بيىل ۇبت 165 تاپسىرۋ پۋنكتىنىڭ 1431 اۋديتورياسىندا وتكىزىلدى. بۇل اۋديتوريالار بايلانىس سيگنالدارىن بوگەيتىن قۇرىلعىلارمەن, مەتالل دەتەكتورلارىمەن, ۇبت بارىسىن باقىلاۋ جانە جازۋ بەينەكامەرالارىمەن جابدىقتالدى. اتا-انالارعا ىڭعايلىلىقتى قامتاماسىز ەتۋ ماقساتىندا 108 پۋنكتتەگى ۇبت بارىسى مونيتورعا شىعارىلىپ, كورسەتىلدى. ادەتتەگىدەي, ۇبت وتكىزۋ ورىندارىندا مەديتسينالىق قىزمەت پەن قۇقىق قورعاۋ ورگاندارىنىڭ وكىلدەرى جۇمىس ىستەپ, اۋىز سۋ جانە تاعام ونىمدەرىن ساتۋ ورىندارى قىزمەت كورسەتتى. بەلگىلەنگەن ءتارتىپ بويىنشا ۇبت-نىڭ وتكىزىلۋى مەن ەرەجەلەردىڭ ورىندالۋىن قاداعالاۋ ءۇشىن تەستىلەۋ وتكىزىلەتىن پۋنكتتەرگە ءبىلىم جانە عىلىم مينيسترلىگى تاراپىنان 1818 وكىل, ونىڭ ىشىندە جوعارى وقۋ ورىندارى (75%) جانە كوللەدجدەردىڭ (25%) وقىتۋشىلارى جىبەرىلدى.
ورتالىق كوممۋنيكاتسيالار قىزمەتىندەگى بريفينگتە ۇلتتىق تەستىلەۋ ورتالىعىنىڭ ديرەكتورى رامازان الىمقۇلوۆ 74 مىڭنان استام وقۋشىنىڭ ۇبت-دا تومەنگى كورسەتكىشتەن جوعارى بالل جيناعاندىعىن اتاپ ءوتتى. ونىڭ ايتۋىنشا, بيىل ەڭ جوعارى 140 بالدى ەشكىم جيناي المادى. ال 139 بالدى الماتىداعى مۇقاعالي ماقاتاەۆ اتىنداعى مەكتەپتىڭ وقۋشىسى تاسان سايات جينادى. تاعى 7 وقۋشى 138 بالل الدى.
ۇلتتىق تەستىلەۋ ورتالىعى ۇسىنعان مالىمەتتەرگە سەنسەك, بيىل 5064 ادام 120-دان جوعارى بالل جيناسا, وقۋشىلاردىڭ 70,7 پايىزى (52 717) 66-119 بالل, 7,9 پايىزى (5935) 60-65 بالل العان.
«ۇبت-دا ەڭ تومەنگى بالل – 50. ەمتيحان بارىسىندا 74517 تۇلەك وسى كورسەتكىشتەن جوعارى بالل جينادى. بۇل 80,5 پايىزدى قۇرايدى. بىلتىر بۇل كورسەتكىش 81 پايىز بولعان. وكىنىشكە قاراي, قالعان وقۋشىلار تومەنگى بالل جينادى», دەيدى رامازان الىمقۇلوۆ.
دەگەنمەن, قاجەتتى مەجەدەن وتە الماعان 14066 وقۋشى جاڭا ەرەجە بويىنشا تامىز ايىندا ۇبت-نى قايتا تاپسىرا الادى. سول كەزدە تەستىلەۋدەن وتپەسە, وعان ەندىگى جىلدىڭ تامىز ايىندا ۇبت-نى ءۇشىنشى رەت قايتا تاپسىرۋ مۇمكىندىگى بەرىلەدى.
سونىمەن قاتار, بيىل العاش رەت تەست بارىسىن ونلاين كورسەتۋ جۇزەگە اسىرىلعانىن دا ەرەكشە اتاپ وتۋگە بولادى. بۇل قىزمەت بارلىق ادامعا قازاقستاننىڭ كەز كەلگەن نۇكتەسىندە ءوتىپ جاتقان ۇلتتىق بىرىڭعاي تەستىلەۋ بارىسىن قاداعالاۋعا مۇمكىندىك بەردى. ء«بىزدىڭ پايىمىمىزشا, بۇل قىزمەت بۇزۋشىلىق دەڭگەيىن تومەندەتۋگە ايتارلىقتاي سەپتىگىن تيگىزدى. ۇبت-نى وتكىزۋ ەرەجەسىن بۇزعانى جانە ۇيالى تەلەفون سىندى تىيىم سالىنعان زاتتاردى قولدانعانى ءۇشىن تەستىلەۋدەن 12 تۇلەك شىعارىلدى. جالپى تەستىلەۋ بارىسىندا 84 مىڭنان استام تىيىم سالىنعان زاتتار, ونىڭ ىشىندە 40 مىڭنان استام ەلەكتروندى قۇرىلعىلار مەن 40 مىڭنان استام قاعاز تۇرىندەگى شپارگالكالار الىندى», – دەدى ۇلتتىق تەستىلەۋ ورتالىعىنىڭ ديرەكتورى.
ۇبت وتكىزۋ ورىندارىندا قۇرامىندا نەگىزىنەن 3300 ءپان مۇعالىمى بار اپەللياتسيالىق كوميسسيا جۇمىس ىستەدى. ال رەسپۋبليكالىق اپەللياتسيالىق كوميسسيا قۇرامىندا 54 ادام بولدى. رەسپۋبليكالىق كوميسسياعا مازمۇنى بويىنشا 199 تەست تاپسىرماسى ءتۇسىپ, ونىڭ 103-ءى قاناعاتتاندىرىلدى.
رامازان الىمقۇلوۆتىڭ ايتۋىنشا, ۇلتتىق تەستىلەۋ ورتالىعى تۇلەككە ۇبت-نى باسقا پۋنكتتە تاپسىرۋعا رۇقسات بەرۋ مۇمكىندىگىن زاڭداستىرۋ بويىنشا ۇسىنىس ەنگىزبەك. بۇعان بيىلعى تەستىلەۋ بارىسىندا اۋرۋحانادان شىققان وقۋشىنىڭ باسقا پۋنكتكە بارىپ تەست تاپسىرا الماي قالۋى اسەر ەتكەن.
بيىلعى تەستىلەۋ سىناعىنىڭ نەگىزگى ەرەكشەلىكتەرىنە تاعى ءبىر مارتە توقتالايىق. ەڭ الدىمەن, ۇلتتىق بىرىڭعاي تەستىلەۋ 5 ءپان بويىنشا تاپسىرىلدى. اتاپ ايتقاندا, قازاقستان تاريحى, ماتەماتيكالىق ساۋاتتىلىق, وقۋ ساۋاتتىلىعى (20 تاپسىرمادان, شەكتى دەڭگەيى – ءار پاننەن كەمىندە 5 بالدان) جانە تاڭداعان ماماندىققا سايكەس 2 بەيىندى پاننەن (30 تاپسىرمادان, شەكتى دەڭگەيى 15 بالدان كەم بولماۋى ءتيىس) تاپسىردى. 120 تەستىلەۋ تاپسىرماسى بويىنشا تۇلەك ماكسيمالدى 140 بالل جيناي الادى. تاپسىرمالاردى ورىنداۋعا 3 ساعات 50 مينۋت ۋاقىت ءبولىندى.
گۇلنۇر قۋانىشبەكقىزى,
«ەگەمەن قازاقستان»
