مۇشەلىك اياسىنداعى جۇمىستارعا دايىندىق قىزا ءتۇستى

قازاقستان رەسپۋبليكاسىنىڭ سىرتقى ىستەر مينيسترلىگى 2017 جىلدىڭ 1 قاڭتارىندا باستالاتىن بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى جۇمىس باعدارلاماسىنىڭ مازمۇندى بولىگىنە دايىندىقتى جالعاستىرۋدا, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى. مالىمدەلگەن باسىمدىقتار قاتارىن­­دا يادرولىق قارۋسىزدانۋ جانە تاراتپاۋ, تەرروريزممەن جانە ەكسترە­ميزم­مەن كۇرەس, بىتىمگەرشىلىك پەن بەي­بىت قۇرىلىس ماسەلەلەرىمەن قاتار, قاۋىپ­سىزدىك پەن ورتالىق ازيا ءوڭىرىن دامىتۋ ماسەلەلەرى بار. قازاقستاننىڭ بۇۇ قاۋىپسىزدىك كەڭەسىنىڭ مۇشەسى بولعان ورتالىق ازيا­داعى العاشقى ەل ەكەنى بەلگىلى. وسى رەتتە بۇكىل ءوڭىردىڭ مۇددەسىن قور­عاۋ­عا دا دايىن. سوندىقتان قازاق­ستان, بۇۇ قاۋىپسىزدىك كەڭەسىندەگى جۇ­مى­سى تۇر­عىسىنان العاندا, وڭىرلىك پروبلە­ما­لاردى شەشۋگە قاي جاعىنان ىقپال ەتە العان بولار ەدى دەگەن ماسەلە ماڭىزدى. وسىعان وراي, مەملەكەت باسشىسى­نىڭ تاپسىرماسى بويىنشا قازاقستان رەسپۋبليكاسىنىڭ سىرتقى ىستەر مي­نيسترى ەرلان ىدىرىسوۆ جىل سوڭى­نا دەيىن ورتالىق ازيا مەن اۋعان­ستان مەملەكەتتەرىنە ارنايى ساپار­مەن بارىپ, بۇۇ-نىڭ باستى ساياسي ور­گا­نى­نىڭ الاڭىندا وڭىرلىك تاقىرىپتاردى ىلگەرىلەتۋ بويىنشا ۇيلەستىرۋ تۇرعى­سى­نان كەلىسسوزدەر جۇرگىزەتىن بولادى. بەلگىلەنگەن ماقسات شەڭبەرىندە 24-25 قاراشا كۇندەرى سىرتقى ىستەر ءمينيسترى كابۋل مەن دۋشانبە قالالارىندا بولدى. ە.ىدىرىسوۆتى ەكى ەل استاناسىندا دا مەملەكەتتەر باس­شى­لارى – اۋعانستان پرەزيدەنتى مو­حام­ماد اشراف عاني مەن تاجىكستان پرە­زي­­دەنتى ەمومالي راحمون قابىل­دا­دى. قازاقستان سىرتقى ساياسات ۆە­دومست­ۆو­سىنىڭ باسشىسى اتالعان ەل­دەر­­دىڭ پرە­زيدەنتتەرىنە ەلباسى نۇرسۇلتان نازارباەۆتىڭ ارنايى جول­داۋىن تابىس ەتتى. وندا 2017-2018 جىل­دارى قازاق­ستاننىڭ بۇۇ قاۋىپسىزدىك كەڭە­سىن­دەگى جۇمىسى اياسىندا ورتاق مىندەت­تەر­دى شەشۋ ءۇشىن ءوزارا ءىس-قيمىل­دىڭ ءتيىم­دى ارنالارىن تابۋ بويىنشا ارە­كەت­تەس­تىكتى جولعا قويۋ تۋرالى ايتى­لادى. موحامماد اشراف عانيمەن كەزدەسۋى كەزىندە قازاقستاندىق مينيستر ەلىمىز­دىڭ وڭىرلىك قاۋىپسىزدىك ماسەلەلەرىن شەشۋ باعىتىنداعى جۇمىستار اياسىن­دا اۋعان­ستانداعى جاعدايدى تۇراق­تان­دىرۋ پەرسپەكتيۆالارىنا بايلانىس­تى ماسەلەلەرگە باسا ماڭىز بەرەتىنىن اتاپ كورسەتتى. ءوزى تاراپىنان اۋعان­ستان پرە­زي­دەنتى قازاقستاندى بۇۇ قاۋىپ­سىز­دىك كەڭەسىنىڭ تۇراقتى ەمەس مۇشەلى­گىنە سايلانۋىمەن قۇتتىقتادى. قازاق­ستان­نىڭ 2009 جىلدان باستاپ اۋعان­ستان جاستارىن ەلىمىزدە وقىتىپ جات­قان ءبىلىم بەرۋدىڭ مەملەكەتتىك باعدارلاماسىنا ءوزىنىڭ ريزاشىلىعىن ءبىلدىردى. ناتيجەسىندە 1 مىڭنىڭ شاما­سىندا اۋعانستاندىق ستۋدەنت قازاق­ستاننىڭ جوعارى جانە ورتا تەحنيكالىق وقۋ ورىندارىندا وقىپ, ءتيىستى