كورمە كەشەنىنە كىرەتىن قاقپالاردا تەكسەرىپ وتكىزۋ جۇيەسى بارىنشا كۇشەيتىلگەن. رەنتگەن-تەلەۆيزيالىق قوندىرعىلاردىڭ, مەتالل جانە جارىلعىش زاتتاردى انىقتايتىن دەتەكتورلاردىڭ كومەگىمەن تەكسەرىپ-قاراۋ جۇرگىزىلەدى. «ەكسپو نىساندارىنىڭ ارنايى كوميسسياسى جارىلعىش زاتتاردى, راديواكتيۆتى, حيميالىق جانە باسقا دا كومپونەنتتەردى انىقتاۋ ماقساتىندا كۇن سايىن تەكسەرۋ جۇرگىزىپ وتىرادى. كينولوگتار جارىلعىش زاتتاردى ىزدەۋگە ۇيرەتىلگەن قىزمەتتىك يتتەرمەن كورمەنىڭ اۆتوتۇراقتار اۋماعى مەن كىرەتىن ەسىكتەرىن تەكسەرەدى. ءموبيلدى تەكسەرىس كەشەنى كومەگىمەن كورمە اۋماعىنا كىرگىزىلەتىن تاۋارلار مەن جۇكتەر مۇقيات قارالادى», دەيدى ماماندار.
قورعانىس مينيسترلىگى ۇشقىشسىز ۇشاتىن تىركەلمەگەن ۇشۋ اپپاراتتارىنىڭ كورمە اۋماعىندا ۇشۋىنا جول بەرمەس ءۇشىن 3 شاقىرىم راديۋستەگى اۋماققا جانە 3000 مەتر بيىكتىككە شەكتەۋ قويعان بولاتىن. ۇشقىشسىز ۇشاتىن ۇشۋ اپپاراتتارىن باسقاراتىن سيگنالداردى بوگەۋگە راديوەلەكتروندى قوندىرعىلار پايدالانىلادى. بۇل توپ اۋەنى قۇرىلعى ارقىلى قاداعالايتىن پوليتسيانىڭ جەدەل توبىمەن بىرگە جۇمىس ىستەيدى. اۋەنى قاداعالاۋ قۇرىلعىلارى كورمەنىڭ اۋماعىنا جانە وعان جاقىن كوشەلەرگە دە ورناتىلعان.
«ەلورداداعى ءاربىر مادەني-كوپشىلىك, سپورتتىق جانە قوعامدىق-ساياسي ءىس-شارالار ىشكى ىستەر مينيسترلىگىنىڭ قاتاڭ قاداعالاۋىندا. شارالار قاۋىپسىز وتكىزىلۋى ءۇشىن ءتيىستى كۇش پەن قۇرالدار ءبولىنىپ, ارنايى مونيتورينگ جۇرگىزىلەدى. كورمە اشىلعان ۋاقىتتان بەرى ونىڭ اۋماعىندا 100 شاقتى مادەني-كوپشىلىك ءىس-شارا وتكىزىلدى», دەيدى ماماندار.
ەكسپو كورمەسىن وتكىزۋ كەزىندە قالاداعى قوناق ۇيلەر مەن قوناق جايلارداعى قوعامدىق ءتارتىپ كۇزەتىنە 110 پوليتسيا قىزمەتكەرى بولىنگەن. ولاردىڭ سانى ەلورداعا كەلگەن قوناقتاردىڭ مولشەرىنە بايلانىستى تولىقتىرىلىپ وتىرادى.
اسحات رايقۇل,
«ەگەمەن قازاقستان»
