ول قارىنداش وزەگى مەن ماگنيتتەردەن سەيسموگرافتى قۇراستىردى, جانە دە ءبىر ستاقان سۋ, تۇز جانە لازەردىڭ كومەگىمەن ديففۋزيا جىلدامدىعىن انىقتادى. فيزيكا ءپانى بويىنشا بەدەلدى حالىقارالىق وليمپيادا (IphO) يندونەزيانىڭ دجوكياكارتا قالاسىندا ءوتتى. وندا الەمنىڭ 88 ەلىنەن 400-دەن استام ادام قاتىسقان.
وليمپيادا ەكى كەزەڭنەن تۇردى. ءبىرىنشى, تاجىريبەلىك كەزەڭدە, ءبىر ستاقان سۋ, تۇز جانە لازەردىڭ كومەگىمەن ديففۋزيا جىلدامدىعىن انىقتاۋ كەرەك بولدى, جانە دە قارىنداش وزەگى مەن ماگنيتتەردەن سەيسموگرافتى قۇراستىرۋ ۇسىنىلدى.
- ەكىنشى كەزەڭ – تەوريالىق كەزەڭ بولدى,-دەيدى تەمىرلان.- وندا ءۇش تاپسىرمانى شەشۋ كەرەك ەدى. ءبىرىنشى تاپسىرما ىقپالداسۋعا قاتىستى, ەكىنشىسى جانارتاۋلار, ال ءۇشىنشى تاپسىرما – قارا قۇردىم جايىندا. تاپسىرمالار قيىن بولدى, بىراق مەن شەشىمىن تاپتىم.
ءوز ءبىلىمىنىڭ ارقاسىندا تەمىرلان وڭتۇستىك كورەيا ۋنيۆەرسيتەتتەرىنىڭ بىرىنە ءبىلىم گرانتىن جەڭىپ الىپ, وندا ينجەنەر ماماندىعى بويىنشا وقۋعا ءتۇستى.
- ءبىرىنشى جىل تانىسۋ جىلى بولادى,-دەپ ءتۇسىندىردى تەمىرلان. – ارى قاراي ماماندىقتى تاڭداۋ قاجەت. قالاي بولعان جاعدايدا دا ماماندىعىم فيزيكامەن بايلانىستى بولادى. بەدەلدى وليمپياداداعى جەڭىس تەمىرلانعا قالاعان شەتەلدىك جوو-عا تۇسۋگە مۇمكىندىك بەرگەنىمەن, ول وقۋ ورنىن تاڭداپ قويعانىن جانە وڭتۇستىك كورەياعا اتتانۋعا دايىندالىپ جاتقاندىعىن ايتتى.
