بالالاردىڭ مەرەكەلىك كونتسەرتتىك باعدارلاماسىن تاماشالاعان ايماق باسشىسى ەلباسىنىڭ اتىنان وسىنداعى تاربيەلەنۋشىلەرگە ۆەلوسيپەد, تەلەديدار جانە وزگە دە سىيلىقتار مەن ەكسپو-2017 حالىقارالىق كورمە بيلەتتەرىن تاپسىردى.
«بالالار مەرەكەسىنە وراي سىزدەرگە ادەيى كەلىپ وتىرمىن. بالا-ءبىزدىڭ بولاشاعىمىز. سوندىقتان ەلىمىزدىڭ ەرتەڭگى تىرەگى بولاتىن سەندەردىڭ بولاشاقتارىڭدى باياندى ەتۋ ءبىزدىڭ پارىز. سىزدەر ءۇمىتتى اقتاپ, ساباقتى جاقسى وقيتىندارىڭىزعا, ۇلگىلى دە ءتارتىپتى بالا بوپ وسەتىندەرىڭىزگە سەنىمىم مول. ەلباسىمىز باسەكەگە قابىلەتتى بولۋ ءۇشىن ەڭ الدىمەن ءبىلىمدى بولۋدى ايتقان بولاتىن. ياعني, ءبىلىمدى بولۋمەن قاتار, دۇرىس تاربيە دە الۋىمىز قاجەت. تاربيەسىز ءبىلىم – سۋسىز ديىرمەن»,-دەدى ايماق باسشىسى.
90 جىلدان استام تاريحى بار وتباسى ۇلگىسىندەگى بالالار ۇيىنەن اتاقتى عالىمدار مەن جازۋشىلار, ۇلت ماقتانىشىنا اينالعان باتىرلار, بەلگىلى قوعام قايراتكەرلەرى مەن كەڭەس وداعىنىڭ باتىرلارى بەيسەن وڭتاەۆ, سادىق يسمايلوۆ, بەرگەن يساحانوۆ, ناعي ءىلياسوۆ, يۆان جۋربالار ۇشسا, قازاقتىڭ بەلگىلى جازۋشىسى, ساتيريك, دراماتۋرگ سادىقبەك ادامبەكوۆ پەن ەسىمى بەرىلگەن تولەگەن تاجىباەۆ تا وسىندا ءتالىم-تاربيە العان.
مۇنىمەن قوسا اكىم وسى بالالار اۋىلىنان 5 جەتىمدى اسىراپ الىپ وتىرعان ديقانباەۆتار وتباسىنا العىسىن ءبىلدىرىپ, وزىنىكىمەن قوسقاندا 9 بالالى-شاعالى بولعان ۇلكەن وتباسىعا تەلەديدار مەن بارىپ كەلۋ شىعىنى قاراستىرىلعان ەكسپو-2017 حالىقارالىق كورمەسىنىڭ بيلەتىن تارتۋ ەتتى.
وسى جىلدار ىشىندە ۇيادان ۇشقان ءۇش مىڭعا جۋىق تاربيەلەنۋشى ومىردەن ءوز باقىتىن تاپقان. بۇگىندە مۇندا 72 بالا تاربيەلەنۋدە. ولاردىڭ ءار قايسىسى ءتۇرلى ۇلتتان بولعانىمەن بارلىعى ءبىر تىلدە ياعني, قازاق تىلىندە سويلەيدى. بىرنەشە ءتىلدى مەڭگەرگەن بالالار ءبىر-بىرىنەن وتكەن ونەرلى دە سۇلۋ ءارى تاربيەلى.
