مادەنيەت جانە سپورت مينيسترلىگى مەن شىۇ باستاماسىمەن قولعا الىنعان جەڭىل اتلەتيكا جارىسىن بيىل قۇرىلعانىنا 25 جىل تولاتىن ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ فورۋمىمەن بىرگە وتكىزۋ جوسپارلانعان. سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى سەرىك جاراسباەۆتىڭ ايتۋىنشا, شىۇ-نىڭ ءبىرىنشى مارافونى بىلتىر قىتايدىڭ كۋنمين قالاسىندا وتكەن ەكەن. «وعان 15 مىڭ ادام قاتىسقان. ال ەكىنشى مارافون ەكسپو-2017 كورمەسى اياسىندا وتپەك. بۇل جولى ۇيىمداستىرۋشىلار شارادا 5000 ادامدى قامتيتىن بولادى. ونىڭ ىشىندە مىڭ ادام شەتەلدەن كەلمەك. سونداي-اق, شىۇ-نىڭ ءاربىر ەلىنەن 30 كاسىبي سپورتشى تارتۋ كوزدەلگەن.تىركەۋ جۇمىستارى ارنايى اشىلعان سايتتا 15 شىلدەدە باستالىپ, جۇرگىزىلۋدە», دەيدى ول.
ءباسپاسوز ءماسليحاتىندا مارافوننىڭ رەسمي تۇردە جۇگىرۋ ايماقتارى تانىستىرىلدى. ولار – ارنايى سيمۆولدىق 2017 مەتر, بۇل قاشىقتىق EXPO RUN دەپ اتالادى; اۋەسقويلار ءۇشىن 10 شاقىرىم; تولىق مارافون – 42 شاقىرىم 195 مەتر. جارىس جەلىسى استانانىڭ سول جاعالاۋىنداعى باستى كوشەلەردى قامتيدى. ستارت ەكسپو كورمەسىنىڭ اۆتوتۇراعى ايماعىنان, ياعني «Mega SilkWay» ساۋدا ورتالىعى جاعىنان 27 تامىز كۇنى باستالادى. 42 شاقىرىم 195 مەترگە قاتىسۋشىلار ساعات 7:30-دا, 10 شاقىرىمعا قاتىسۋشىلار 8:00-دە, 2017 مەترگە قاتىسۋشىلار 8:30-دان باستاپ جۇگىرەدى.
ۇمىتكەرلەر مارافوننىڭ رەسمي «www.scomarathon2017.com» سايتى ارقىلى تىركەلە الادى. سودان كەيىن قاتىسۋشىلارعا سايت ارقىلى تىركەۋ نومىرلەرى بەرىلەدى. سونداي-اق, رەسمي سايتتا اقپاراتتىق-جارنامالىق ماتەريالدارمەن (فوتو, ۆيدەو, افيشا) جانە تىركەۋ ەرەجەلەرىمەن وففلاين تۇردە تانىسۋعا بولادى.
25 جانە 26 تامىز كۇندەرى ەكسپو كورمەسىنىڭ وڭتۇستىك قاقپاسى جاعىنان تىركەۋدەن وتكەن قاتىسۋشىلارعا باستاپقى پاكەتتەر بەرىلەدى. وندا جۇگىرۋگە ارنالعان جەيدە مەن ءاربىر قاتىسۋشىنىڭ جەكە ءنومىرى بار. پاكەتتەردى تاراتۋ كەزىندە تانىمال مارافونشىلاردىڭ قاتىسۋىمەن شەبەرلىك ساعاتتارى وتەدى. ولار اۋەسقوي جۇگىرۋشىلەرگە مارافونعا قالاي دايىندالۋ كەرەكتىگىن كورسەتىپ, اقىل-كەڭەستەرىن ايتاتىن بولادى.
قازاقستان جەڭىل اتلەتيكا فەدەراتسياسىنىڭ ۆيتسە-پرەزيدەنتى ەلدار تابانوۆتىڭ ايتۋىنشا, 10 شاقىرىمعا جۇگىرەتىندەر 3000 تەڭگە, 42 شاقىرىم 195 مەترگە جۇگىرەتىندە 5000 تەڭگە كولەمىندە جارنا تولەۋى ءتيىس. ال 2017 مەترگە جۇگىرۋ تەگىن. سونىمەن قاتار زەينەت جاسىنداعى جانە مۇمكىندىگى شەكتەۋلى جاندار تەگىن قاتىسا الادى.
اسحات رايقۇل,
"ەگەمەن قازاقستان"
