سەميناردى اشقان ءدىن ىستەرى جانە ازاماتتىق قوعام ۆيتسە-ءمينيسترى بەرىك ارىن بۇگىندە ءدىن سالاسىنداعى ەڭ باستى مىندەت ەل دامۋىنىڭ زايىرلى قاعيداتتارىن ساقتاۋ جانە نىعايتۋ ەكەنىن, وسى رەتتە ازاماتتاردىڭ ار-وجدان بوستاندىعىن ساقتاۋ, ءدىندى تاڭداۋ نەمەسە ودان باس تارتۋ قۇقىعىن قامتاماسىز ەتۋ دەموكراتيالىق مودەلدىڭ مىزعىماس نەگىزى ەكەنىن اتاپ ءوتتى.
ۆيتسە-ءمينيستردىڭ ايتۋىنشا, قازىرگى تاڭدا بۇكىل الەم ەلدەرىندە ءدىني ەكسترەميزم مەن تەرروريزم قاۋپى ساقتالىپ وتىر. سول سەبەپتى ءاربىر مەملەكەت ەتەك-جەڭىن قىمتاپ, قاۋىپسىزدىگىن بەرىك ورنىقتىرۋ ءۇشىن پارمەندى شارالاردى قابىلداۋ قاجەت. «ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنىڭ ءۇشىنشى باسىمدىعى رەتىندە ءدىن سالاسىنداعى ماسەلەلەردىڭ قوزعالۋى كەزدەيسوقتىق ەمەس. بۇل الەمدە جانە ەلىمىزدە بايقالىپ وتىرعان راديكالدىق ءدىني اعىمداردىڭ تەرىس يدەيالارىنىڭ تارالۋىنان تۋىنداپ وتىر. قازاقستان ءۇشىن جات ءدىني يدەولوگيانىڭ تارالۋى ەلىمىزدەگى مۇسىلماندار قاۋىمداستىعىنىڭ جىكتەلۋىنە, وزدەرىن مەملەكەتكە, قوعامعا جانە قازاقستان مۇسىلماندارى ءدىني باسقارماسىنا قارسى قوياتىن ادامدار قاتارىنىڭ قالىپتاسۋىنا الىپ كەلەدى. سوندىقتان قاۋىپتىڭ الدىن الۋ ءۇشىن مەملەكەتتىك ساياساتتى قازاقستاندىق قوعامنىڭ ءداستۇرلى قۇندىلىقتارىنا نەگىزدەي وتىرىپ, كۇشەيتكەن ابزال», دەيدى بەرىك ساقباي ۇلى.
ال ۇلتتىق كىتاپحانا ديرەكتورىنىڭ كەڭەسشىسى, بەلگىلى ساياساتكەر ايدوس سارىم راديكالدىق ءدىني اعىمدارعا توسقاۋىل قويۋدى ۇلتتىق تۇتاستىقتى ساقتاۋدان باستاۋ كەرەكتىگىن ايتتى. ونىڭ ويىنشا, بۇگىنگى قوعامدا قانداي دا ماسەلەگە دەگەن نەمقۇرايلىلىق باسىم. ەگەر الدەكىم جات ءدىننىڭ جەتەگىندە كەتتى دەسە, قوعامنىڭ بەلسەندى ازاماتتارى ونىڭ سەبەبىن ىزدەپ, سالدارىمەن بىرلەسىپ كۇرەسۋدىڭ ورنىنا, جاۋاپكەرشىلىكتى وزگەگە, بيلىككە ىسىرا سالۋعا بەيىم. «مۇنداي نەمكەتتىلىكپەن بەرىك قوعام نەگىزىن قۇرا المايمىز. سوندىقتان ءدىني راديكاليزمنەن تۋىندايتىن تەرىس كوزقاراستار مەن ارەكەتتەرگە بۇكىل قوعام بولىپ قارسى تۇرۋىمىز قاجەت», دەدى ول.
سەمينار بارىسىندا ءدىن ىستەرى جانە ازاماتتىق قوعام مينيسترلىگى جۋرناليستەردى ەلىمىزدەگى ء دىني احۋال تۋرالى ساپالى ءارى دايەكتى اقپارات تاراتۋعا, دەسترۋكتيۆتى جانە ەكسترەميستىك جالعان ءدىني يدەيالاردىڭ تارالۋىنا قارسى تۇرۋعا شاقىردى.
سونىمەن قاتار, اقپاراتتىق ءورىستى ءدىني تاقىرىپپەن تولتىرماۋدى دا ويلاۋ قاجەت. سوڭعى ۋاقىتتا جەكەلەگەن ديسكۋسسيالىق الاڭداردا جيىلەپ كەتكەن ءدىني تاقىرىپتاعى تالقىلاۋلار دا ءارتۇرلى كوزقاراستار مەن ۇستانىمداردىڭ قالىپتاسۋىنا الىپ كەلەتىن كورىنەدى. سوندىقتان ءدىن سياقتى نازىك ماسەلەدە جۋرناليستىك ادەپتى ساقتاۋدىڭ دا ماڭىزى ۇلكەن.
قىمبات توقتامۇرات,
«ەگەمەن قازاقستان»
