«جۇلدىزدار توعىسقاندا» فرانتسيادا كورسەتىلەدى

قر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن «جۇلدىزدار توعىسقاندا» ءفيلمى فرانتسيانىڭ ونفليور قالاسىندا قاراشانىڭ 22-ءى مەن 27-ءى ارالىعىندا وتەتىن XXIV رەسەيلىك كينو فەستيۆالىندە (Festival du Cinema Russe) «ەرەكشە قۇبىلىس» باعدارلاماسى اياسىندا كورسەتىلەدى, دەپ حابارلادى شاكەن ايمانوۆ اتىنداعى «قازاقفيلم» اق. ەستەرىڭىزگە سالا كەتسەك, اتالمىش ءفيلمنىڭ تۇساۋكەسەرى 2016 جىلى ساۋىردە استانا قالاسىندا ءوتتى. ونىڭ رەجيسسەرى سەرگەي سنەجكين. كارتينا ماسكەۋ قالاسىنداعى «كينو ۇيىندە» جانە رەسەي فەدەراتسياسىنىڭ مادەنيەت مينيسترلىگىندە, سونىمەن قاتار حالىقارالىق جىبەك جولى كينوفەستيۆالىندە ارنايى كورسەتىلگەن بولاتىن. رەسەي كينوسىنىڭ فەستيۆالى الەمنىڭ تۇكپىر-تۇكپىرىنەن تانىمال كينوگەرلەردىڭ قاتىسۋىمەن وتەتىن ەڭ اۋقىمدى فەستيۆالدەردىڭ ءبىرى. بيىل فەستيۆال اياسىندا رەسەي, قازاقستان, فرانتسيا جانە اقش ەلدەرىنەن ىرىكتەلگەن بارلىعى 26 فيلم كورسەتىلەدى. قازىلار القاسىنىڭ توراعاسى – جازۋشى جانە پروديۋسەر فرەدەريك بەگبەدەر. سونداي-اق, فەستيۆالدىڭ ۇزدىكتەرىن پروديۋسەر مەي شەن شالە, اكتريسا سيرەل كلەر, اكتريسا كريستا تەرە, اكتريسا ۆيكتوري وللوكۋي جانە كينوسىنشى فيليپپ رۋيە انىقتايتىن بولادى. «جۇلدىزدار توعىسقاندا» كوركەم ءفيلمى 26 قاراشادا ساعات 14:00-دە «Henri-Jeanson» كينوتەاترىندا فرانتسۋز تىلىندەگى سۋبتيترلەرىمەن كورسەتىلەدى.