قورقىتتىڭ دۇنيەگە كەلۋى تۋرالى عاجايىپ سىرعا تولى شاقتى اڭىز-اڭگىمەمەن وربىتە وتىرىپ, قازاق حالىق اسپاپتارى وركەسترى كۇيمەن كەزەكتەستىرە جىرلادى. ەل مەن جەر, ولىم مەن ومىر, ماڭگى باقىت, وشپەس ەرلىك تۋرالى سىر شەرتەتىن قورقىت اتا كۇيلەرىنىڭ شىعۋ تاريحىنا بايلانىستى وقيعالىق قويىلىم اجالمەن ايقاسقان الىپ رۋحاني تۇلعا كەلبەتىن اشا ءتۇستى. قورقىت وبرازىنىڭ ەل بىرلىگىن نىعايتقان كەمەڭگەر قايراتكەر, تۇركى دۇنيەتانىمىنىڭ نەگىزىن جاساعان عۇلاما ويشىل, الەمدىك اقىل-وي مادەنيەتىندە وزىندىك ورنى بار فيلوسوف-گۋمانيست رەتىندە بەينەلەنۋى قويىلىم مازمۇنىن بايىتا تۇسكەن.
يەن دالادا جالعىزىنىڭ ارتىندا قالعان انا مەن يەسىنەن ايرىلعان تازى – قوس مۇڭلىق قوسىلىپ كۇڭىرەنەدى. قورقىتتىڭ وسى وقيعاعا ايلانىستى شىعارعان كۇيى «ۇشاردىڭ ۇلۋى» كۇيىمەن جالعاستى. پەرزەنتىنە دەگەن ىستىق ماحابباتىن كۇي تىلىمەن سويلەتكەن داناگويدىڭ ء«اۋپپاي» كۇيى زالدى الديگە بولەدى.
قورقىت ءرولىن قر جاستار وداعى سىيلىعىنىڭ لاۋرەاتى نۇراي تاناباەۆ سومدادى. قورقىت كۇيلەرىن وركەستر رەپەرتۋارىنا لايىقتاپ, نوتاعا تۇسىرگەن – رەسپۋبليكالىق بايقاۋلاردىڭ لاۋرەاتى, كومپوزيتور ارمان جايىموۆ.
بۇدان باسقا كوپتەگەن مۋزىكالىق-تەاترلىق باعدارلامالاردى ۇيلەستىرۋدە تاجىريبەسى مول قر ەڭبەك سىڭىرگەن قايراتكەرى, پروفەسسور ايتقالي جايىموۆ ادامگەرشىلىك پەن مادەنيەتتىلىككە تاربيەلەۋدە مۋزىكانىڭ ءرولى ايرىقشا دەگەندى ايتادى.
–قورقىت ءومىرى كوز الدىمىزدان ءوتتى. دايىندىق بارىسىندا قوبىزبەن عانا ورىندالىپ كەلگەن تۋىندىلارىن ارنايى وركەسترگە تۇسىردىك. كوپتەن بەرى ورىندالماي جۇرگەن شىعارمالارىن قايتا جاڭعىرتىپ, كورەرمەن نازارىنا ۇسىندىق. استانامەن بىرگە جاساسىپ كەلە جاتقان كاسىبي ونەر ۇجىمدارىنىڭ ءبىرى – قازاق حالىق اسپاپتارى وركەسترى 1997 جىلى قۇرىلعان. بۇگىندە وركەستر قۇرامىندا 70 مۋزىكانت بار, – دەيدى فيلارمونيانىڭ قازاق حالىق اسپاپتارى وركەسترىنىڭ كوركەمدىك جەتەكشىسى ءارى باس ديريجەرى ايتقالي جايىموۆ.
جىر-تولعاۋلارىمىزدى جاڭاشا لەپپەن ساحنالاپ جۇرگەن فيلارمونيا ۇجىمى حالىقارالىق كورمە اياسىندا قازاقستان حالىق كومپوزيتورلارىنىڭ ءان-كۇيلەرى مەن شەتەل كومپوزيتورلارىنىڭ شىعارمالارى قامتىلعان جيىرمادان استام كونتسەرت وتكىزۋدى جوسپارلاپ وتىر.
ايا ءومىرتاي,
«ەگەمەن قازاقستان»
