سۋرەت: tengrinews.kz
«سەزون» جۋرنالى جانە پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ۇيىمداستىرعان بۇل كونكۋرستىڭ ماقساتى – انا بولۋدى ۇلتتىق يدەيا رەتىندە ناسيحاتتاۋ, تۇرمىستاعى ايەلدەردىڭ ءرولى مەن مارتەبەسىن كوتەرۋ, ەڭ باستىسى وتباسى قۇندىلىقتارىن مەملەكەتتىڭ بەرىك ىرگەتاسى رەتىندە ناسيحاتتاۋ.
سونداي-اق, كونكۋرس قوعامنىڭ مورالدىق-ادامگەرشىلىك ۇستانىمدارىن, بىرلىك پەن كەلىسىمدى نىعايتۋعا, ۇلتتى بىرىكتىرۋگە باعىتتالعان. «قازاقستان ءميسسيسى – 2011» كونكۋرسىنا قاتىسۋشىلارعا قويىلاتىن باستى شارتتاردىڭ ءبىرى – ولاردىڭ وتباسىلارىنىڭ بالالارىنىڭ بولۋى ەكەندىگىن جانە وسى شاراعا وراي ساتىلاتىن بيلەتتەردەن تۇسكەن قاراجات جەتىم جانە اتا-انالارىنىڭ قامقورلىعىنسىز قالعان جەتكىنشەكتەرگە قولداۋ رەتىندە بالالار ۇيلەرىنە جىبەرىلەتىنىن دە ايتا كەتكەن ءجون.
سونىمەن استانادا وتكەن شەشۋشى فينالعا ەلىمىزدىڭ تۇكپىر-تۇكپىرىنەن, ناقتىلاپ ايتقاندا ءار وڭىردە وتكەن تۋرلاردا جەڭىمپاز اتانعان 20 ايەل قاتىستى. ساحناعا توپتالا شىققان وسى ايەلدەر ەڭ الدىمەن, جۇرتشىلىق الدىندا ءوزىن-ءوزى تانىستىرعان بولسا, بۇدان كەيىن ولار وزدەرىنىڭ بولمىس-ءبىتىمىن, ينتەللەكتۋالدىق الەۋەتىن, تالعام-تالابىن, ءبىلىم-بىلىگىن كورسەتەتىن سۇراقتارعا جاۋاپ بەردى.
ناتيجەسىندە باس جۇلدەنى الماتىلىق, التى بالانىڭ اناسى ۆيكتوريا مومىنباەۆا جەڭىپ السا, ءبىرىنشى ورىندى دا الماتىلىق بەس بالا تاربيەلەپ وتىرعان انا اقنۇر جۇماباەۆا يەلەندى. ال ءىى ورىن سەمەيدەن كەلگەن ولگا ساعىندىقوۆاعا بۇيىردى. ءبىر ايتا كەتەتىن جايت, قازاق تىلىندە تازا سويلەيتىن ولگا دومبىرامەن كۇي تارتۋدا دا وزگە قۇربىلارىنان وق بويى وزىق كورىندى.
