بولاشاقتىڭ قالاسى سىيلىعىن الدى

اجارى كۇننەن-كۇنگە ايشىقتالعان ارۋ استانا بۇگىندە تەك قازاقستاننىڭ ەلورداسى عانا ەمەس, سونىمەن بىرگە, جاھاندىق شارالاردىڭ ورتالىعى بولىپ تابىلاتىن الەمدىك دارەجەدەگى ءىرى مەگاپوليستىڭ بىرىنە اينالعانى اقيقات. مۇنى حالىقارالىق ساراپشىلار دا ەرەكشە اتاپ كورسەتۋدە. وسى جاقىندا, 17 قاراشادا National Geographic Traveler (رەسەي) جۋرنالى ەلوردامىز – استانا قالاسىن قارقىندى دامۋى جانە جوعارى تۋريستىك الەۋەتى ءۇشىن «بولاشاقتىڭ قالاسى» اتتى ارنايى سىيلىقپەن ماراپاتتادى. «كەلەر جىلى استانادا ەكسپو-2017 حالىقارالىق ما­مان­داندىرىلعان كورمەسى وتەدى. وسىعان بايلانىستى قازاقستاننىڭ باس قالاسىنا دەگەن قىزىعۋشىلىق وسۋدە. ءومىردىڭ ءوزى كورسەتىپ وتىر­عانداي, قازاقستان – بۇل ۇلكەن الەۋەتكە يە, بولاشاقتىڭ باعىتى. استانا قالاسى بۇگىندە الەمگە كەڭىنەن تانىلعان مادەني جانە الەۋمەتتىك ءىرى مەگاپوليس. بۇل قالاعا دەگەن تۋريستەردىڭ قىزى­عۋشىلىعى جىلدان-جىلعا ارتىپ كەلەدى. ءبىز تۋريزم جانە ساياحات تۋرالى حالىقارالىق جانە رەسەيلىك باسىلىم رەتىندە بۇل اقيقاتتى نازاردان تىس قالدىرا المادىق», دەدى National Geographic Traveler جۋرنالىنىڭ باس رەداكتورى ولگا ياكوۆينا. ءسانى مەن سالتاناتى جاراسقان استانانىڭ اتاعى بارعان سايىن كوپشىلىكتىڭ قىزىعۋشىلىعىن تۋعىزعان ەرەكشە برەندكە اينالىپ كەلە جاتقاندىعى انىق. الەمدىك ارحيتەكتۋرانىڭ نەبىر وزىق ۇلگىلەرىن جاراسىمدىقپەن پاش ەتكەن ەڭسەلى ەلوردانىڭ كوركى تورتكۇل دۇنيەنى قىزىقتىرىپ وتىر. وعان جىلدان-جىلعا ارتىپ كەلە جاتقان تۋريستەر تاسقىنى دالەل. ينۆەستيتسيالار جانە دا­مۋ مينيسترلىگىنىڭ يندۋستريا جانە تۋريزم دەپارتامەنتىنىڭ دەرەكتەرى بويىنشا, باس قالانىڭ ىرگەتاسى قالانعان 18 جىل ىشىندە ەلورداداعى قوناقۇيلەر سانى 40 ەسە ءوسىپ, قالامىزعا شەتەلدەردەن كەلەتىن تۋريستەر سانى 50 ەسە ارتىپتى. ىشكى تۋريزم 43 ەسە وسكەن. ەگەر كەلەتىن تۋريستەر سانىن استانا قالاسىنىڭ ءاربىر 1000-شى تۇرعىنىنا شاققاندا ەلوردامىز دۇنيە ءجۇزى تۋريستەرىنىڭ ەڭ كوپ باراتىن سەۋل, ىستانبۇل سياقتى قالالارمەن تەڭەسەدى ەكەن. «استانا كونۆەنشن بيۋرو» جشس-ءنىڭ ديرەكتورى سانيار ايتاكەنوۆتىڭ ايتۋىنشا, سوڭعى جىلدارى ەلوردانىڭ تۋريستىك الەۋەتىن ارتتىرۋ ماقساتىندا اۋقىم­دى شارالار جۇزەگە اسى­رىلعان. بۇل رەتتە «Smart Astana» جوباسىنىڭ ماڭىزى ەرەكشە زور. بۇل زاماناۋي جوبانىڭ نەگىزگى وپەراتورى – «Astana Innovations» اق ماماندارىنىڭ پىكىرىنشە, بۇل باعىتتاعى جۇمىس نەگىزىنەن ءۇش تاراپتا – يننوۆاتسيالىق ستار­­تاپتاردى قولداۋ, «Smart Astana» باعدارلاماسىن جۇزەگە اسىرۋ, سونىمەن بىرگە, استانا قالا­سى­نىڭ تىرشىلىك قىزمەتىن كە­شەن­دى