ەكسپو-2017 حالىقارالىق مامانداندىرىلعان كورمەسى «بولاشاق ەنەرگياسى» تاقىرىبىمەن ءوتىپ جاتقاندىقتان, باتىسقازاقستاندىقتار دا الەمنىڭ جاڭا, ەكولوگيالىق تازا قۋات كوزدەرىنە وتۋىنە ۇلەس قوساتىن جاڭا, قىزىقتى جوبالارىن ۇسىنىپ كورمەك. مىسالى, قاراپايىم ەسىكتى اشىپ-جاپقاندا پايدا بولاتىن ەنەرگيانى, ادام ەدەندى باسقاندا تۇسكەن قىسىمنان وندىرىلگەن قۋاتتى جيناپ, تۇرمىستا پايدالانۋ يدەياسى تالايدى قىزىقتىرارى ءسوزسىز.
قازاقستان رەسپۋبليكاسى عزي باتىس قازاقستان فيليالىنىڭ توراعاسى, «قازاتبي» عىلىمي-ءبىلىم بەرۋ كەشەنىنىڭ پرەزيدەنتى, قر عزا اكادەميگى اقسەرىك ءايتىموۆ ءوزى قۇرىلتايشىلىق ەتەتىن قازيتۋ قازاق يننوۆاتسيالىق تەلەكوممۋنيكاتسيالار جۇيەسى ۋنيۆەرسيتەتى عالىمدارى حالىقارالىق كورمەگە قوس جوبا ازىرلەگەنىن ايتادى. ونىڭ ءبىرى – ەلباسى عالىمدارعا تاپسىرعان ەلەكتروندى ۆاليۋتا جوباسى بولسا, ەكىنشىسى – ادام ميىنىڭ پايدالانىلماي جاتقان بولىگىن ىسكە قوسۋ باعىتىندا ەكەن.
باتىس قازاقستان وبلىستىق تۋريزم جانە سىرتقى بايلانىستار باسقارماسىنىڭ باسشىسى ءانۋار نيەتقاليەۆتىڭ ايتۋىنشا, وبلىس 31 شىلدە مەن 5 تامىز ارالىعىندا استانا قالاسى بويىنشا مازمۇندى باعدارلاما ازىرلەپ وتىر ەكەن. 4 تامىز كۇنى ەكسپو-2017 قالاشىعىندا باتىس قازاقستان وبلىسى كورمە مەيماندارى الدىندا ۇلكەن گالا-كونتسەرت بەرەدى.
– حاديشا بوكەەۆا اتىنداعى وبلىستىق قازاق دراما تەاترى ۇجىمى دا 28 شىلدە مەن 6 تامىز ارالىعىندا استانا قالاسىندا بولادى. قاليبەك قۋانىشباەۆ تەاترىنىڭ عيماراتىندا ەكى قويىلىم قويماقپىز. ونىڭ ءبىرى – حالىقارالىق تەاتر فەستيۆالدەرىنەن ەكى مارتە گران-پري جۇلدەسىن جەڭىپ العان «ترويا ارۋلارى» (ەۆريپيد) تراگەدياسى بولسا, ەكىنشىسى – باشقۇرت دراماتۋرگى ف.بۋلياكوۆتىڭ «قىسقا عۇمىر» مۇڭدى كومەدياسى, – دەيدى تەاتر ديرەكتورى قۋانىش اماندىقوۆ.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
