ەلشىلىك تاراپىنان العاشقى رەت ۇيىمداستىرىلىپ وتىرعان «تۇرىك زيالىلارىنىڭ باسقوسۋى» اتتى بۇل جيىنعا قازاقستاننىڭ تۇركياداعى ەلشىسى ابزال ساپاربەك ۇلى, تۇركسوي باس حاتشىسى دۇيسەن قاسەيىنوۆ, تۇركيا ۇلى ۇلتتىق ءماجىلىسىنىڭ دەپۋتاتى, قازاقستان-تۇركيا پارلامەنتتىك دوستىق توبىنىڭ توراعاسى حاليۋك يپەك, تۇركيانىڭ بۇرىنعى مادەنيەت ءمينيسترى نامىك كەمال زەيبەك, تۇركيا ۇكىمەتىنە قاراستى اتاتۇرىك اتىنداعى مادەنيەت, ءتىل جانە تاريح جوعارى قۇرىلىمىنىڭ باسشىسى دەريا ءورس, «تۇركى وشاقتارى» ۇيىمىنىڭ توراعاسى مەحمەت ءوز, قوجا احمەت ياساۋي ۋنيۆەرسيتەتى وكىلەتتى كەڭەسىنىڭ توراعاسى مۇسا يىلدىز, اتاتۇرىك اتىنداعى مادەنيەت ورتالىعى ديرەكتورىنىڭ ورىنباسارى شابان اباك, تۇركيا عىلىم جانە ادەبيەت اۆتورلارى وداعىنىڭ توراعاسى مەحمەت نۇري پارماكسىز, تۇركى الەمى جازۋشىلارى جانە ونەرپازدارى قورىنىڭ پرەزيدەنتى ياحيا اكەنگين, ەۋرازيا جازۋشىلار قاۋىمداستىعىنىڭ توراعاسى ياكۋب وماروعلى, تۇركى الەمى ساۋلەتشىلەرى جانە ينجەنەرلەرى وداعىنىڭ باس حاتشىسى ءىلياس دەميرجي جانە «ەكوەۋرازيا» قاۋىمداستىعىنىڭ عىلىمي كەڭەس مۇشەسى جان ۇنۆەر قاتىستى.
جيىندى اشقان ەلشى ا.ساپاربەك ۇلى ەلباسى ۇسىنعان «بولاشاققا باعدار: رۋحاني جاڭعىرۋ» اتتى ماقالانىڭ نەگىزگى باعىتتارى مەن باعدارلاما اياسىندا اتقارىلعان جۇمىستار تۋرالى مالىمەت بەردى.
تۇركيانىڭ ەكس-ءمينيسترى ن.ك.زەيبەك قازاقستاننىڭ شيرەك عاسىردا قول جەتكىزگەن جەتىستىكتەرىن اتاپ, ەلباسى ن.نازارباەۆپەن بولعان كەزدەسۋ تۋرالى اڭگىمەلەپ بەردى. اڭگىمە بارىسىندا ەلباسىنىڭ اتاتۇرىكتەي كورەگەن ساياسات جۇرگىزىپ وتىرعاندىعىن, باعدارلامادا كوتەرىلگەن ماسەلەلەردىڭ قازىرگى تۇركيا ءۇشىن دە كوكەيكەستى ەكەندىگىن جانە لاتىنعا كوشۋ بويىنشا قازاقستان ۇكىمەتىنىڭ وتە قۇپتارلىق ساياساتتى ۇستانعاندىعىن جەتكىزدى.
ال تۇركسوي باس حاتشىسى د.قاسەيىنوۆ قازاقستان مەن تۇركيا اراسىنداعى مادەني جانە گۋمانيتارلىق سالا بويىنشا, سونداي-اق, اتالعان باعدارلاما اياسىندا تۇركسوي تاراپىنان اتقارىلىپ وتىرعان جۇمىستار تۋرالى ەگجەي-تەگجەي اقپارات بەرىپ, ماقالادا كوتەرىلگەن نەگىزگى باعىتتاردىڭ تەك قازاقستان ءۇشىن عانا ەمەس, بۇكىل تۇركىتىلدەس حالىقتارىنىڭ رۋحاني جاڭعىرۋىنا اسا قاجەتتى ەكەندىگىن جەتكىزدى.
