زەينەتاقى قورىنىڭ ءباسپاسوز قىزمەتىنىڭ حابارلاۋىنشا, بۇگىنگى تاڭدا 754,5 مىڭداي ادام «ەلەكتروندىق مەكەنجاي» بويىنشا اقپارات الۋ ءتاسىلىن تاڭداعان بولسا, 3,3 ميلليوننان استام ادام بۇل ءۇشىن قوردىڭ رەسمي سايتىن نەمەسە سمارتفوندار مەن پلانشەتتەرگە ارنالعان «ENPF» ۇيالى قوسىمشاسىن پايدالانۋ مۇمكىندىگىنە يە.
ەندى بجزق 2017 جىلعى 30 ماۋسىمنان باستاپ www.enpf.kz سايتىنداعى «ەلەكتروندىق قىزمەت كورسەتۋ» ءبولىمى جانە جەكە كابينەت ارقىلى بۇرىنعىدان دا ىڭعايلى قىزمەتتەردى جۇزەگە اسىرماق:
– مىندەتتى زەينەتاقى جارنالارىن ەسەپكە الۋ بويىنشا جەكە زەينەتاقى شوتىن اشۋ جونىندە ءوتىنىش بەرۋ;
– زەينەتكەرلىك جاسقا تولۋعا نەمەسە 1-ءشى نەمەسە 2-ءشى توپتارداعى مۇگەدەكتەردىڭ مۇگەدەكتىگى مەرزىمسىز بولىپ بەلگىلەنۋىنە بايلانىستى زەينەتاقى تولەمدەرىن تاعايىنداۋ تۋرالى ءوتىنىش بەرۋ. العاشقى وتىنىشتەر جولداندى, ونلاين راسىمدەۋ بىرنەشە مينۋتتى عانا الادى;
– تولەمدەردى تاعايىنداۋ جانە (نەمەسە) اۋدارۋ جونىندەگى ءوتىنىشتىڭ ورىندالۋ مارتەبەسىن قاداعالاۋ.
مىندەتتى زەينەتاقى جارنالارىن ەسەپكە الۋ بويىنشا جەكە زەينەتاقى شوتىن اشۋ جونىندە ءوتىنىش بەرۋ ءۇشىن ەلەكتروندىق تسيفرلىق قولتاڭبانىڭ (ەتسق)قولدانىستاعى كىلتىن الۋ جەتكىلىكتى. زەينەتاقى تولەمدەرىن تاعايىنداۋ جونىندە ءوتىنىش بەرۋ ءۇشىن ەتسق-دان باسقا ەكىنشى دارەجەلى بانكتە نەمەسە «قازپوشتادا» (تەڭگە) اشىلعان, 20 ساننان تۇراتىن بانك شوتى تۋرالى مالىمەتتى جانە ەكىنشى دارەجەلى بانكتىڭ دەرەكتەمەلەرىن كورسەتۋ قاجەت.
بۇل رەتتە بجزق الۋشىعا تولەمدەردى تاعايىنداۋ/اۋدارۋ جونىندەگى ءوتىنىشتىڭ ورىندالۋى تۋرالى سمس-حابارلاما جىبەرۋ ارقىلى قۇلاعدار ەتەدى.
زەينەتاقى جيناقتارىن تولەۋ نەمەسە اۋدارۋ مارتەبەسى تۋرالى مالىمەتتەردى جەكە كابينەتتەن بىلۋگە بولادى. ول ءۇشىن سالىمشىلار (الۋشىلار) الدىمەن سايتقا تىركەلەدى. كەيىن ەتسق نەمەسە جسن (جەكە سايكەستەندىرۋ ءنومىرى) مەن قۇپيا ءسوزدىڭ (پارول) كومەگىمەن جەكە كابينەتكە كىرە الادى.
