الاكول كەلەسى شومىلۋ ماۋسىمىندا دەمالۋشىلار مەن تۋريستەردى اباتتاندىرىلعان جاعالاۋىمەن قارسى الماق. وسى ماقساتتا شىعىس قازاقستان وبلىسىنىڭ اكىمدىگى الاكول دەمالىس ايماعىن دامىتۋعا 500 ميلليون تەڭگە قارجى بولۋگە شەشىم قابىلدادى. اتالعان قارجىعا 2017 جىلى كول جاعالاۋىنا اپاراتىن جولدارعا ورتاشا جوندەۋ جۇمىستارى جۇرگىزىلىپ, جاعاجايلار كورىكتەندىرىلەتىن بولادى. جوبا بويىنشا كول جاعالاۋىندا ساياباق اشىلىپ, بالالاردىڭ سپورتتىق جانە اتتراكتسيوندى ويىن الاڭدارى سالىنباق. سونىمەن قاتار, اۆتوبەكەت اۋماعىندا اۆتوتۇراق جاسالادى.
بيىل وبلىس اكىمى دانيال احمەتوۆ وڭىرلىك ءتۋريزمدى دامىتۋ اياسىندا الاكول جاعالاۋىن دامىتۋعا ەرەكشە نازار اۋدارىپ وتىر. ءوڭىر باسشىسىنىڭ تاپسىرماسى بويىنشا ارنايى جۇمىس توبى قۇرىلىپ, جاعالاۋداعى سانيتارلىق-ەپيدەميولوگيالىق جانە ورتكە قارسى قاۋىپسىزدىك تالاپتارىن تەكسەرگەن بولاتىن. بۇل رەتتە جاعالاۋداعى كاسىپكەرلىك نىساندارىنىڭ كوپتەگەن تالاپتار ۇدەسىنەن شىعا الماي وتىرعانى انىقتالدى. سونداي-اق 80 نىساندا ساۋلەت جانە قالا قۇرىلىسى تالاپتارىنىڭ ورىندالماعانى بەلگىلى بولدى. تەكسەرىس قورىتىندىلارى بويىنشا, ءۇرجار اۋدانىنىڭ اكىمدىگى كاسىپكەرلەرمەن كەلەسى دەمالىس ماۋسىمى باستالعانعا دەيىن كەمشىلىكتەردى جويۋ تۋرالى مەموراندۋم بەكىتكەن ەدى. بۇل كەلىسىمگە سايكەس, كاسىپكەرلەر قىزمەت كورسەتۋدى زاڭ تالاپتارىنا سايكەس جۇرگىزۋمەن بىرگە يەلىكتەرىندەگى نىسانداردى اباتتاندىرىپ, دەمالۋشىلارعا قولايلى جاعداي جاساۋعا ۋاعدالاسقان.
ەڭ باستىسى, الاكول جاعالاۋىندا ءتۋريزمدى دامىتۋ ماسەلەسىن كەشەندى شەشۋ ماقساتىندا ءتيىستى ينفراقۇرىلىمدى قۇرا وتىرىپ, دەمالىس ايماعىن اباتتاندىرۋدىڭ جوباسى دايىندالدى. وتكەن اپتانىڭ سوڭىندا وبلىس اكىمى د.احمەتوۆتىڭ توراعالىعىمەن ءۇرجار اۋدانىندا وتكەن ارنايى كەڭەستىڭ بارىسىندا بۇل جوبا كوپشىلىك نازارىنا ۇسىنىلىپ, بەكىتىلدى. جاڭا جوباعا سايكەس, كەلەسى جىلى الاكولگە اپاراتىن جولدارعا ورتاشا جوندەۋ جۇمىستارى جۇرگىزىلىپ, جاعالاۋ مەن جاعاجايلار اباتتاندىرىلادى, ساياباق اشىلىپ, سپورت جانە اتتراكتسيوندى ويىن الاڭدارى سالىنادى. سونىمەن قاتار, اۆتوبەكەت اۋماعى اباتتاندىرىلىپ, 200 ورىندىق اۆتوتۇراق جاساقتالماق. ءۇرجار اۋدانىنىڭ اكىمى سەرىك زاينۋلدين اتالعان جۇمىستاردىڭ 2017 جىلدىڭ 1 شىلدەسىنە دەيىن اياقتالاتىنىن جەتكىزدى.
– اۋدانداعى ازاماتتاردىڭ ءوز مىندەتتەرىن ورىنداپ, الاكولدىڭ ماڭايىن اباتتاندىرۋ بويىنشا ءتيىستى جۇمىستاردى اتقاراتىنىنا, دەمالۋعا كەلگەن ادامدارعا قولايلى جاعداي جاسايتىنىنا سەنىم بىلدىرەمىن. بۇل رەتتە الاكولدى شىعىس قازاقستاننىڭ ماقتانۋعا تۇرارلىقتاي كورىكتى ايماعى ەتۋگە العاش رەت بيۋدجەتتەن ارنايى قارجى بولىنۋدە, – دەدى كەڭەستى قورىتىندىلاعان د.احمەتوۆ.
دۋمان اناش,
"ەگەمەن قازاقستان"
شىعىس قازاقستان وبلىسى,
ءۇرجار اۋدانى.
