– ازامات مىرزا, كوماندا قاي جىلى وتاۋ تىكتى؟
– ول جايلى تەرەڭنەن ايتار بولساق, تيميريازەۆ اۋدانىندا ەگىنشىلىكپەن اينالىساتىن شارۋا قوجالىعىنىڭ باسشىسى قايىربەك ءحامزيندى الدىمەن اۋىزعا الارىمىز زاڭدى. ويتكەنى, قايىرىمدى ءىسى مول, ساۋاپتى شارالاردان ەش تارتىنبايتىن ايتۋلى ازامات جەرگىلىكتى ۆولەيبولشى قىزدارعا ۇنەمى قولداۋ كورسەتىپ, قارجىلىق دەمەۋ جاساپ ءجۇردى. 2010 جىلى وبلىستىق دەڭگەيدەگى مىقتىلار ساناتىنا قوسىلۋ كەرەك دەگەن يدەياعا باستاماشى بولىپ, «قۋانىش جانە ك» كومانداسىن قۇردى. ونىڭ قۇرامىنا اقسۋات, ستەپنوە, تيميريازەۆو, دميتريەۆكا ەلدى مەكەندەرىنەن سپورتقا بەيىمى بار 7-8 سىنىپ وقۋشىلارى تارتىلدى. ول كەزدە مەن اۋداندىق بالالار جانە جاسوسپىرىمدەر مەكتەبىندە جاتتىقتىرۋشى جانە گيمنازيا مەكتەپ-ينتەرناتتا دەنە شىنىقتىرۋ ءپانىنىڭ مۇعالىمى بولىپ ىستەيتىنمىن. ارادا ءۇش جىل وتكەننەن كەيىن 1995 جىلى تۋعاندار اراسىندا وبلىستا جەڭىستىڭ ەڭ بيىك تۇعىرىنا كوتەرىلدىك. اقتىق باسەكەدە ازۋلى قارسىلاستارىمىزدىڭ ءبىرى – قىزىلجار اۋدانىنىڭ كومانداسىن ۇتىپ, چەمپيوندىق ءتاجدى قانجىعامىزعا وڭگەردىك.
بۇگىندە كوماندا وبلىستىق بيۋدجەت ەسەبىنەن قارجىلاندىرىلاتىنىنا قاراماستان, قايرەكەڭ دەمەۋشىلىكتەن قول ۇزگەن جوق. ول قازىر «قۋانىش» دەگەن اتاۋعا يە ۆولەيبول كومانداسىنىڭ ديرەكتورى رەتىندە رەسەيدە وتەتىن جارىستارعا جۇيەلى قاتىسۋىمىزعا, سپورتتىق كيىمدەرمەن, قۇرال-جابدىقتارمەن قامتاماسىز ەتىلۋىمىزگە جان-جاقتى قامقورلىق كورسەتىپ ءجۇر. ۇلتتىق ليگاعا وتۋىمىزگە ول كىسى زور ەڭبەك ءسىڭىردى.
– بايراقتى باسەكەلەرگە قاي كەزدەن باستاپ قاتىسىپ كەلەسىڭدەر؟
– العاش رەت جولىمىز 2011 جىلى ءتۇستى. ەكىباستۇز قالاسىندا 1994-95 جىلى تۋعاندار اراسىندا قازاقستان كۋبوگى ءۇشىن وتكەن جارىستا ۆ. شمەلەۆ باپتاپ اپارعان كوماندا جاقسى قىرىنان تانىلدى. ال مەنىڭ جاتتىقتىرۋىمداعى كوماندا (1996-97 جىلى تۋعاندار) ءبىرىنشى ورىندى ەنشىلەدى. رەسەيدەن دە شاقىرتۋلار از ەمەس. ولاردىڭ ىشىندە ەڭ ايتۋلىسى – ورىنبور وبلىسىندا ۇيىمداستىرىلاتىن «سول-يلەتسك» حالىقارالىق تۋرنيرىنە ۇزبەي قاتىسىپ كەلەمىز. كۇمىس جۇلدەگەر بولدىق.
