باسقوسۋدا جەڭىس ماحمۇد ۇلى ۆەدومستۆونىڭ اتقارعان جۇمىس ناتيجەلەرىن بايانداپ, الداعى جوسپارلار مەن مىندەتتەرگە توقتالدى. «جىل باسىنداعى 4 ايدىڭ قورىتىندىسى بويىنشا وندىرىستىك ونەركاسىپ كولەمى 7,1 پايىزعا وسكەنىن كورەمىز. ونىڭ ىشىندە تاۋ-كەن ءوندىرۋ مەن وڭدەۋ ونەركاسىپتەرىنىڭ, ءتۇستى مەتاللۋرگيانىڭ وسىمدەرى ەسەبىنەن قارا مەتاللۋرگيا مەن فارماتسەۆتيكانىڭ كىرىسى ۇلعايعان», دەدى مينيستر.
ايماقتاردىڭ قاتىسۋىمەن بەينەكونفەرەنتسيا رەجىمىندە ۇيىمداستىرىلعان جيىندا جاسالعان باياندامادا بيىل يندۋستريا 4.0 ەلەمەنتتەرىن ەنگىزۋ اياسىندا جۇيەلى شارالار پاكەتىن جانە ونەركاسىپتى تسيفرلاندىرۋدا مەملەكەتتىك قولداۋ قۇرالدارىن ازىرلەۋ جۇمىستارى جۇرگىزىلگەنى ايتىلدى.
«بىلتىرعى قورىتىندى بويىنشا تىكەلەي شەتەلدىك ينۆەستيتسيا 40 پايىزعا ءوسىپ, 20,6 ملرد اقش دوللارىن قۇراعان. بىرلەسكەن جۇمىستاردىڭ ناتيجەسىندە بيىل اقپان ايىندا ەىدۇ كەڭەسى قازاقستاننىڭ ەىدۇ حالىقارالىق ينۆەستيتسيالار جانە كوپ ۇلتتى كاسىپورىندار جونىندەگى دەكلاراتسياسىنا قوسىلۋىن, سونداي-اق ەىدۇ ينۆەستيتسيا جونىندەگى كوميتەتىنە «قاۋىمداستىرىلعان مۇشە» رەتىندە كىرۋىن ماقۇلدادى», دەدى ج.قاسىمبەك. ونىڭ ايتۋىنشا, يننوۆاتسيا سالاسىندا وتكەن جىلى جالپى سوماسى 1,9 ملرد تەڭگەگە يننوۆاتسيالىق گرانتتار بەرۋ تۋرالى 66 كەلىسىمگە قول قويىلىپتى. حالىقارالىق تەحنولوگيالار ترانسفەرتى ورتالىعىنىڭ ىقپالىمەن قازاقستانعا شەتەلدىك تەحنولوگيالاردى ترانسفەرلەۋ بويىنشا 15 جوبانى جۇزەگە اسىرۋ قولعا الىنعان. ىرىكتەۋ ناتيجەسىندە 4 جوباعا جالپى سوماسى 800 ملن تەڭگەنىڭ يننوۆاتسيالىق گرانتى بەرىلدى. مەملەكەت باسشىسىنىڭ بيىلعى جولداۋىن جۇزەگە اسىرۋ اياسىندا اتالعان ورتالىقتىڭ 2 قاناتقاقتى جوباسىن جۇزەگە اسىرۋ جوسپارلانىپ وتىر.
مينيستر تەحنيكالىق رەتتەۋ جانە مەترولوگيا سالاسىندا ەاەو-نىڭ 40 تەحنيكالىق رەگلامەنتى بەكىتىلىپ, 35-ءى كۇشىنە ەنگەنىن مالىمدەدى. ستاندارتتاۋ جونىندەگى جوسپارعا سايكەس, 747 ۇلتتىق ستاندارت ازىرلەنگەن. قازاقستان ورتالىق ازيا اۋماعى ەلدەرى ىشىندە ءبىرىنشى بولىپ 58 ولشەۋ مالىمەتىنىڭ حالىقارالىق ستاندارتتارعا سايكەستىگىن دالەلدەپتى.
