اقتوبە قالاسىنداعى ءوزىنىڭ اتىنداعى كوشە مەن اساۋ باراق كوشەسى قيىلىسىنداعى الاڭدا تاۋەلسىزدىكتىڭ 25 جىلدىعىنا ارنالعان «جۇلدىزدى 25 جىل» شاراسى اياسىندا مەديتسينا عىلىمدارىنىڭ كانديداتى, پروفەسسور اجماعي سماعۇلوۆتىڭ ەسكەرتكىشى اشىلدى.
ەسكەرتكىشتى قالا اكىمى ءىلياس يسپانوۆ, عالىمنىڭ زايىبى ءماريا ايتماعانبەتوۆا جانە م.وسپانوۆ اتىنداعى باتىس قازاقستان مەديتسينالىق ۋنيۆەرسيتەتىنىڭ پرورەكتورى تيمۋر جاركەنوۆ سالتاناتتى تۇردە اشتى.
سالتاناتتى شارادا ءسوز العان تيمۋر جاركەنوۆ عالىمنىڭ سول كەزدەگى اقتوبە مەملەكەتتىك مەديتسينا ينستيتۋتىندا قىزمەت ەتكەن جىلدارى رەسپۋبليكاداعى ۇلگىلى وقۋ ورىندارىنىڭ قاتارىنان كورىنگەنىن, ءوزىن ءبىلىمدى دە بىلىكتى باسشى, شەبەر ۇيىمداستىرۋشى رەتىندە تانىتقانىن جەتكىزدى. الماتى مەملەكەتتىك دارىگەرلەردىڭ ءبىلىمىن جەتىلدىرۋ ينستيتۋتىندا رەنتگەنولوگيا جانە راديولوگيا كافەدراسىنىڭ مەڭگەرۋشىسى بولعانىنا, 25 جىلعا جۋىق اقتوبە مەملەكەتتىك مەديتسينا ينستيتۋتىنىڭ رەكتورى قىزمەتىن اتقارعانىنا, ونىڭ شاكىرتتەرىنىڭ ەلىمىزدىڭ تۇكپىر – تۇكپىرىندە, الىس – جاقىن شەتەلدەردە جەمىستى ەڭبەك ەتىپ جاتقانىنا ايرىقشا توقتالدى. جوعارى وقۋ ورنىنىڭ ماتەريالدىق – تەحنيكالىق بازاسىن نىعايتىپ, ءۇش وقۋ كورپۋسىن, 4 جاتاقحانا, پروفيلاكتوريا, ستۋدەنتتەردىڭ دەمالىس لاگەرىن سالعىزعانىن اتاپ ءوتتى. سونداي – اق, وسى كەزەڭدە مەدبيكە ءىسى, پەدياتريا, دارىگەرلەر ءبىلىمىن جەتىلدىرۋ فاكۋلتەتتەرىن اشقانىن, جاس عالىمداردى دايارلاۋعا ەلەۋلى ۇلەس قوسقانىن ەسكە الدى.
مەديتسينا سالاسىنىڭ ارداگەرى ىزباسقان ايماعانبەتوۆ ءسوز الىپ, ەسكەرتكىش بەلگىنىڭ ورناتىلۋىنا مۇرىندىق بولعان ءا.سماعۇلوۆتىڭ شاكىرتى «دارۋ» وڭالتۋ ورتالىعى» جشس ديرەكتورى عالىمجان ەلەۋدىڭ ەڭبەگىن اتاپ ءوتتى. عالىمنىڭ قىزى, مەديتسينا عىلىمدارىنىڭ كانديداتى عازيزا سماعۇلوۆا وسىنداي تاعىلىمدى ىسكە قولداۋ كورسەتكەن ءوڭىر باسشىسىنا پەرزەنتتىك العىس سەزىمىن ءبىلدىردى.
وتىز جىلدان استام تەمىرجول اۋرۋحاناسىندا دارىگەر بولىپ ەڭبەك ەتكەن ءا.سماعۇلوۆتىڭ جارى ءماريا يماندوسقىزى ەلىنە
ادال قىزمەت ەتكەن جولداسىنىڭ ەڭبەگىن باعالاپ, اقتوبە قالاسىنان ءبىر كوشەنىڭ اتى بەرىلگەنىنە ەسكەرتكىش ورناتۋعا اتسالىسقان بارشا ازاماتتارعا, شاكىرتتەرىنە, قىزمەتتەس دوستارىنا العىس ايتتى.
شارا بارىسىندا عالىمنىڭ ەسكەرتكىشىنە گۇل شوقتارى قويىلدى.
ساتىبالدى ءساۋىرباي,
«ەگەمەن قازاقستان».
سۋرەتتەردى تۇسىرگەن حايرەدەن راۋشانوۆ
اقتوبە.
