جالپى, اتالعان تۋرنيرگە التى ۇجىم, اتاپ ايتقاندا «الەم جۇلدىزدارى» قۇراماسى, پورتۋگاليا, يتاليا, رەسەي, گەرمانيا جانە قازاقستان كوماندالارى قاتىستى. بۇل كوماندالار ەكى توپقا ءبولىنىپ, فينالعا شىعار جولدامانى ساراپقا سالدى. ناتيجەسىندە, ءوز توپتارىندا ۇپايدى كوپ جيناعان رەسەي كومانداسى مەن «الەم جۇلدىزدارى» قۇراماسى فينالدا كەزدەسىپ, ءتۋرنيردىڭ باس جۇلدەسى ءۇشىن كۇش سىناستى.
بۇل سىندا رەسەيلىك فۋتبولشىلار 7:4 ەسەبىمەن جەڭىسكە جەتىپ, EXPO-2017 Football Cup ءتۋرنيرىنىڭ چەمپيونى اتاندى. رەسەي قۇراماسى ساپىنان رومان شيروكوۆ, ەۆگەني الدونين جانە ۆيكتور بۋلاتوۆ سىندى فۋتبولشىلار قوس-قوستان گول سوعىپ, كومانداسىنىڭ جەڭىسىنە مول ۇلەس قوستى. جانە ءبىر گولدى دميتري سەننيكوۆ سالدى. «الەم جۇلدىزدارى» ساپىنان فرانتسۋز ۆەنسان كاندەلا, وزبەكستاندىق ازامات ابدۋرايموۆ جانە فينن ياري ليتمانەن مەرگەندىگىمەن كوزگە ءتۇستى.
ءتۋرنيردىڭ قولا جۇلدەسى پورتۋگاليا قۇراماسىنا بۇيىرسا, قازاقستان فۋتبولشىلارى ءتورتىنشى ورىنعا تابان تىرەدى.
جارىس قورىتىندىسىندا, ءار شەپتەگى ۇزدىك ويىنشىلار انىقتالىپ, ارنايى جۇلدەلەرگە يە بولدى. رەسەيلىك رومان شيروكوۆ «ۇزدىك جارتىلاي قورعاۋشى», «الەم جۇلدىزدارى» ساپىندا ونەر كورسەتكەن ۋكراينالىق الەكساندر شوۆكوۆسكي «ۇزدىك قاقپاشى», پورتۋگالدىقتار فەرناندۋ مەيرا مەن مانيشە, سايكەسىنشە «ۇزدىك قورعاۋشى» جانە «ۇزدىك سۇرمەرگەن» اتاندى.
جەڭىمپازداردى ماراپاتتاۋ راسىمىندە رەسەي قۇراماسىنىڭ بۇرىنعى قورعاۋشىسى, «لوكوموتيۆ» كلۋبىنىڭ قۇرامىندا ءوز ەلىنىڭ ەكى دۇركىن چەمپيونى بولعان دميتري سەننيكوۆ ەلورداعا دەگەن سۇيىسپەنشىلىگىن جاسىرا المادى. «استانا كەرەمەت ۇنادى! ادەمى جانە جاس قالا. بۇل جەردە جۇرتتىڭ فۋتبولدى جاقسى كورەتىنى بايقالىپ تۇردى. سودان دا بولار, تۋرنير وتە تاماشا ءوتتى جانە زور قىزىعۋشىلىق تۋدىردى», دەپ اعىنان جارىلدى رەسەي فۋتبولىنىڭ جارقىن وكىلى.
بۇدان بولەك, الەم فۋتبولىنىڭ جۇلدىزدارى «استانا ارەنا» ستاديونىندا اقكول بالالار ءۇيىنىڭ, ماڭعىستاۋ فۋتبول مەكتەبىنىڭ, قاراعاندى بالالار ءۇيىنىڭ جانە استاناداعى ارناۋلى ينتەرناتتىڭ جەتكىنشەكتەرىنە ارناپ شەبەرلىك سىنىبىن وتكىزدى. بۇل يگى شاراعا باس-اياعى 300-گە تارتا بالا قاتىسىپ, ءومىر بويى ۇمىتپاي جۇرەتىن اسەرگە بولەندى.
قايرات ءابىلدا,
«ەگەمەن قازاقستان»
