ەاەو مەن سينگاپۋر اراسىنداعى كەلىسىم 2018 جىلى راتيفيكاتسيالانادى

ەۋرازيالىق ەكونوميكالىق وداق پەن سينگاپۋر اراسىنداعى ەركىن ساۋدا ايماعى تۋرالى كەلىسىمدى 2017 جىلى جاساپ, 2018 جىلدىڭ ءبىرىنشى جارتىسىندا راتيفيكاتسيالاۋ جوسپارلانۋدا, دەپ حابارلادى رەسەي-سينگاپۋر ۇكىمەتارالىق كوميسسياسىنىڭ وتىرىسىندا رف ءبىرىنشى ۆيتسە-پرەمەرى يگور شۋۆالوۆ. بۇل تۋرالى ريا نوۆوستي حابارلادى. «بىزگە سينگاپۋرمەن ەركىن ساۋدا تۋرالى كەلىسىم جاساسۋ بويىنشا ىنتىماقتاستىق اسا ماڭىزدى. سەبەبى, سينگاپۋر اسەان قاتىسۋشىسى. حالىقارالىق ساۋدامەن اينالىساتىن ماماندار سينگاپۋردى تەك ەۋرازيالىق ەكونوميكالىق وداقپەن كەلىسىمگە نەگىزدەلگەن ساۋدا-ەكونوميكالىق قاتىناسى بولاتىن بولىك رەتىندە عانا ەمەس, قاتىناستى ودان دا كەڭەيتە ءتۇسۋدى قاراستىرۋدا. بۇل اسەان ارقىلى جۇزەگە اسپاق», – دەدى شۋۆالوۆ. ونىڭ ايتۋىنشا, وسى جىلدىڭ مامىر ايىندا سوچيدە وتكەن رەسەي-اسەان كەزدەسۋىندە اسەان-عا كىرەتىن باسقا دا ەلدەر رەسەي فەدەراتسياسىنا ەركىن ساۋدا تۋرالى كەلىسىم جاساسۋدى ۇسىندى. «بىزدە رەسەي پرەزيدەنتىنەن سينگاپۋرمەن ايقىن نۇسقاۋلىق بار. ياعني, 2017 جىلدىڭ اياعىنا دەيىن كەلىسىم جاساسىپ, 2018 جىلدىڭ ءبىرىنشى جارتىسىندا راتيفيكاتسيالاۋ راسىمدەرىن جۇرگىزۋ ءۇشىن وسى ۋاقىتتى پايدالانۋعا بارلىق مۇمكىندىك بار ەكەنىن راستايمىن», – دەپ قوستى شۋۆالوۆ. ەاەو-عا قازاقستان, بەلارۋس, قىرعىزستان, ارمەنيا كىرەدى.