2012/13 جىلعى ماۋسىمدا جوعارى ليگانىڭ «ۆ» توبىندا ونەر كورسەتىپ, 3-ءشى ورىندى يەلەندىك. 2014 جىلى تەمىرتاۋدىڭ «مەتاللۋرگىنەن» ءبىر ۇپاي ارتىق ەنشىلەپ, چەمپيون اتاندىق. «ا» توبىندا 5-ءشى, كەيىن 3-ءشى ورىنعا تۇراقتادىق. ال, جۋىردا اياقتالعان ححV رەسپۋبليكالىق چەمپيوناتتا ءبىر عانا جەڭىلىس تاپتىق. وسىلايشا, ۇلتتىق ليگادا ونەر كورسەتۋ مارتەبەسىن يەلەندىك. مۇندا «التاي», «ەرتىس», «جەتىسۋ» سەكىلدى وتە تەگەۋرىندى كوماندالارمەن كۇش سىناسۋعا تۋرا كەلەدى.
– وزىندىك ويىن ورنەگىمەن ەرەكشەلەنىپ جۇرگەن بۇرىمدى ۆولەيبولشىلاردى اتاي كەتسەڭ؟
– ۆولەيبول كوماندالىق ويىن بولعاندىقتان, ءار ويىنشىنىڭ ءوز ورنى بار. دەسەك تە, پولينا كوستيۆا, نۇريلا اقجانوۆا, مارگاريتا بەلچەنكو, فاريدا رامازانوۆا, سالتانات قوشقارباەۆانىڭ ەسىمدەرى كوماندانىڭ ىرگەتاسىن قالاۋشىلاردىڭ قاتارىندا ۇلكەن ماقتانىشپەن اتالادى. بۇلار سوڭعى ەل بىرىنشىلىگىندە دە تاماشا ويىن مانەرىمەن تانىلدى. اينۇر ەسەنتاەۆا, اناستاسيا نازاروۆا دا بولاشاعىنان مول ءۇمىت كۇتتىرەدى. ولەسيا ۆاركەنتين, ۆالەريا ارتاموشينا جاسوسپىرىمدەر قۇراماسىندا جاقسى قىرىنان تانىلىپ ءجۇر. ازيا بىرىنشىلىكتەرىنە قاتىسىپ قايتتى. پولينا بيىل جاستار قۇراماسى ساپىندا تايلاندتا وتەتىن ازيا چەمپيوناتىنا بارادى.
– سپورتقا مامانداندىرىلعان وبلىستىق مەكتەپ-ينتەرنات جانىنان ۆولەيبول بولىمشەسى اشىلعالى كوماندا رەزەرۆتىك جاعىنان نىعايا تۇسكەن سەكىلدى.
– دۇرىس ايتاسىز, بۇگىندە نەگىزگى ماتەريالدىق بازامىز وسىندا ورنالاسقان. قازىر مۇندا جاس ەرەكشەلىكتەرىنە بايلانىستى ءۇش توپ جاتتىعادى. ولاردى رۋسلان مالدىباەۆ, ۆلاديمير پەرەپەچين جانە مەن باپتايمىز. بولىمشەدە ءوڭىردىڭ ءار قيىرىنان كەلگەن 30-عا جۋىق قىز بالا ۆولەيبولدىڭ قىر-سىرىنا ۇيرەنەدى. وعان 7-سىنىپتان باستاپ قابىلدانادى. نەگىزگى قۇرامادا ويناپ جۇرگەن ولەسيا ۆاركەنتين, نارعىز ورتانوۆا, كريستينا سوروكينا, ديلبارا امانوۆا وسى بولىمشەنىڭ تۇلەكتەرى.
– تومەنگى سىنىپتاردان قابىلداۋعا بولماي ما؟
– رەسەيدە ءبىرىنشى سىنىپتان قابىلدايدى. ءبىز ماسەلەنى ءتيىستى ورىندار الدىنا قويىپ, وڭتايلى شەشىلۋىنە كۇش سالىپ جاتىرمىز.
– اڭگىمەڭە راحمەت. جەڭىستى بيىكتەردەن كورىنە بەرىڭدەر!
– ايتقانىڭىز كەلسىن! كۇزدە قازاقستان كۋبوگى ءۇشىن تارتىس باستالادى. قازىر سوعان دايىندالۋدامىز. 2015 جىلدان بەرى عانا كاسىبي كلۋب ساناتىندامىز. تاجىريبەنىڭ ازدىعىنا قاراماستان, ۇلتتىق ليگادا دا نامىستى قولدان بەرمەۋگە تىرىسامىز.
اڭگىمەلەسكەن
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