ءبىلىم الاتىن بولادى. قازاقستاننىڭ بۇۇ قاۋىپسىزدىك كەڭەسىنىڭ الداعى تۇراقتى ەمەس مۇشە­لىگى كەزىندە اتقاراتىن جۇمىستارى, وسى ايادا ەكى ەل اراسىنداعى ساۋدا-ەكونو­ميكالىق, ينۆەستيتسيالىق, ءبىلىم بەرۋ جانە گۋمانيتارلىق سالالارداعى ىنتىماقتاستىق ماسەلەلەرى ەرلان ىدىرىسوۆتىڭ اۋعانستان اتقارۋ­شى بيلىگىنىڭ باسشىسى ابدۋللا ابدۋل­لامەن جانە ونىڭ ورىنباسارى موحامماد موحاككەكپەن, اۋعانستان پرە­زي­­دەنتىنىڭ ۇلتتىق قاۋىپسىزدىك ماسە­­لەلەرى جونىندەگى كەڭەسشىسى حانيف ات­مار­­مەن جانە اۋعانستان سىرتقى ءىس­تەر ءمينيسترى سالاحۋددين راببانيمەن كەز­­دەسۋ­لەرى كەزىندە تالقىلاندى. كەشە قازاقستان سىرتقى ساياسات ۆەدومستۆوسى باسشىسىنىڭ ورتالىق ازيا ەلدەرىنە تۋرنەسى دۋشانبەدە جال­عاسىپ, ونى تاجىكستان پرەزيدەنتى ەمومالي راحمون قابىلدادى. مازمۇندى اڭگىمە بارىسىندا ە.ىدىرىسوۆ كور­­شى ەل مەملەكەتىنىڭ باسشىسىنا قازاق­­ستان پرەزيدەنتى نۇرسۇلتان نازارباەۆتىڭ ىستىق سالەمىن جولداپ, ەكى ەل مەم­لەكەتتىك ورگاندارىنىڭ قازاق­­ستان پرەزيدەنتىنىڭ 2015 جىلدىڭ قىر­­كۇيەگىندە دۋشانبەگە جاساعان رەس­­مي ساپارىنىڭ قورىتىندىلارى ءنا­تي­­جە­سىندە قول جەتكىزىلگەن ۋاعدا­لاس­تىقتاردى ورىنداۋ جايىمەن تانىستىردى. ە.ىدىرىسوۆ تاجىكستان باسشىسىنا قازاقستاننىڭ 2017-2018 جىلدارعا بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كانديداتۋراسىن قول­دا­عانى ءۇشىن ريزاشىلىعىن ءبىلدىر­دى. مينيستر قازاقستاننىڭ الداعى ميسسيانىڭ جاۋاپكەرشىلىگى جوعارى ەكەنىن جاقسى تۇسىنەتىنىن جانە ونى اتال­عان الاڭدا ورتالىق ازيا مەملە­كەت­­تەرىنىڭ ورتاق مۇددەسىن كوتەرۋ ءمۇم­كىن­دىگى رەتىندە قاراستىراتىنىن اتاپ كورسەتتى. وسى ورايدا ە.ىدىرىسوۆ تاجىك­ستان پرەزيدەنتىنە ءوزىنىڭ كابۋل­داعى كەلىسسوزدەرىنىڭ ناتيجەلەرى تۋرالى ايتىپ بەردى. ءوز كەزەگىندە ە.راحمون قازاقستان­مەن ەكىجاقتى قىزىعۋشىلىق تانىتى­لاتىن سالالارداعى ءوزارا ءتيىمدى ىنتى­ماقتاس­­تىقتى ءارى قاراي نىعايتۋعا دۋشان­بە­نىڭ ارقاشان دايىن ەكەنىن ءبىلدىردى. ە.ىدىرىسوۆ, سونداي-اق, تاجىكستان سىرتقى ىستەر ءمينيسترى سيرودجيددين اسلوۆپەن كەلىسسوز جۇرگىزسە, وندا ەكى­جاق­تى نەگىزدەگى ىنتىماقتاستىق پەن حالىق­ارا­لىق ۇيىمدار شەڭبەرىندەگى ارەكەتتەس­تىك ماسەلەلەرى تالقىلاندى. تاجىك­ستان­دىق مينيستر قازاقستاننىڭ وڭىردەن بۇۇ قاۋىپسىزدىك كەڭەسىنىڭ تۇراق­تى ەمەس مۇشەلىگىنە العاشقى بولىپ وكىلدىك ەتەتىن فاكتىسىن جوعارى باعالادى. دۋشانبەدەگى كەزدەسۋلەردە, سونى­مەن قاتار, ورتالىق ازياداعى سۋ-ەنەر­گەتيكالىق كەشەننىڭ پروبلەماتيكاسى بويىنشا پىكىر الماسۋ­لار بولدى. بار­لىق مۇددەلى تاراپتاردىڭ تالا­بىن قانا­عاتتاندىرۋعا قابىلەتتى جالپى­وڭىر­لىك شەشىمدەردى ىزدەستىرۋدە وڭ ءۇردىس بايقالىپ وتىرعانى دا نازاردان تىس قالعان جوق. ەكى ساپاردىڭ دا اشىق جانە ىزگى ۇنقاتىسۋ اۋانىندا وتكەنىن اتاپ وتكەن ورىندى.