شەرۋدىڭ اشىلۋ سالتاناتىندا ءسوز العان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ بالالاردى مەرەكەمەن قۇتتىقتاپ, بولاشاق ۇرپاققا بەرىلەتىن ءبىلىم مەن تاربيەنىڭ ماڭىزدىلىعىنا توقتالدى.
«وڭتۇستىكتە سوڭعى جىلدارى بالا سانىنىڭ ارتا ءتۇسۋى ءبىزدى ايىرىقشا قۋانتىپ وتىر. 2016 جىل 80 مىڭعا جۋىق نارەستەنىڭ دۇنيەگە كەلىپ, ايماعىمىز دەموگرافيالىق كورسەتكىشتەرمەن كوش باستادى. وڭىردە مەكتەپ جاسىنداعى بالالار سانى 611 مىڭنان اسا وقۋشىنى قۇراپ, رەسپۋبليكالىق كورسەتكىشتىڭ 21 پايىزىنا جەتتى. سونىمەن بىرگە جىل سايىن مەكتەپتەردەگى وقۋشىلار سانى شامامەن 30 مىڭعا ارتۋدا. وسىعان وراي, الداعى 5 جىلدا 205 جاڭا مەكتەپتىڭ قۇرىلىسىن جۇرگىزۋدى جوسپارلاپ وتىرمىز», - دەدى جانسەيىت قانسەيىت ۇلى.
بۇگىنگى تاڭدا وبلىستا ونەرلى جاستاردىڭ شابىتىن شىڭدايتىن 26 ارنايى مەكتەپ قىزمەت جاسايدى. ولاردا 15 مىڭعا جۋىق وقۋشى ءبىلىم الۋدا. ءدال مۇنداي مۋزىكا مەكتەبى وزگە ەشبىر مەملەكەتتە جوق. اتالعان وقۋ ورىندارىنىڭ جەتىستىگى دە كوڭىل قۋانتادى. ءوڭىردىڭ ونەرلى ورەندەرى 6 مارتە رەسپۋبليكالاق سايىستاردا باس جۇلدە جەڭىپ السا, 9 مارتە حالىقارالىق جارىستاردىڭ جەڭىمپازى اتانعان. اتاپ ايتساق, وتىرار اۋدانى ساز مەكتەبىنىڭ وقۋشىسى باعداۋلەت نۇرلان ۇلى تۇركياداعى ەكسپو-2016 حالىقارالىق «بالالار جانە گۇلدەر» بايقاۋىنىڭ 1-ورىن يەگەرى, - بايدىبەك اۋدانى ساز مەكتەبىنىڭ وقۋشىسى سىزدىق اسان تۇركياداعى حالىقارالىق «بالا الەمى» بايقاۋىنىڭ گران-پري يەگەرى, شىمكەنت قالاسى №1 ساز مەكتەبىنىڭ وقۋشىسى مۋرين نيكولاي فراۋچي اتىنداعى 13-ءشى حالىقارالىق كونكۋرستىڭ 1-ءشى ورىن يەگەرى اتاندى.
«شابىت شەرۋى» ءىس-شاراسى ەلباسى نۇرسۇلتان نازارباەۆتىڭ «ماڭگىلىك ەل» جالپىۇلتتىق يدەياسىن ىسكە اسىرۋ ماقساتىندا قولعا الىنىپ وتىر. بۇل كۇنى وبلىستىق اكىمشىلىك ىسكەرلىك ورتالىعىنىڭ الاڭىندا بارابانشىلار وتريادى, ۇرمەلى اسپاپتار وركەسترى مەن انسامبلدەر, ماجورەتكالار, چەرليدەرلەر, حور جانە بي ۇجىمدارى ءجۇرىپ ءوتتى.
بۇل شارا العاش رەت وتكىزىلىپ وتىرعاندىقتان, رەسپۋبليكانىڭ مادەني ومىرىندە بىرەگەي وقيعا بولىپ ەسەپتەلەدى. قىزىقتى رەپەرتۋار, مۋزىكالىق ينسترۋمەنتتەردىڭ ارتۇرلىلىگى, شىعارمالاردىڭ تۇپنۇسقالىعى, بىرنەشە تۇردەگى مۋزىكالىق قىزمەتتىڭ بىرىگىۋى مۋزىكالىق-تەاترلاندىرىلعان شەرۋ مەرەكەلىك قالىپ تۋدىرىپ, اسەرلى تىنىس بەردى.
شاراعا وبلىس ورتالىعىنداعى بارلىق مەكتەپ وقۋشىلارى قاتىستى. ءار ءبىلىم وشاعىنىڭ بالالارى ءجۇرىپ وتكەن كەزدە سول مەكتەپتىڭ جەتىستىكتەرى ايتىلدى. بۇل جاس بۋىننىڭ بويىندا ماقتانىش سەزىمىن تۋدىرىپ, ولاردىڭ وتانسۇيگىشتىك رۋحىن وياتارى ءسوزسىز.
