى قىس ماۋسىمىنا دايىندىعى تەكسەرىلىپ, بۇل جۇمىس ءارى قاراي جالعاسۋدا.
وڭىردە 2016 جىلدان باستاپ جاراتىلىستانۋ-ماتەماتيكا باعىتىنداعى پاندەر بويىنشا 563 پەداگوگ جەرگىلىكتى بيۋدجەت ەسەبىنەن اعىلشىن كۋرستارىندا ءبىلىمىن جەتىلدىرگەن. ەندى وسى پاندەردى اعىلشىن تىلىندە وقىتۋ ەكسپەريمەنتى جۇرگىزىلەتىن مەكتەپتەردىڭ ءتىزىمى انىقتالىپ, 13271 دانا اعىلشىن تىلىندەگى وقۋلىق پەن وقۋ-ادىستەمەلىك كەشەنگە تاپسىرىس بەرىلگەن.
– وبلىسقا قاجەتتى مەكتەپ وقۋلىقتارىن ساتىپ الۋ ءۇشىن جەرگىلىكتى بيۋدجەتتەن 2 334,9 ملن تەڭگە ءبولىندى. جاڭارتىلعان ءبىلىم مازمۇنىنا كوشۋگە بايلانىستى 2, 5, 7 سىنىپتاردىڭ بارلىق وقۋلىعى, مەكتەپالدى دايارلىق, ارناۋلى مەكتەپ وقۋلىقتارىنا, اعىلشىن تىلىندە جاراتىلىستانۋ باعىتىنداعى وقۋلىقتار جانە قوردى تولىقتىرۋ باعىتىندا بارلىعى 1 244 000-نان استام دانا وقۋلىق پەن وقۋ-ادىستەمەلىك كەشەندەرگە تاپسىرىس بەرىلدى. باسپالارمەن كەلىسىمشارتتار جاسالىپ, وقۋلىقتاردى تاسىمالداۋ باستالدى. قازىرگى تاڭدا وقۋلىقتاردىڭ 20 %-ى اۋداندار مەن قالاعا جەتكىزىلدى. وقۋلىقتاردى تاسىمالداۋ تامىز ايىنىڭ 30-ىنا دەيىن جۇرگىزىلەدى, – دەيدى ءبىلىم باسقارماسىنىڭ باسشىسى.
2016-2017 وقۋ جىلىندا وبلىستىڭ ءبىلىم بەرۋ مەكەمەلەرىندە 21 850 پەداگوگ, جالپى ءبىلىم بەرەتىن مەكتەپتەردە 11 971 مۇعالىم قىزمەت ەتكەن ەدى. وتكەن وقۋ جىلىنىڭ سوڭىندا 105 پەداگوگيكالىق قىزمەتكەر تاپشى بولعان. قازاق مەكتەبىندە ورىس ءتىلى مەن ادەبيەتى, ماتەماتيكا پاندەرىنىڭ مۇعالىمدەرى جەتىسپەيدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
