الماتى وبلىسىنىڭ ورتالىعىندا قالا كۇنى مەرەكەسى اتالىپ ءوتتى
بىرنەشە جىلدان بەرى ءوتكىزىلىپ كەلە جاتقان, وسىلايشا ءبۇگىندە يگى داستۇرگە اينالىپ كەتكەن اۋدان-قالالاردىڭ مادەنيەت كۇندەرىن تالدىقورعان قالاسىنىڭ جۇرتشىلىعى قورىتىندىلادى. ەل تاۋەلسىزدىگىنىڭ 20 جىلدىعى قۇرمەتىنە وتكىزىلگەن وسىناۋ سالتاناتقا قالاداعى بارشا ءبىلىم وشاقتارى مەن ونەر ۇجىمدارى, مەكەمەلەر مەن كاسىپورىن قىزمەتكەرلەرى, تالدىقورعان اسكەري گارنيزونىنىڭ جاۋىنگەرلەرى قاتىستى.
بۇل كۇنى تالدىقورعان جۇرتشىلىعى قوسارلانعان قۋانىشتىڭ كۋاسى بولدى. ناقتىراق ايتار بولساق, مەرەكەگە ورايلاسا حالىقارالىق ستاندارتقا ساي سالىنعان ۇلكەن تەننيس كورتى پايدالانۋعا بەرىلدى.
سالتاناتتى شارانى وبلىس اكىمى اڭسار مۇساحانوۆ اشىپ, جۇرتشىلىقتى جاڭا سپورت نىسانىنىڭ اشىلۋىمەن قۇتتىقتادى.
وبلىس باسشىسىنىڭ سوزىنەن كەيىن ەركىن كۇرەستەن اتلانتا وليمپياداسىنىڭ كۇمىس ءجۇلدەگەرى ماۋلەن مامىروۆ وبلىس اۋماعىندا سپورتقا ايرىقشا نازار اۋدارىلاتىندىعىن ايتىپ, وبلىس باسشىلىعىنا دەگەن ريزاشىلىعىن ءبىلدىردى.
تەننيس ورتالىعىنىڭ لەنتاسىن قيعاننان كەيىن اجەلەرىمىز قازاقتىڭ سالت-ءداستۇرى بويىنشا شاشۋ شاشتى. سودان كەيىنگى كەزەكتە كوپشىلىك ۇلكەن تەننيستەن ارنايى ۇيىمداستىرىلعان جارىستى تاماشالادى.
اۋماعى 13864 شارشى مەتردى الىپ جاتقان تەننيس ورتالىعىندا ءبىر مەزەتتە ون ەكى ادام تەننيس ويناي الادى, ال كورەرمەنگە ارنالعان ورىنعا ءۇش ءجۇز ادام سىيادى.
ورتالىق الاڭدا ۇيىمداستىرىلعان «تالدىقورعان كەشە جانە بۇگىن» تاقىرىبىنا ارنالعان كورمە دە مازمۇندىلىعىمەن كوز تارتادى. جەتىسۋدىڭ جاۋھار قالاسىنىڭ وتكەنى مەن بۇگىنگى جاعدايىنان مول ماعلۇمات بەرەتىن كورمەنى تۇرعىندار مەن قالا قوناقتارى قىزىعا تاماشالادى.
تالدىقورعاندا الدەنەشە ونداعان ۇلتتىڭ وكىلدەرى تاتۋ-ءتاتتى تىرلىك كەشۋدە. سوعان وراي بۇل كۇنى ورىس, ۇيعىر, نەمىس, گرەك, پولياك, قىتاي, كۇرد مادەني ورتالىقتارى ۇلتتىق تاعامدارى مەن قولونەر بۇيىمدارىنان كورمە جاساپ, ونەرلەرى مەن سالت-ءداستۇرلەرىنەن ءۇزىندى كورسەتتى.
اسكەري تەحنيكانىڭ كورمەسى دە كوپشىلىكتىڭ ەرەكشە نازارىن اۋداردى. بۇعان, اسىرەسە, بالدىرعاندار ءماز بولدى. وتان ءۇشىن قۇربان بولعان بوزداقتاردىڭ رۋحىنا ارناپ جاعىلعان «ءماڭگىلىك الاۋعا» گۇل شوقتارىن قويۋ, تال وتىرعىزۋ راسىمىنە دە ورىن بەرىلىپ, وبلىس اكىمى اڭسار تۇرسىنحان ۇلى ساياباققا ءوز قولىمەن كوكجەلەك وتىرعىزدى. ساياباقتىڭ اجارىن تالدىقورعان كوركەمسۋرەت مەكتەبى تۇلەكتەرىنىڭ شىعارماشىلىق ىزدەنىسىنەن تۋعان سۋرەت تۋىندىلارى اشا ءتۇستى.
مەرەكەنىڭ كوڭىلدى وتۋىنە قالا مەكتەپتەرى مەن بالالاردىڭ شىعارماشىلىق ورتالىقتارىنىڭ ۇجىمدارى دا وزىندىك ۇلەستەرىن قوستى. ورتالىق ساياباقتا وتكەن اسفالتتا سۋرەت سالۋ جارىسىندا ەل تاۋەلسىزدىگىنىڭ 20 جىلدىعى مەن قالا كۇنىنە ارنالعان بالالاردىڭ جۇرەكجاردى تىلەگى بوياۋ تىلىمەن ءورىلدى.
تالدىقورعان قالاسىنىڭ اكىمى ماحاببات بيگەلديەۆ بولسا قالانىڭ الەۋمەتتىك-ەكونوميكالىق دامۋىنا ەرەكشە ەڭبەگى سىڭگەن بىرنەشە تۇرعىنعا «تالدىقورعان قالاسىنىڭ قۇرمەتتى ازاماتى» توسبەلگىسىن تاپسىردى.
تالدىقورعان جۇرتشىلىعى مەن قوناقتارى وسى ستاديوندا حالقىمىزدىڭ وتكەن تاريحىنان سىر شەرتەتىن تەاترلاندىرىلعان قويىلىمدى تاماشالادى.
كۇمىسجان بايجان.
الماتى وبلىسى.
