ەلىمىزدىڭ ءاربىر تۇرعىنى ساۋساق ىزدەرىن تاپسىرۋعا مىندەتتى

پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «داكتيلوسكوپيالىق جانە گەنومدىق تىركەۋ تۋرالى» زاڭ جوباسىن ءبىرىنشى وقىلىمدا ماقۇلدادى. «زاڭ جوباسىندا داكتيلوسكوپيالىق جانە گەنومدىق تىركەۋدى جۇرگىزۋدىڭ قۇقىقتىق نەگىزدەرى بەلگىلەنگەن. سونىمەن قاتار, وسى جوبادا تىركەۋدەن الىنعان اقپاراتتى ادامنىڭ جەكە باسىن راستاۋ جانە سايكەستەندىرۋ ءۇشىن پايدالانۋ ماسەلەلەرى دە ناقتى كورسەتىلىپ وتىر», – دەدى زاڭ جوباسى بويىنشا بايانداما جاساعان ىشكى ىستەر ءمينيسترى قالمۇحانبەت قاسىموۆ. زاڭ جوباسىنىڭ ماقساتى – داكتيلوسكوپيالىق جانە گەنومدىق اقپارات نەگىزىندە ادامنىڭ تۇلعاسىن سايكەستەندىرۋدى ناقتىلاۋدىڭ قۇقىقتىق نەگىزدەرىن بەكىتۋ. كورسەتىلگەن مىندەتتەرگە سايكەس, مەملەكەتتىك داكتيلوسكوپيالىق جانە گەنومدىق تىركەۋدىڭ قۇقىقتىق نەگىزدەرىن, نەگىزگى تۇسىنىكتەردى, ۇستانىمداردى, اقپاراتتى جيناۋ مەن وڭدەۋگە ءتيىستى تالاپتاردى ايقىنداۋ ەسكەرىلگەن. داكتيلوسكوپيالىق اقپارات تۇرعىسىندا ادام قولى ساۋساقتارى پاپيلليارلى ورنەكتەرىنىڭ قۇرىلىسى تۋرالى بيومەتريكالىق مالىمەتتەر قامتىلادى. بۇل ءوز كەزەگىندە ادامدى جانە ونىڭ جەكە مالىمەتتەرىن انىقتاۋعا مۇمكىندىك بەرەدى. گەنومدىق اقپارات دەگەنىمىز, بۇل ادام دنق-سىنىڭ بەلگىلى ءبىر فراگمەنتى تۋرالى كودتالعان دەرەكتەردى جينايدى. زاڭ جوباسىندا داكتيلوسكوپيالىق جانە گەنومدىق تىركەۋگە جاتاتىن تۇلعالاردىڭ توبى, سونداي-اق, ونى جينايتىن جانە ساقتاۋعا جاۋاپتى مەملەكەتتىك ورگانداردىڭ تولىق تىزبەسى انىقتالادى. 1992 جىلى قازاقستان قۇجاتتاردىڭ بيومەتريكالىق پارامەترلەرى تۋرالى حالىقارالىق كەلىسىمدى راتيفيكاتسيالادى. قازىرگى كەزدە تۇلعانى كۋالاندىراتىن 11 قۇجاتتىڭ جەتەۋىندە بيومەتريكالىق كورسەتكىشتەردى ەنگىزۋ قاراستىرىلادى. ءبىزدىڭ تولقۇجاتتار مەن جەكە كۋالىكتەردە ەلەكتروندى چيپتەر بەكىتىلگەن, بۇلار ارقىلى بيومەتريكالىق مالىمەتتەردى ەنگىزۋگە بولادى. داكتيلوسكوپيكالىق تىركەۋ تولقۇجات پەن جەكە كۋالىكتى نەمەسە تەڭىزشىنىڭ جەكە كۋالىگىن راسىمدەۋ كەزىندە ىسكە اسىرىلادى. بالالار 12-دەن 16 جاسقا دەيىن تولقۇجات العان كەزدە ولار ءوز ەركىمەن نەمەسە اتا-اناسىنىڭ كەلىسىمىمەن داكتيلوسكوپيكالىق تىركەۋگە جاتادى. 12 جاستان كىشى بالالار بۇنداي تىركەۋمەن قامتىلمايدى. سونىمەن قاتار, شەتەلدىكتەر ۆيزا العان كەزدە ساۋساق ىزدەرىن تاپسىراتىن بولادى. بۇدان بولەك, داكتيلوسكوپيكالىق تىركەۋ بوسقىندارعا, ەڭبەك ميگرانتتارىنا, قازاقستاندا تۇراتىن شەتەلدىكتەرگە قاتىستى ەسكەرىلىپ وتىر.