ال قوجا احمەت ياساۋي ۋنيۆەرسيتەتى وكىلەتتى كەڭەسىنىڭ توراعاسى م.يىلدىز تۇركى الەمىنە ورتاق ۋنيۆەرسيتەتتىڭ مۇمكىندىگىن پايدالانا وتىرىپ, اتالعان ماقالانىڭ باستى باعىتتارىن جۇزەگە اسىرۋ بويىنشا جۇمىس ىستەۋگە دايىن ەكەندىگىن ايتىپ, «قازاقستانداعى 100 جاڭا ەسىم» سىندى ناقتىلانعان باعدارلامالارمەن قوسا, كۇللى الەمدى مويىنداتقان احمەت ياساۋي سىندى ۇلى تۇلعالاردى ناسيحاتتاۋعا باعىتتالعان ءىس-شارالاردى دا كوبەيتۋ كەرەك ەكەندىگىن جەتكىزدى.
اتاتۇرىك اتىنداعى مادەنيەت ورتالىعى ديرەكتورىنىڭ ورىنباسارى ش.اباك اۋدارما ماسەلەسىنە جۇيەلى تۇردە كوڭىل ءبولىپ, اۋدارماشىلارعا قولداۋ كورسەتۋ كەرەك ەكەندىگىن ايتسا, تۇركيا عىلىم جانە ادەبيەت اۆتورلارى وداعىنىڭ توراعاسى م.ن.پارماكسىز قالامگەرلەردىڭ قالاماقى ماسەلەسىنىڭ شەشىلمەي رۋحاني جاڭعىرۋعا قول جەتكىزۋ مۇمكىن ەمەس ەكەندىگىن اتاپ ءوتتى. بۇعان قوسا, تۇركى الەمى جازۋشىلارى جانە ونەرپازدارى قورىنىڭ پرەزيدەنتى يا.اكەنگين يسلام تاريحىنىڭ ەڭ دامىعان كەزەڭدەرى تۋرالى مالىمەت بەرىپ, دامۋدىڭ باستى سەبەبى رەتىندە اۋدارما ماسەلەسىنە كوڭىل بولىنگەندىگىن كورسەتتى. سونداي-اق, ول اتالعان ماقالانىڭ تۇگەل تۇركى جۇرتى ءۇشىن قاجەتتى مانيفەست ەكەندىگىن قوسا ايتتى.
ءوز كەزەگىندە, ەۋرازيا جازۋشىلار قاۋىمداستىعىنىڭ توراعاسى يا.وماروعلى اتالمىش باعدارلامانىڭ ءححى عاسىردىڭ ولجاسى جانە رۋحاني جاڭعىرۋدان بۇرىن ۇلتتىق رۋحتى قايتا قالىپتاستىراتىن ءۇردىس ەكەندىگىن ايتىپ, رۋحانياتتىڭ نەگىزىن قالاپ وتىرعان ادەبيەت وكىلدەرىنە قولداۋ كورسەتۋدىڭ قاجەتتىلىگىن جەتكىزدى. اۋدارما ماسەلەسىنە توقتالعان يا.وماروعلى تۇركيا تاجىريبەسىنە سۇيەنە وتىرىپ, شەت ءتىلدى مەڭگەرگەندەردىڭ شەت ەلدەردىڭ وكىلدەرى ەمەس, شەتتەگى ءوز ۇلتىڭنىڭ وكىلى بولۋ كەرەك ەكەندىگىنە نازار اۋداردى. اتالعان باعدارلامانى جان-جاقتى جانە شىنايى جۇزەگە اسىرعان جاعدايدا قازىرگى تاڭدا رۋحانياتقا قاۋىپ توندىرگەن راديكاليزم مەن لاڭكەستىككە قارسى كۇرەستىڭ ءبىر ءتۇرى بولارىنا سەنىم ءبىلدىردى.
تۇركى الەمى ساۋلەتشىلەرى جانە ينجەنەرلەرى وداعىنىڭ باس حاتشىسى ءى.دەميرجي ءوز كەزەگىندە ەلباسىنىڭ ۇسىنعان باعدارلاماسىنىڭ تۇتاس تۇركى الەمىنە قاجەتتى جول كارتاسى ەكەندىگىن ايتسا, «ەكوەۋرازيا» قاۋىمداستىعىنىڭ عىلىمي كەڭەس مۇشەسى ج.ۇنۆەر ماقالانى مۇلدە جاڭا كوزقاراس دەپ سيپاتتادى.
جيىن سوڭىندا تۇرىك زيالى قاۋىم وكىلدەرى باعدارلامانىڭ تولىعىمەن جۇزەگە اسۋىنا تىلەكتەستىكتەرىن ءبىلدىرىپ,
قازاقستان ەلشىلىگىنە العىس ايتتى.
دايىنداعان جولدىباي بازار,
«ەگەمەن قازاقستان»
