مۇددەلەر توعىسى

كەشە «يادروسىز الەم ءۇشىن» حالىقارالىق فورۋمى اياسىندا مەملەكەتتىك حاتشى قانات ساۋداباەۆ اقش-تىڭ كانزاس شتاتىنىڭ گۋبەرناتورى سەم براۋنبەكپەن كەزدەستى. دوستىق راۋىشتەگى كەزدەسۋ كەزىندە قوس تاراپ قازاقستان-اقش ارىپتەستىگى تۋرالى ءوزارا پىكىر الماستى. س براۋنبەك ءوزىنىڭ اۋقىم­دى فورۋمعا ارنايى شاقى­رىل­عانى ءۇشىن العىس بىلدىرە كەلە, قا­زاقستاننىڭ جانە ونىڭ پرەزي­دەن­تىنىڭ تاۋەلسىزدىكتىڭ 20 جىل­دىق مەرزىمى ىشىندە قول جەتكىزگەن جەتىستىكتەرىن جوعارى باعالادى. اسىرەسە, قازاقستاننىڭ يادرولىق قارۋعا تىيىم سالۋ جانە تاراتپاۋ ماقساتىندا اتقارعان جۇمىس­تا­رى­نا ايرىقشا توقتالدى. سون­داي-اق, ول ەلىمىزدىڭ تاۋەلسىزدىك العان كۇننەن بەرى «يادروسىز الەم» يدەياسىن بەرىك ۇستانىپ كەلە جاتقانىن, قازىرگى كۇنگە دەيىن كوپتەگەن ازاماتتاردىڭ قازاق­ستان­نىڭ يادرولىق قارۋدان باس تارتۋ شەشىمى ءۇشىن شەكسىز العىس بىلدىرەتىنىن جەتكىزدى. «قازىرگىدەي تىنىشسىز, ءالى دە يادرولىق قارۋدى جاساۋ بەلسەندىلىگى ەش باسەڭسىمەي تۇرعان زاماندا مۇنداي شەشىمنىڭ ءرولى ءتىپتى دە جوعارى. بۇل قازاقستاننىڭ يادرو­لىق قارۋعا قارسى قوزعالىستىڭ كوشباسشىسى بولۋىنا تولىقتاي مۇمكىندىك بەرەدى, – دەدى س. براۋنبەك. – بۇعان قوسا, مەن قازاق­ستان جەرىنە ەكى ەل اراسىنداعى ساۋ­دا-ەكونوميكالىق بايلانىس­تار­دى جانداندىرۋعا نيەتتەستىك تانىتۋ ماقساتىندا كەلىپ وتىر­مىن. بۇل ورايدا, اۋىل شارۋا­شى­لىعى سالاسىنا وزىق تەحنولوگيالار ەنگىزۋ جاعىنا دا ايرىقشا ءمان بەرۋىمىز قاجەت.  جاقىن بولا­شاق­تاعى 30 جىل ىشىندە الەمدە تۇتىناتىن ازىق-ت ۇلىككە قاجەتتى­لىك كوپ ەسە ارتادى. قازىرگىمەن سا­لىستىرعاندا. بۇل رەتتە, قا­زاق­ستان مەن كانزاس اۋىل شارۋا­شىلىعى سالاسىندا ءتيىمدى ارىپتەستىك ورناتا الار ەدى». كەزدەسۋ كەزىندە قوس مەملە­كەت­تىڭ اۋىلشارۋاشىلىق, ماشينە جاساۋ جانە گۋمانيتارلىق سالا­لا­رداعى ءتيىمدى ارىپتەستىك جايى ءسوز بولدى. بۇل رەتتە,  بيىلعى جىلدىڭ شىلدە ايىندا قازاقستان مەن اقش اراسىندا عىلىمي-تەح­نيكالىق ىنتىماقتاستىق الەۋە­تىن كوتەرۋدى كوزدەگەن ارنايى كە­لىسىمنىڭ ءوز كۇشىنە ەنگەنىن ايتۋعا بولادى. بۇل كەلىسىمگە وتكەن جىلى ن.نازارباەۆتىڭ ۆاشينگ­تون­عا ساپارى كەزىندە قول قويىل­عان-تۇعىن. ەندى, مىنە, اتالعان قۇجات وسى سالاداعى ارىپتەستىكتى نى­عايتا تۇسۋگە جول اشقالى وتىر. ەكى ەل اراسىنداعى بايلانىس تەك مۇنىمەن شەكتەلىپ قالماق ەمەس. نازارباەۆ ۋنيۆەرسيتەتى مەن اقش-تىڭ جەتەكشى دەگەن جوعارى وقۋ ورىندارى اراسىندا دا مىقتى ارىپتەستىك تەتىگى ورناپ كەلەدى. ماسەلەن, 2008 جىلى قول قويىلعان «كانزاس ۋنيۆەرسيتەتى مەن قازاق اگروتەحنيكالىق ۋنيۆەرسيتەتى اراسىنداعى تۇسىنىستىك تۋرالى» مەموراندۋم ەندىگى كەزەكتە اقش-تىڭ يننوۆاتسياسى مەن جوعارى تەحنولوگياسىن بەلسەندى پايدالانۋعا, ولاردى قازاق­ستاننىڭ اگروونەركاسىپتىك سەكتو­رى­نا دا باعىتتاۋعا سەپ بولماق. قانات ساۋداباەۆ پەن سەم براۋنبەك بولاشاقتا قازاقستان-اقش ارىپتەستىگىن ودان ءارى نى­عاي­تا تۇسۋگە مۇددەلى ءارى دايىن ەكەندىكتەرىن جەتكىزدى. ءلايلا ەدىلقىزى.