حالىقارالىق بايقاۋدا قازاق قىزى جەڭىمپاز اتاندى

الماتىداعى پ.چايكوۆسكي اتىنداعى مۋزىكالىق كوللەدج ستۋدەنتى وزبەكستان استاناسىنان ۇلكەن جەڭىسپەن ورالدى. بارلىعى 405 ادام قاتىسقان ونەر دوداسىندا قورقىتتىڭ قوبىزىن سارناتقان قازاق قىزىنىڭ ەڭبەگى, ۇستازىنىڭ ءۇمىتى اقتالدى, دەپ حابارلادى BNews.kz. بيىلعى ونەر سايىسىنا 9 ەلدەن بارلىعى 405 ونەرپاز قاتىستى. ولار 12-15 جانە 16-19 جاس ارالىعىندا ەكى توپقا, ءار توپ بويىنشا ۇرمەلى, ىسقىشتار, ۇرمالى جانە ىشەكتى اسپاپتار نوميناتسياسى بويىنشا ءبولىندى. الماتىدان وسى بايقاۋعا ارنايى بارعان پ.چايكوۆسكي اتىنداعى مۋزىكا كوللەدجىنىڭ 4 كۋرس ستۋدەنتى ينديرا جانداشوۆا ىسقىشتار نوميناتسياسى بويىنشا ءبىرىنشى ورىندى جەڭىپ الدى. «بۇل جالپى ۇلكەن كونكۋرس. ءبىزدىڭ نوميناتسيا بويىنشا قازاقستان, وزبەكستان, قىرعىزستان, تاجىكستان جانە ازەربايجاننان ونەرپازدار قاتىستى. قايسىسى بولماسىن ونەرلى, تالانتتى مۋزىكانتتارىن الىپ كەلگەن. ءبىز دە وسى بايقاۋعا تياناقتى دايىندالدىق. شاكىرتىم ينديرا ىسقىش اسپاپتاردىڭ ىشىندە قوبىزبەن شىعىپ, تاماشا ونەر كورسەتىپ, ءبىرىنشى ورىندى جەڭىپ الدى. ەڭبەگىمىز جاندى. مەنىڭ ۇكىلەگەن ءۇمىتىم اقتالدى. قۋانىشىمىزدا شەك جوق», – دەدى جەڭىمپازدىڭ ۇستازى گۇلايىم قوجامقۇلوۆا. «تۋعان ەلدىڭ اۋەنى» حالىقارالىق بايقاۋى 2014 جىلدان بەرى ءداستۇرلى تۇردە ءوتىپ كەلەدى. اتالعان بايقاۋ قاراپايىم ونەرپازداردىڭ كونكۋرسى ەمەس, كاسىبي مۋزىكالىق ءبىلىم بەرەتىن ارنايى جانە جوعارى وقۋ ورىندارىنىڭ تۇلەكتەرى مەن ۇستازدارى قاتىساتىن دودا.