تۇبەگەيلى جوندەۋ ءۇشىن بۇگىندە «نۇرلى جول» باعدارلاماسى ارقىلى 10,197 ملرد تەڭگە ء بولىنىپ وتىر. ايتا كەتۋ كەرەك, سەمەي اۋەجايى قازاقستانداعى ەڭ ءبىر پروبلەماسى كوپ, شىعىنعا باتقان ءارى كۇردەلى جوندەۋدى قاجەت ەتەتىن اۋەجايلاردىڭ ء بىرى بولىپ سانالادى. ەگەر اۋەجايدى ءتيىستى ينفراقۇرىلىمىمەن بىرگە جوندەۋدەن وتكىزسە, جولاۋشىلاردىڭ قاتارى ءتورت ەسەگە ۇلعايۋى مۇمكىن. ءوز ەلىمىزدىڭ ىشىندە ۇشىپ-قونۋ بىلاي تۇرسىن, وڭتۇستىك شىعىس ازيا مەن ەۋروپا ەلدەرىنە قاتىنايتىن اۋە جولىنىڭ ترانزيتتىك باعىتىندا قىزمەت كورسەتپەك. قازىرگى ۋاقىتتا سەمەيدەن تەك بىرنەشە باعىتقا عانا اۆيامارشرۋت بار ەكەن. ياعني, استانا, الماتى, ماسكەۋ, وسكەمەن قالالارىنا عانا ۇشۋعا بولادى. اۋدانداردان حالىق ءۇرجار وڭىرىنە كوبىرەك شىعادى. وتكەن جىلدىڭ جەلتوقسان ايىندا اەرودرومدا جوندەۋ جۇمىستارى باستالىپ تا كەتتى.
سەمەي اۋەجايىنىڭ ديرەكتورى نۇرتاي وسپانوۆتىڭ ايتۋىنشا, «نۇرلى جول» باعدارلاماسى ارقىلى جوندەۋ جوباسى 22 ايعا لايىقتالعان. ەڭ سوڭىندا حالىقارالىق يكاو ستاندارتتارىنا جاۋاپ بەرە الاتىن اۋەجاي اتالىپ, بارلىق تالاپتاردان وتكەن سوڭ حالىق يگىلىگىنە بەرىلەدى. ءسويتىپ, سەمەي حالىقارالىق تاسىمالدا ماڭىزى بار جول ايرىعى بولىپ سانالماقشى. سەمەيگە ۇكىمەت باسشىسى باقىتجان ساعىنتاەۆ كەلگەن كەزدە دە وسى ماسەلەلەر انىق ايتىلدى. الداعى ۋاقىتتا ۇشاقتار ۇشىپ-قوناتىن الاڭ 2,7 شاقىرىمنان 3,3 شاقىرىمعا دەيىن ۇزارتىلۋى مۇمكىن. جانە جاڭادان اپاتتان قۇتقارۋ ستانساسى ىسكە قوسىلاتىن بولدى. سونداي-اق, ىشكى كوممۋنيكاتسيا جۇيەسى تولىعىمەن جوندەلەدى. اتالمىش اۋەجاي «ۆ» كاتەگوريالى توپقا جاتادى. ونىڭ اۋدانى 3 500 شارشى مەتر. اەروجۇيە جۇمىسىن 136 ادام اتقارادى. اۋەجاي الداعى ۋاقىتتا 70 000 جولاۋشىعا قىزمەت كورسەتە الادى, ونىڭ ىشىندە 80 پايىزى ىشكى اۋە قاتىناسى دەسەك, حالىقارالىق بايلانىس ۇلەسىندە 20 پايىز. جاڭارعان اۋەجاي جىلىنا 4 مىڭعا دەيىن اۆيارەيس جاساي الماق. بۇندا بۇرىندارى تەك مىڭ شاقتى عانا اۆيارەيس جاسالاتىن. پرەمەر-مينيستر باقىتجان ساعىنتاەۆ اۋەجايدىڭ جوبا-جوسپارىمەن تانىسقاننان كەيىن «بۇل وڭىردە سەمەي, وسكەمەن اۋماعىندا عانا 820 مىڭ ادام تۇرادى. سوندىقتان دا, اۆيارەيس سانى 4 مىڭنان دا كوبىرەك بولۋى قاجەت», دەپ ناقتىلادى.
راۋشان نۇعمانبەكوۆا, جۋرناليست
سەمەي
