سۇرانىستى مەملەكەتتىك تىلدە تولتىرماۋ – قيسىنسىز

بۇعان دەيىن حابارلانعانىنداي, پارلامەنت ءماجىلىسىنىڭ سوڭعى وتىرىسىندا باسقا ماسەلەلەرمەن قاتار, مەملەكەتتىك الەۋمەتتىك تاپسىرىس ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى زاڭ جوباسى تالقىلانىپ, ماقۇلداندى. بۇل ازاماتتىق قوعامدى دامى­تۋ­عا وزىندىك ۇلەس قوسىپ, الەۋ­مەت­تىك ماسەلەلەردىڭ ءبىرتالاي قىر­لا­رىن شەشىپ جۇرەتىن ۇەۇ-لاردى مەم­لەكەت تاراپىنان قولداۋعا ءمۇم­كىندىك بەرەتىن زاڭ جوباسى بو­لا­تىن. سوندىقتان دا قوعامى­مىز­دا وعان دەگەن قىزىعۋشىلىق ۇلكەن ەكەنى ءسوزسىز. زاڭ جوباسى بويىنشا بايان­دا­مانى مادەنيەت ءمينيسترى مۇحتار قۇل-مۇحاممەد جاسادى. ول بۇل زاڭنامالىق قۇجاتتى ازىرلەۋگە پار­لامەنت دەپۋتاتتارىنىڭ, ءجۇز­دەگەن ۇەۇ جەتەكشىلەرىنىڭ, حا­لىق­ارالىق ۇيىمدار وكىلدەرىنىڭ بەل­سەنە قاتىسقانىن اتاپ ءوتتى. ودان ءارى نەگىزگى وزگەرىستەرگە توق­تال­دى. زاڭ جوباسى, دەدى ول, ەڭ الدىمەن ۋاكىلەتتى ورگاننىڭ قىز­مەتىن انىقتاعان. مەملەكەتتىك الەۋ­مەتتىك تاپسىرىس جۇيەسىن ءتۇپ­كىلىكتى وزگەرتىپ, ونىڭ جۇمىس­تا­رىن ۇيلەستىرەتىن مەملەكەتتىك ور­گان­داردىڭ قوسىمشا تەتىگىن انىق­تايدى جانە ونىڭ ورىندالۋىنىڭ مونيتورينگىن ەنگىزەدى, دەدى مينيستر. سونىمەن بىرگە, ول زاڭ جو­باسىندا الەۋمەتتىك باعدارلاما جانە جوبا جونىندە ناقتى ءتۇ­سى­نىكتەر ەنگىزىلگەنىن ايتتى. بۇل ءتۇ­سى­نىكتەر ۇزاق مەرزىمدى جوبا­لار­دىڭ, سونداي-اق وسى جوبالاردىڭ شەڭبەرىنەن شىعاتىن باستامالار­دىڭ ىسكە اسىرىلۋىنا مۇمكىندىك بەرەدى. مينيستر باسقا دا ەرەكشەلىكتەر تۋرالى ايتىپ ءوتتى. سونىڭ ءىشىن­دە مەملەكەتتىك تاپسىرىس ەندى تەك سالالىق ۋاكىلەتتى ورگاننىڭ قۇ­زىرلارى شەڭبەرىندە عانا اتقا­رى­لاتىن بولادى.  مۇنىڭ ءمانىسى, بۇرىن مەملەكەتتىك الەۋمەتتىك تاپ­سىرىس تەك مادەنيەت مينيسترلىگى ارقىلى بەرىلسە, ەندى بۇل ىسپەن سالالىق ۋاكىلەتتى ورگاندار اينالىسادى. ماسەلەن, ەكولوگيانى جاقسارتۋعا بايلانىستى ۇسىنىل­عان جوبالار قورشاعان ورتانى قورعاۋ مينيسترلىگىندە قارالادى. بايانداما اياقتالعان سوڭ مينيسترگە بىرنەشە سۇراق قويىلدى. سونىڭ ىشىندە دەپۋتات ۆ.نەحوروشەۆ: زاڭ جوباسى مەملەكەتتىك قا­راجاتتى قىمقىرۋدى ازايتۋعا ىق­پال ەتە الا ما,  كونكۋرستىق نەگىزدە الەۋمەتتىك تاپسىرىس ءبولىن­گەن­دە كوميسسيانىڭ باسىندا باستىق­تىڭ ادامى وتىرىپ, جەڭىستى «ءوز­دە­رىنىڭ ادامدارىنا» الىپ بەرەتىنىن ءبىز بىلەمىز. وكىنىشكە قاراي, بىزدە نە ۇرلايدى, نە قىمقىرادى. ەندى بارلىق مينيسترلىك وسىمەن اينا­لىساتىن بولىپتى. «ناشار پيانينو بولسا, جامان وينادىڭ دەپ ءپيانيستى اتىپ تاستاعاننان پايدا جوق» دەگەن ءسوز بار, سول سياقتى كون­كۋرستى وتكىزۋ تەحنولوگياسىن وزگەرتپەسەك, قانداي مونيتورينگ جاساساق تا  الەۋمەتتىك تاپسىرىس­تى كىمدەر ۇتاتىنى بەلگىلى. تەح­نولوگيانى وزگەرتۋ جونىندە سىزدە قانداي ۇسىنىس بار؟ سونىمەن بىرگە, ءسىزدىڭ بولجامىڭىز بويىنشا وسى زاڭ جوباسى ۇەۇ كاسىبيلىگىن ارتتىرۋعا قانشالىقتى كومەكتەسە الادى؟ – دەگەن ساۋالدار تاستادى. بۇل سۇراققا: مەملەكەتتىك قا­را­جاتتىڭ قىمقىرىلۋى جانە ونى بولدىرماۋدىڭ جولدارى جونىندە قۇقىق قورعاۋ سالاسىنىڭ مامان­دا­رى بولماسا, مادەنيەت ءمينيسترى رە­تىندە مەن ەشتەڭە ايتا الماي­مىن. ەكىنشى سۇراعىڭىزعا باي­لا­نىس­تى ايتاتىن بولسام, بۇرىن ۇەۇ-لارمەن بايلانىستار جاقسى جولعا قويىلعانىمەن, ولاردىڭ كوتەرگەن ماسەلەلەرىنىڭ قانشا­لىق­تى تيىمدىلىگىن مادەنيەت مينيسترلىگى ايىرا بەرمەيتىن. ەندى سا­لالىق مينيسترلىكتەر ولاردىڭ ۇسىنىستارىن جاقسى تانىپ, سو­لار­دىڭ ىشىندەگى تيىمدىلىگى ۇلكەن­دەرىن دۇرىس تاڭدايتىن بولادى. مۇنىڭ ءوزى سايىپ كەلگەندە ۇەۇ كاسىبيلىگىن ارتتىرا تۇسەر دەگەن ءۇمىت بار, دەپ جاۋاپ قايتاردى مينيستر. دەپۋتات باقىت سىزدىقوۆا جاستار قوزعالىسى باسشىلارىنىڭ ءبىرى ەكەنىن ايتىپ, وسى سالانىڭ پروبلەمالارىنا توقتالدى. جاستار ۇيىمدارىنىڭ ءتيىمدى جۇمىس ىستەۋىنە مەملەكەتتىك الەۋمەتتىك تاپسىرىس ارقىلى بولىنەتىن قارا­جات­ مۇمكىندىك بەرە قويمايدى. ءويت­كەنى, كونكۋرس ءساۋىر ايىندا عانا وتكىزىلەدى, ال قاراشادا ونىڭ ەسەبىن بەرۋ كەرەك. قالعان ۋاقىت­تاردا جاستار ۇيىمدارى قاراجات بولماعاندىقتان, ءوز جۇمىستارىن جۇرگىزە المايدى. سوندىقتان مەن ۇزاق مەرزىمدى قارجىلاندىرۋ ءما­سە­لەسى قاراستىرىلا ما دەپ سۇ­رايىن دەپ ەدىم, دەدى ول.  كەلەسى سۇ­راعىندا كونكۋرستىق قۇجات­تار­دى قازاق تىلىندە تولتىرۋدى تالاپ ەتۋدى قيىنسىناتىنىن جەتكىزدى. دۇرىس تولتىرمادىڭ دەگەن سىل­تاۋ­مەن كەيدە قۇجاتتارىمىزدى ءوت­كىز­بەي تاستايدى, دەدى ب.سىزدىقوۆا. بۇل سۇراقتارعا دا تولىمدى جاۋاپ بەرىلدى. ۇزاق مەرزىمدى قار­جىلاندىرۋ ماسەلەسىن زاڭ قا­بىل­دانعاننان كەيىن سونىڭ نەگىزىندە شىعاتىن زاڭنامالىق نورماتيۆتەر ارقىلى رەتتەۋگە بولادى, دەدى مينيستر. ال قۇجاتتاردى قازاق تىلىندە تولتىرۋدى قيىنسىنعان سۇراققا وراي: ەگەر ۇەۇ-لار مەملەكەتتىك ورگان ارقىلى مەملەكەتتىك بيۋد­جەت­تەن قاراجات سۇراپ تۇرىپ, قۇ­جات­تى مەملەكەتتىك تىلدە تول­تى­رۋ­دى قيىنسىناتىن بولسا, ول ەش­قان­داي قيسىنعا كەلمەيدى, دەپ جاۋاپ قايتاردى. جاقسىباي سامرات.