مينيسترلىك 2016 جىلى «جەر قويناۋى جانە جەر قويناۋىن پايدالانۋ تۋرالى» كودەكس جوباسىن ازىرلەدى. قازىرگى تاڭدا جۇمىس توبىنىڭ قاراۋىنداعى جوبانى جىل سوڭىنا قاراي قابىلداۋ جوسپارلانعان. كودەكستىڭ قابىلدانۋى گەولوگيالىق بارلاۋدىڭ ينۆەستيتسيالىق تارتىمدىلىعىن ارتتىرىپ, وتاندىق يۋنيورلىق كومپانيالاردى دامىتۋعا جانە قوسىمشا ينۆەستيتسيا تارتۋعا تىڭ سەرپىن بەرمەك, سونىمەن قاتار ەلدەگى الەۋمەتتىك-ەكونوميكالىق احۋالعا وڭ ىقپال ەتەدى دەپ كۇتىلۋدە.
«بىلتىر كولىك سالاسىندا قىزمەت كورسەتۋ كولەمى 3,8 پايىزعا ءوستى. لوگيستيكا تيىمدىلىگىنىڭ حالىقارالىق رەيتينگىندە قازاقستان 88-ورىننان 77- ورىنعا كوتەرىلدى, تمد-دا ۇزدىك بولدى. قىتاي – ەۋروپا – قىتاي باعىتىندا ءترانزيتتى كونتەينەرلىك تاسىمال 2 ەسە ءوسىپ, 104,5 مىڭ كونتەينەردى قۇرادى. بيىل كونتەينەرلەر سانىن 320 مىڭعا, قىتاي – ەۋروپا – قىتاي باعىتى بويىنشا 165 مىڭعا ارتتىرۋ كوزدەلىپ وتىر.
ترانزيتتىك اۆياجولاۋشىلار سانى وتكەن جىلى 250 مىڭنان 478 مىڭعا دەيىن جەتسە, 2017 جىلى بۇل ساندى 600 مىڭعا جەتكىزەمىز. نەگىزگى جولاۋشىلار لەگىن ازيادان قازاقستان ارقىلى ەۋروپاعا جانە كەرى باعىتقا قاتىنايتىندار قۇرايدى», دەدى بايانداماشى.
2016 جىلى «نۇرلى جول» باعدارلاماسى اياسىندا رەسپۋبليكالىق ماڭىزى بار 920 شاقىرىم اۆتوكولىك جولىندا جوندەۋ جۇمىستارى اياقتالعان. ونىڭ 767 شاقىرىمى پايدالانۋعا بەرىلدى. اعىمداعى جىلى بولىنگەن قارجى ەسەبىنەن 7 وتپەلى جوبانىڭ جۇمىسى جالعاسىپ (استانا – قاراعاندى, ورتالىق-شىعىس, بەينەۋ – اقتاۋ, ورتالىق – باتىس, قاپشاعاي – تالدىقورعان, استانا – پەتروپاۆل جانە ورال – كامەنكا), جىل سوڭىندا سونىڭ 602 شاقىرىمىنداعى جۇمىس اياقتالماق. «جالپى ۇزىندىعى 3,2 مىڭ شاقىرىمدى قۇرايتىن 15 جاڭا جوبانىڭ قۇرىلىسى باستالادى. ءسويتىپ, بيىل 4,4 مىڭ شاقىرىم جولعا جۇمىس جۇرگىزىپ, 100 مىڭ ادام جۇمىلدىرامىز», دەدى مينيستر.
باسقوسۋدا ءمالىم بولعانداي, بىلتىر جالپى تۇرعىن ءۇي قۇرىلىس الاڭىنىڭ فيزيكالىق كولەم يندەكسى 118 پايىزدى قۇراسا, 10,5 ملن شارشى مەتر باسپانا پايدالانۋعا بەرىلگەن. بۇل – شامامەن 90 مىڭ پاتەر. ينۆەستيتسيا كولەمى 2016 جىلى 830 ملرد تەڭگەگە جەتكەن سالادا جۇرگىزىلگەن رەفورمالار ناتيجەسىندە كاسىپكەرلەر ءۇشىن قۇرىلىس جۇرگىزۋگە رۇقسات الۋ مەرزىمى 3 ايدان 1 ايعا قىسقارىپتى. وسى كورسەتكىشتەر ناتيجەسىندە قازاقستان ەكى جىلدا بۇكىلالەمدىك بانك رەيتينگىندە 152-ورىننان 22-ورىنعا كوتەرىلدى.
ايتپاقشى, «نۇرلى جەر» تۇرعىن ءۇي قۇرىلىسى باعدارلاماسى اياسىندا 1,5 ملن تۇرعىن ءۇي سالىناتىن بولسا, سونىڭ 100 مىڭى اعىمداعى جىلدىڭ ەنشىسىنە بۇيىرىپ تۇر.
اسحات رايقۇل,
«ەگەمەن قازاقستان»
