«Smart Astana» تۇرعىندار قاجەتتىلىگىن ەسكەرەدى

ەلوردادا الدىنعى قاتارلى الەمدىك كومپانيالاردىڭ قاتىسۋىمەن قالالىق جانە اگرارلىق تەحنولوگيالار, مەديتسينالىق تەحنولوگيالار, ەنەرگەتيكا جانە fintech ورتالىقتارى قۇرىلادى. وسى ورتالىقتاردىڭ اينالاسىنا ستارتاپ جوبالارعا قولداۋ كورسەتىلەدى. وسى ماقساتتا استانانىڭ جەكە باعدارلاماسى قۇرىلدى. اتالعان باعىتتاردا جۇمىس ىستەيتىن ۇزدىك يننوۆاتسيالىق كومپانيالارعا جىل سوڭىنا دەيىن 30 ملن تەڭگە بولىنەدى. بۇل تۋرالى بۇگىن اسەت يسەكەشەۆ استانادا ءحى يننوۆاتسيالىق فورۋمدا ايتتى. «Smart Astana» باعدارلاماسىن ىسكە اسىرۋ بارىسىندا قالا باسشىلىعى تۇرعىنداردىڭ قاجەتتىلىكتەرىن, اتاپ ايتقاندا, بىلىم, دەنساۋلىق ساقتاۋ, قوعامدىق كولىك جانە ت.ب. سالالارداعى اقىلدى تەحنولوگيالاردى نازارعا الاتىن بولادى. بۇل تەحنولوگيالار ادامداردى جايلى ءومىر ءسۇرۋ جاعدايلارىمەن قامتاماسىز ەتەدى. «وتكەن اپتادا ءبىز «Start Up Session» وتكىزدىك, وندا نازارباەۆ ۋنيۆەرسيتەتىنىڭ قالا مىندەتتەرىن شەشۋگە باعىتتالعان ۇزدىك جوبالارى تانىستىرىلدى. ءبىز مۇنداي كەزدەسۋلەردى تۇراقتى تۇردە وتكىزىپ, ەڭ جاقسىلارىن تاڭداپ, قالادا ەنگىزەتىن بولامىز», - دەدى استانا اكىمى. «بۇگىندە الەم ەكونوميكاسىنىڭ دامۋى جاھاندىق قالالارعا بايلانىستى, سول سەبەپتى ءبىز استانانى Global Smart City-گە اينالدىرماقپىز. جاھاندىق قالالار دامۋىنىڭ الەمدىك ۇدەرىستەرىنە بەيىمدەلگەن قالانى دامىتۋدىڭ جاڭا ستراتەگياسى ىسكە اسىرىلۋدا», - دەدى استانا اكىمى.