جەكە زەينەتاقى شوتىنداعى اقشا قوزعالىسى تۋرالى قۇپيالىقتى ساقتاۋ ماقساتىندا زەينەتاقى جيناقتارىنىڭ جاي-كۇيى تۋرالى اقپاراتتى «ينتەرنەت ارقىلى» الۋ ءتاسىلىن تاڭداعان جاعدايدا عانا جسن مەن ءپارولدى تىركەۋگە بولادى. بۇل ءۇشىن جەكە باستى كۋالاندىراتىن كۋالىكپەن بجزق كەڭسەسىنە جۇگىنۋ قاجەت.
ال بۇعان دەيىن جەكە زەينەتاقى شوتىن اشۋ تۋرالى ءوتىنىشتى, زەينەتاقىمەن قامسىزداندىرۋ تۋرالى شارتتى نەمەسە قوسىمشا كەلىسىمدى راسىمدەۋ بارىسىندا اقپاراتتى «ينتەرنەت ارقىلى» الۋ ءتاسىلىن تاڭداعان ادامدار ءۇشىن بجزق كەڭسەسىنە كەلۋدىڭ قاجەتى جوق.
سونىمەن اشىق ەسىك كۇنىندە سالىمشىلار بجزق ماماندارىنىڭ كومەگىمەن بىرنەشە مينۋت ىشىندە www.enpf.kz سايتىنا تىركەلىپ, ۇيالى قوسىمشانى جۇكتەپ الۋعا قول جەتكىزدى.
كەلۋشىلەردىڭ كوپشىلىگىن بجزق-نىڭ ەلەكتروندىق كەڭەسشىسى قىزىقتىرعان. قازىرگى تاڭدا قور كەڭسەلەرىندە مۋلتي-تاچ ەكرانى بار اقپاراتتىق كيوسكىلەر ورناتىلعان. كەلۋشىلەر سول ارقىلى انىقتامالىق اقپاراتتار الىپ, زەينەتاقى كالكۋلياتورى بويىنشا وزدەرىنىڭ بولاشاق زەينەتاقىلارىنىڭ مولشەرىن بولجالدى تۇردە ەسەپتەي الادى. سونىمەن قاتار, اقپاراتتىق كيوسك ارقىلى جەكە زەينەتاقى شوتى بويىنشا ءۇزىندى-كوشىرمەنى ەلەكتروندى مەكەنجايعا جىبەرۋگە بولادى. قازىر رەسپۋبليكا بويىنشا 10 اقپاراتتىق كيوسك جۇمىس ىستەيدى.
«اقپارات الۋدىڭ زاماناۋي تاسىلدەرى وتاندىق زەينەتاقى جۇيەسىن ءاربىر ازاماتقا جان-جاقتى ءارى وڭاي تۇسىندىرۋگە مۇمكىندىك بەرەدى. بۇل جەردە زەينەتاقى جۇيەسىن ءتۇسىنۋ كادىمگى جەكە زەينەتاقى شوتىنىڭ جاي-كۇيى تۋرالى مالىمەت الۋدان باستالادى. بجزق سالىمشىلارى وزدەرىنىڭ زەينەتاقى جيناقتارى تۋرالى ونلاين تارتىبىندە اقپارات الا وتىرىپ, وزدەرىنىڭ جۇمىس بەرۋشىلەرىن جانە ينۆەستيتسيالىق تابىستاردىڭ ەسەپتەلۋىن قاداعالاي الادى ءارى زەينەتاقىنىڭ مولشەرى بويىنشا بولجام دا جاساۋعا بولادى. وسىلايشا, زەينەتاقى جارنالارى تۇراقتى اۋدارىلىپ تۇراتىن بولسا, زەينەتاقى جيناقتارىنىڭ كولەمى دە ارتاتىندىعىنا كوز جەتكىزەدى. بۇل بولاشاق زەينەتكەردىڭ بەرەكەلى تىرشىلىگىن قامتاماسىز ەتۋگە مۇمكىندىك بەرەدى», – دەيدى «بجزق» اق باسقارما ءتورايىمىنىڭ ورىنباسارى ساۋلە ەگەۋباەۆا.
تەك الماتى قالاسىنىڭ وزىندە اتالمىش شاراعا 500-گە جۋىق ادام قاتىستى.
ايناش ەسالي,
«ەگەمەن قازاقستان»
الماتى
