«كورىپ وتىرعانىمىزداي, اقپاراتتىق ءتۇسىندىرۋ جۇمىستارى بىرقاتار وبلىستا اقساپ جاتىر. سوندىقتان ونى جانداندىرۋ قاجەت. وبلىستاردىڭ, الماتى مەن استانا قالاسىنىڭ اكىمدەرىنە اقپاراتتىق ءتۇسىندىرۋ جۇمىستارىن, اسىرەسە جۇمىسپەن ءوزىن-ءوزى قامتىعان تۇرعىندار اراسىندا جانداندىرۋدى تاپسىرامىن», دەدى باقىتجان ساعىنتاەۆ.
سونىمەن قاتار ۇكىمەت باسشىسى الەۋمەتتىك مەديتسينالىق ساقتاندىرۋ سالىمدارىنا جاۋاپتى ورتالىق مەملەكەتتىك ورگاندارعا مەملەكەتتىك كىرىستەر كوميتەتىمەن بىرلەسىپ, جۇمىس بەرۋشىلەر مەن جەكە كاسىپكەرلەردىڭ اۋدارىمدار مەن جارنالاردى اۋدارۋىنا كۇندەلىكتى مونيتورينگ جۇرگىزۋدى مىندەتتەدى.
«تاعى ءبىر ماسەلە بار. ول تابىستارى تومەن نەمەسە مۇلدەم جوق, اۋدارىمدار مەن جارنالاردى اۋدارا المايتىن ازاماتتارمەن بايلانىستى... ولار جۇيەدەن تىسقارى قالىپ قويۋى مۇمكىن. وسىعان بايلانىستى ەڭبەك جانە حالىقتى الەۋمەتتىك قورعاۋ مينيسترلىگىنە وبلىستاردىڭ, الماتى مەن استانا قالالارى اكىمدەرىمەن بىرلەسىپ, مۇنداي تۇلعالاردى ولاردىڭ مالىمەتتەرىن كورسەتە وتىرىپ سايكەستەندىرۋ تەتىكتەرىن, مىندەتتى الەۋمەتتىك مەديتسينالىق ساقتاندىرۋ جۇيەسىنە تارتۋ ءۇشىن جۇمىسپەن قامتۋ شارالارىن ازىرلەۋ تاپسىرىلادى», دەدى پرەمەر-مينيستر.