قامتاماسىز ەتۋ جۇيەسىن دامىتۋ بويىنشا جۇرگىزىلەدى. بۇل ءجۇ­يەنىڭ باستى ماقساتى – ەلوردا تۇرعىندارى مەن قوناقتارىنىڭ قاۋىپسىزدىگىن ارتتىرۋ, قالاداعى كولىك قوزعالىسىنىڭ جاعدايىن جاق­سارتۋ, قالانىڭ قىزمەت كورسەتۋ سالاسىندا جاڭا تەحنولوگيالاردى قولدانۋ. يننوۆاتسيالىق جوبالاردى ومىرگە ەنگىزۋ ناتيجەسىندە ەكسپو-2017 حالىقارالىق ما­مانداندىرىلعان كورمەسىنە ءدۇ­نيەنىڭ ءتورت بۇرىشىنان كەلەتىن قوناقتارعا استانا قالاسى «اقىلدى قالالاردىڭ» كوشباسشىسى رەتىندە قالتقىسىز قىزمەت كورسەتۋدى ب­اسىم­دىقپەن ءىس جۇزىنە اسىرماق. National Geographic Traveler جۋرنالىنىڭ «بولاشاق قالاسى» ارنايى سىيلىعىن تاپسىرۋ سالتاناتىندا, «استانا ەكسپو-2017» ۇلتتىق كومپانياسىنىڭ ىلگەرىلەتۋ جانە تۋريزم دەپارتامەنتى ديرەك­تورىنىڭ ورىنباسارى روزا اسانباەۆا بۇكىلالەمدىك كورمە وتكىزۋ شەڭبەرىندە اتقارىلىپ جاتقان جۇمىستارعا توقتالا كەلىپ, دۇنيە جۇزىنەن كەلەتىن تۋريستەرگە كورسەتىلەتىن جوعارى ساپالى قىزمەتتى تىلگە تيەك ەتتى. «استانا قالاسىندا وتەتىن ەكسپو-2017 كور­مەسىنىڭ باس تاقىرىبى – «بولا­شاق ەنەرگياسى» دەپ اتالادى. وسىعان بايلانىستى بۇل كورمەگە الەمدە قىزىعۋشىلىق وتە جوعارى بولىپ وتىر. سوعان سايكەس كورمە قوناقتارىن جوعارى دەڭگەيدە قارسى الۋ شارالارى جان-جاقتى ويلاستىرىلۋدا. كورمە قوناقتارىنا 3 000 تاقىرىپتىق جانە ويىن-ساۋىق ءىس-شارالارى كورسەتىلەتىن بولادى. ونىڭ ىشىندە دۇنيە جۇزىنە تانىمال ەسترادا جۇلدىزدارىنىڭ قاتىسۋىمەن وتەتىن كونتسەرتتەر, ارنايى ساحنالىق قويىلىمدار, شوۋ­لار مەن شەرۋلەر ەرەكشە اسەرلى بولادى دەپ كۇتىلۋدە», دەدى روزا اسانباەۆا. «استانا ەكسپو-2017» ۇلتتىق كومپانياسى National Geographic Traveler جۋرنالىنىڭ سىيلىق ارىپتەسى رەتىندە قازاقستان بويىنشا وتكىزىلگەن تۋريستىك بايقاۋعا قاتىسۋشىلارعا ارنايى سەرتيفيكات تاپسىردى. قازاقستان بويىنشا ساياحات تۋرالى اسەرلى ەسسەلەر جىبەرگەن 45 ۇمىتكەردىڭ ىشىندە رەسەيلىك ماريا مەششەرياكوۆا «قازاق­ستان – جاڭالىقتار اشاتىن ۋاقىت» اتالىمى بويىن­شا جەڭىمپاز دەپ تانىلدى. «قازاق­ستاندا بولعان مەنىڭ دوستارىم عاجايىپ كولساي كولى تۋرالى تامسانا ايتقان بولاتىن. كولساي شەجىرەسىنىڭ مەنى قى­زىق­تىرعاندىعى سونشا, باي­قاۋعا قاتىسىپ, ارنايى ساياحات شەڭ­بەرىندە كولسايعا بارۋ باقى­تىنا يە بولدىم», دەيدى ماريا مەششەرياكوۆا. ءيا, استانا الەم تۋريستەرىن قىزىقتىراتىن ورتالىققا اينالدى. وعان الداعى جىلى وتەتىن ءبۇ­كىلالەمدىك ەكسپو-2017 كور­­مەسىنىڭ قوسار ۇلەسى دە ولشەۋ­سىز. شارتاراپتان كەلەتىن تۋريس­تەردىڭ جوعارى تالابىنان شىعۋ ماقساتىندا ەلوردامىزدا بارلىق شارالار ويلاستىرىلۋدا. جىلقىباي جاعىپار ۇلى, «ەگەمەن قازاقستان»