وبلىس جاقسى دامىپ كەلەدى

ەلباسى اقجايىقتاعى ەكى كۇندىك ساپارىنىڭ قورىتىندىسى بويىنشا وسىنداي ءتۇيىن جاسادى اقجايىققا جۇمىس ساپارىنىڭ ەكىنشى كۇنى رەسپۋبليكا پرەزيدەنتى نۇرسۇلتان نازارباەۆ ورال قالاسىندا تاسقىن سۋ زار­دا­بىنا ۇشىراعان تۇرعىندار ءۇشىن بوي كوتەرگەن تۇرعىن ءۇي كەشەندەرىمەن تانىستى. مۇنداعى بەس جانە توعىز قاباتتى تۇر­عىن ۇيلەر ارنايى ساۋلەتتىك جوبالارعا سايكەس تۇرعىزىلعان. ءبىز كەشە «اقجايىق ادىم­دا­رى» اتتى ەلباسىنىڭ وڭىرگە سا­پارى جونىندە جازعان ەسەبىمىزدە وبلىس ورتالىعىنداعى 500 وتبا­سىنا ارنالىپ تۇرعىزىلعان ءارى قازىر قۇرىلىسى اياقتالىپ قالعان كوپ قاباتتى تۇرعىن ءۇي كەشەندەرى بولەك ءبىر اڭگىمەنىڭ سىباعاسى بولماق دەگەن ەدىك. سول ايتىلعان بولەك اڭگىمەنى تارقاتىپ ايتۋدىڭ رەتى بۇگىن كەلىپ وتىر. اتالمىش تۇرعىن ءۇي كەشەنى ورال قالاسىنداعى تۇتاس ءبىر جاڭا شاعىن اۋداندى قۇرايدى. ول قازىردىڭ وزىندە «بەسىنشى شاعىن اۋدان» دەگەن اتاۋعا يە. مۇندا 240 پاتەرلى توعىز قاباتتى ال­عاش­قى كوپ پاتەرلى ءۇيدىڭ قۇ­رى­لىسىن مەردىگەرلەر اراسىندا ءبىرىنشى بولىپ «التاير» قۇرىلىس كومپانياسىنىڭ ۇجىمى اياقتادى. جاڭا نىساندى مەملەكەتتىك كوميسسيا قىركۇيەكتىڭ توعىزى كۇنى قابىلداپ الدى. بۇل نىساننىڭ العاشقى قازىعى بيىلعى كوكتەم­دە 26 ءساۋىر كۇنى قالانعان. مەملەكەتتىك كوميسسيا قۇرىلىس ساپا­سى­نا وتە جاقسى دەگەن باعا بەرىپ وتىر. بۇعان قوسا ءۇي جانىندا ابات­تاندىرۋ مەن كوركەيتىپ, كو­گال­داندىرۋ جۇمىستارى قوسا ءجۇر­گىزىلگەن. ءۇي اۋلاسىنا كوشەت­تەر مەن گۇلدەر ەگىلىپ, ول قازىردىڭ وزىندە كوزدىڭ جاۋىن العانداي بولىپ قۇلپىرىپ تۇر. قالعان كوپ قاباتتى ۇيلەردىڭ پاتەرلەرى دە الداعى قازان ايىنداعى جىلىتۋ ماۋسىمى باستالعان كۇنگە دەيىن ءوز يەلەرىن تاپپاق. ەلدىڭ باتىس بوساعاسىنداعى بەسىنشى شاعىن اۋداننىڭ بولا­شا­عى تۋرالى مەملەكەت باسشىسىنا باتىس قازاقستان وبلىسى اكىمىنىڭ ورىنباسارى تيمۋرجان شاكىموۆ بايانداپ بەردى. الداعى كەزدە مۇندا ارنايى جوباعا سايكەس الەۋمەتتىك-تۇرمىستىق نىساندار مەن مەكتەپتەر, ەمحانا سالىنباق. سونىمەن بىرگە, اتالعان اۋدان اۋماعىندا نازارباەۆ ينتەل­لەك­تۋالدىق مەكتەبى عيماراتىنىڭ قۇرىلىسى اياقتالىپ كەلەدى. بۇ­عان ءتيىستى قاراجات رەسپۋب­لي­كا­لىق بيۋدجەتتەن بولىنگەن. نۇرسۇلتان نازارباەۆ مەملەكەتتىك كوميسسيا قابىلداپ العان جوعارىدا اتالعان توعىز قاباتتى 240 پاتەرلى ءۇيدىڭ جانىندا ءوڭىر­دەگى قۇرىلىس سالاسىنىڭ جەتەكشىلەرىمەن ەمەن-جارقىن اڭگى­مە­لەستى. – بۇل ءۇيدىڭ باس مەردىگەرى الەكساندر پوتيچەنكو مىنا تۇر­عان ازامات, – دەپ تانىستىردى با­تىس قا­زاق­ستان وبلىسىنىڭ اكى­مى ب.ءىزمۇ­حام­بەتوۆ نۇرسۇلتان ءابىش­ ۇلى­نا قۇ­رى­لىس تارلانىن. – جارايسىڭ! – دەپ وسى ساتتە مەملەكەت باسشىسى ونىڭ قولىن قىستى. سونداي-اق كەزدەسۋدە ورال قالاسىنداعى «وتدەلستروي» قۇ­رى­لىس فيرماسى سىلاقشىلار بري­گاداسىنىڭ بريگاديرى مەڭ­سۇ­لۋ ششەرباكوۆا مەن سىرلاۋشىلار توبىنىڭ جەتەكشىسى عازيزا اي­تى­مانوۆا ەلباسىعا وزدەرىنىڭ ريزا­شى­لىق پەن العىس سەزىمدەرىن ءبىلدىردى. – نۇرسۇلتان ءابىش ۇلى, ورال­دىق قۇرىلىسشىلارعا دەگەن ءسىز­دىڭ قولداۋىڭىز بەن قامقور­لى­عىڭىزدى سەزىنۋ ءبىزدى ءاردايىم ءۇل­كەن قۋانىشقا بولەيدى. قيا­لى­مىزدى كوككە سامعاتادى. بۇل ءبىز ءۇشىن ۇلكەن مارتەبە. وبلىستان تىس جەردەن قۇرىلىس سالۋعا بىردە-ءبىر كاسىپورىن كەلگەن جوق. ءبارىن جەرگىلىكتى مەردىگەرلەر اتقاردى. بۇل جۇزدەگەن, مىڭداعان وسى جەردىڭ تۇرعىندارى ءتيىستى تاپ­سى­رىس الىپ, قاراجات تاپتى دەگەن ءسوز. سوعان ساي وتباسى بيۋدجەتتەرىن تولىقتىرعانى دا بەلگىلى. سول ءۇشىن دە سىزگە كوپ راحمەت, نۇر-اعا! – دەدى ولار. قىز جىبەكتىڭ كوشىندەي دەمەسەك تە, وڭكەي ءبىر قىز-كەلىن­شەك­تەر­دەن قۇرىلعان بريگادا ءمۇ­شە­لەرىنە ارنايى كيىم ۇلگىلەرى ۇستە­رىنە قۇيىپ قويعانداي جاراسىپ-اق تۇردى. مۇنداي ۇقىپتىلىق پەن تازالىق, جيناقىلىق پەن قۇنت­تىلىق ەلباسىنىڭ كوڭىلىنەن شىققانى انىق ەدى. مىنا ءتۇر­لە­رىڭمەن بي كەشىنە بارۋلارىڭا دا بولعانداي ەكەن, – دەپ ءازىل-شى­نىن ارالاستىرا ءۇن قاتتى نۇر­سۇل­تان ءابىش ۇلى كوپ ۇلت وكىل­دە­رىنەن قۇرالعان قۇرىلىسشى قىز-كەلىنشەكتەرگە. ورال وڭىرىندە تاسقىن سۋ زار­داپتارىنا ۇشىراعان تۇرعىن­دار­عا ارنالعان تۇرعىن ءۇي كەشەندەرى وتە قىسقا ۋاقىتتىڭ ارالىعىندا