اقتوبەدە ەل تاۋەلسىزدىگىنىڭ 25 جىلدىعى قارساڭىندا داستۇرلى «جاستار» بالى ءوتتى. سالتاناتتى شاراعا مەكەمە باسشىلارى, مۋزىكانت, سكريپكاشى مارات بيسەنعاليەۆ, قازاق ەستراداسىنىڭ جۇلدىزدارى, تەلەجۇرگىزۋشىلەر مەن ستۋدەنت جاستار قاتىستى.
شارا بارىسىندا تۇڭعىش رەت وبلىس اكىمىنىڭ 100 مىڭ تەڭگەلىك «جاس اقتوبە» وبلىستىق جاستار سىيلىعىمەن اقتوبەلىك 25 جاس ماراپاتتالدى. «جاس اقتوبە» وبلىستىق جاستار سىيلىعى بيىل عانا تاعايىندالدى. سونىمەن قاتار ايماق باسشىسى مۇمكىندىگى شەكتەۋلى دارىندى 10 جاستى 100 مىڭ تەڭگەلىك سەرتيفيكاتتارمەن ماراپاتتادى. شارانىڭ جىل سايىنعى ۇيىمداستىرۋشىلارىنىڭ ءبىرى — م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتى اكىمشىلىگى تاراپىنان اتا-اناسىنىڭ قامقورلىعىنسىز قالعان ستۋدەنتتەرگە جالپى سوماسى 4 ميلليون تەڭگە قاراجات تابىستالدى.
-ەلباسى نۇرسۇلتان نازارباەۆتىڭ ساياساتى مەن ايقىن باعىتىن باعدار ەتكەن ءبىزدىڭ جالپىۇلتتىق يدەيامىز — ماڭگىلىك ەلگە جەتۋدە قوعامنىڭ قوزعاۋشى كۇشى, ەگەمەن ەلدىڭ بولاشاعىن قالىپتاستىراتىن ەركىن وي يەلەرى — جاستارعا پاتريوتتىق تاربيە بەرۋ. قاي مەملەكەتتىڭ دە بولاشاعى — جاستار. تاۋەلسىزدىكتىڭ 25 جىلى ىشىندە مەملەكەت باسشىسىنىڭ باستاۋىمەن جاستارعا زور قولداۋ كورسەتىلىپ كەلەدى. از عانا ۋاقىتتىڭ ىشىندە قازاقستان دۇنيەجۇزىنە بەلگىلى بولدى. ەلىمىزدەگى بارلىق مەملەكەتتىك باعدارلامالار اقتوبە وڭىرىندە دە جۇزەگە اسۋدا. قازىرگى تاڭدا 30-عا جۋىق ۇكىمەتتىك ەمەس ۇيىمداردىڭ ۇسىنىسىمەن 100-گە تارتا ساياسي الەۋمەتتىك جوبالار ىسكە قوسىلدى. اسىرەسە, جاس ماماندارعا تۇرعىن ءۇي بەرۋ, جۇمىسپەن قامتۋ سىندى باسقا دا الەۋمەتتىك كومەكتەرمەن قولداۋعا تىرىسامىز, - دەدى ءوڭىر باسشىسى.
ول 1 جەلتوقسان - قر تۇڭعىش پرەزيدەنتى كۇنىنە وراي العاش رەت استانا قالاسىندا ەلباسى نۇرسۇلتان نازارباەۆتىڭ قاتىسۋىمەن وتەتىن رەسپۋبليكالىق جاستار فورۋمىنىڭ دەلەگاتتارىنا ساتتىلىك تىلەدى. فورۋمعا «سەرپىن — 2050», «بولاشاق», «نۇرلى جول», «جاسىل ەل», «ديپلوممەن اۋىلعا» سەكىلدى مەملەكەتتىك باعدارلامالاردىڭ قاتىسۋشىلارى, جاس عالىمدار, مادەنيەت جانە ونەر سالاسىنان بارلىعى بەلسەندى 30 جاس قاتىسادى. شارانىڭ سوڭى ونەر جۇلدىزدارىنىڭ اسەم ءانى مەن جاستاردىڭ بي كەشىنە جالعاستى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى.
