تاۋەلسىزدىك جىلدارىنداعى وقۋشىلار جەتىستىگى قانداي؟

بۇگىن قازاقستان رەسپۋبليكاسىنىڭ ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا دارىندى بالالارمەن – حالىقارالىق ءپان وليمپيادالارى جەڭىمپازدارىمەن كەزدەستى. بۇل ءداستۇرلى كەزدەسۋدى «دارىن» رەسپۋبليكالىق عىلىمي-پراكتيكالىق ورتالىعى ۇيىمداستىردى, دەپ حابارلايدى قر ءبىلىم جانە عىلىم مينيسترلىگىنىڭ باسپاسوز قىزمەتى. كەزدەسۋدىڭ ماقساتى – مەملەكەتىمىزدىڭ بولاشاق ينتەللەكتۋالدىق ەليتاسىن قۇرايتىن, حالىقتىڭ ءال-اۋقاتىن جاقسارتىپ, ەلىمىزدىڭ ورنىقتى دامۋىنا ۇلەسىن قوساتىن تالانتتى بالالار مەن جاستاردى قولداۋ. 25 جىل توڭىرەگىندە قازاقستاندىق وقۋشىلار حالىقارالىق دەڭگەيدەگى وليمپيادالاردا 9346 مەدال جەڭىپ العان. 1998-التىن, 2895-كۇمىس, 4143-قولا جۇلدەلەر. بەدەلى جوعارى حالىقارالىق وليمپيادالارعا قاتىسۋ ناتيجەسىندە قازاقستان قۇراما كومانداسى جاراتىلىستانۋ-ماتەماتيكا پاندەرى بويىنشا الەمدە 12 ورىندى يەلەنىپ وتىر. جيىنعا ەل ايماعىنىڭ ءار تۇكپىرىنەن كەلگەن دارىندى 40 وقۋشى قاتىستى. اتالمىش شارادا ەلميرا سۋحانبەرديەۆا مينيستىرلىكتىڭ قوناقتارىن تاۋەلسىزدىكتىڭ 25 جىلدىعىمەن قۇتىقتاپ, وقۋشىلارمەن وليمپيادا, الداعى بىرىڭعاي ۇلتتىق تەستىلەۋ جايلى سۇحباتتاسىپ, سىيلىقتار تاپسىردى.