بوي كوتەرگەنى بەلگىلى. ارينە, بۇل ايتۋعا عانا جەڭىل. ويتكەنى, ول قولدى ءبىر بۇلعاعاندا وزگەرىپ سالا بەرەتىن سيقىرشىنىڭ تاياعى ەمەس. مىنە, وسى ءىستىڭ باستاما­شى­سى دا, دەم بەرۋشىسى دە ەڭ الدى­مەن ەلباسى ەكەنىنە وسى جەردە تاعى دا كوز جەتكىزە تۇستىك. ءويت­كەنى, مەملەكەت باسشىسى ورال وڭىرىندەگى بۇكىل قۇرىلىس جۇمىس­تا­رى جاز ايلارى ىشىندە ءبىتۋى كەرەك دەگەن مىندەت قويدىم دەگەن ءسوزىن شەگەلەي جەتكىزدى. مىنە, ەلباسى قويعان مىندەت پەن تالاپ ويداعىداي ورىندالىپ كەلەدى. بۇدان ارتىق نەندەي مەرەي, نەندەي مارتەبە بولماق! وبلىستاعى قۇرىلىس مامان­دارى­مەن وي-پىكىر الماسۋ بارى­سىندا پرەزيدەنت نۇرسۇلتان نازارباەۆ ءوزىنىڭ ەكى كۇندىك ساپارى كەزىندە كورگەندەرى مەن كوڭىلگە تۇيگەندەرى تۋرالى دا ايتىپ بەردى. اتاپ ايتقاندا, ەلباسى تاۋەل­سىز­دىك جىلدارىندا ورال وڭىرىندە بولعان وزگەرىستەر كوڭىلىنەن شى­عا­تىنىن جەتكىزدى. وسى ارالىقتا وبلىستا 66 مەكتەپ, 33 بالاباقشا سالىنىپ, پايدالانۋعا بەرىلىپتى. سالىستىرمالى تۇردە العاندا, كەڭەستىك داۋىردە بەلگىلى ءبىر ۋاقىت ولشەمىنە شاققاندا مۇنداي ءنا­تي­جە مەن كورسەتكىش مۇلدەم بولعان ەمەس. وسىنشاما الەۋمەتتىك نى­سان­دار بوي كوتەرگەن جوق. مۇنىڭ ءوزى, ەڭ الدىمەن, تاۋەلسىزدىكتىڭ جەمىسى ەكەنى كامىل. سونىمەن بىرگە, تاۋەلسىزدىك تۇسىندا ءوڭىردى تولىق گازداندىرۋ باعدارلاماسى ىسكە اسقانىنا مەملەكەت باس­شىسى كوڭىلى تولاتىنىن ايتتى. – بۇل كورسەتكىشتى 100 پاي­ىز­عا جەتكىزىپ پە ەدىڭىزدەر؟ – بۇل ساۋ­الدى نۇرسۇلتان ءابشى ۇلى باتىس قازاقستان وبلىسىنىڭ اكىمى باق­تى­قوجا ىزمۇحامبەتوۆكە قويدى. وعان وبلىس باسشىسى: – ءيا, ءسىز ايتقان ۇلكەن مەجەگە جاقىنداپ كەلىپ قالدىق, – دەپ جاۋاپ قايتاردى. – مۇنىڭ ءوزى ۇلكەن جەتىستىك. وڭىردەگى ەلدى مەكەندەر مەن اۋىل­داردى تۇگەلگە جۋىق گازداندىرۋ شارالارىن جۇرگىزۋ ارقىلى سىزدەر بۇل سالادا وزگە وڭىرلەر مەن وبلىستار اراسىندا كوش باستاپ كەلەسىزدەر, – دەدى پرەزيدەنت. ساپارى سوڭىندا ەلباسى تا­ق­ى­رىپقا شىعارىپ وتىرعا­نى­مىز­داي, وبلىس جاقسى دامىپ كەلەدى دەپ ءتۇيىن جاسادى. تەمىر قۇسايىن. باتىس قازاقستان وبلىسى.