اراب ەلدەرى پالەستينا اۆتونومياسىنىڭ 20 قىركۇيەكتە بۇۇ باس اسسامبلەياسىندا ۇسىنىلۋى ىقتيمال تاۋەلسىزدىك بەرۋ تۋرالى تاپسىرىسىن قولدايدى. بۇل تۋرالى كاتار پرەمەر-ءمينيسترى حاماد بين جاسيم ءال-تانيگە سىلتەمە جاساي وتىرىپ, «ءال-جازيرا» تەلەارناسى حابارلادى.
ءال-ءتانيدىڭ سوزىنە قاراعاندا, اراب مەملەكەتتەرىنىڭ ليگاسى (امل) استاناسى شىعىس يەرۋساليم بولاتىن تاۋەلسىز پالەستينا مەملەكەتىن قۇرۋ تۋرالى جوسپاردى قولداماق. بۇعان دەيىن اقش پرەزيدەنتى باراك وباما ەگەر پالەستينالىقتار بۇۇ-نىڭ قاۋىپسىزدىك كەڭەسىنە تاۋەلسىزدىك بەرۋ تۋرالى تالاپپەن شىققان جاعدايدا قۇراما شتاتتار ۆەتو قۇقىن پايدالاناتىنىن مالىمدەگەن ەدى. ال اتالعان ماسەلەدە ەو ەلدەرى ازىرشە ناقتى ءبىر ۇستانىمعا كەلە قويعان جوق.
اسكەري قىلمىستى دەگەن كۇدىك ءبىلدىردى
حالىقارالىق Amnesty International قۇقىق قورعاۋ ۇيىمى ليۆيانىڭ ۇلتتىق وتپەلى كەڭەسىنە (ۇوك) اسكەري قىلمىس جاسادى دەگەن كۇدىك ءبىلدىردى. ۇيىمنىڭ سايتىندا 107 بەتتەن تۇراتىن بايانداما جاريالانسا, وندا ۇوك-ءتىڭ ءۇستىمىزدەگى جىلدىڭ ءساۋىر – شىلدە ايلارى ارالىعىندا جاساعان قىلمىستارى سانامالانىپتى.
اتاپ ايتقاندا, باياندامادا ليۆيانىڭ بۇرىنعى باسشىسى مۋاممار كاددافيدىڭ ونداعان جاقتاستارى ولتىرىلگەنى, سونداي-اق ۇكىمەت اسكەرلەرىنىڭ تۇتقىنعا الىنعان كوپتەگەن سولداتتارى ازاپتالعانى كولدەنەڭ تارتىلادى. سونىمەن قاتار, ساحارانىڭ سولتۇستىگىندەگى افريكالىق تايپالار وكىلدەرىنە قاتىستى كسەنوفوبياعا باردى دەپ ايىپتايدى. باياندامادا اتاپ كورسەتىلگەنىندەي, ليۆيالىقتار قارا ناسىلدىلەرگە شابۋىل جاساپ, ولاردى توناۋمەن اينالىسقان.
ەۋروپاعا گاز قۇبىرى تارتىلۋى مۇمكىن
ەۋرووداق ازەربايجانمەن جانە تۇركىمەنستانمەن ترانسكاسپي گاز قۇبىرى قۇرىلىسىن باستاۋ تۋرالى كەلىسسوز جۇرگىزۋگە كەلىسىپ وتىر. اتالعان قۇبىر مەن وتىن كاسپي تەڭىزىنىڭ قايراڭى ارقىلى ەۋروپا ەلدەرىنە جەتكىزىلۋى ءتيىس.
باكۋمەن جانە اشعابادپەن كەلىسسوزدەردى ەو-عا مۇشە بارلىق 27 مەملەكەت اتىنان ەۋروكوميسسيا جۇرگىزەدى دەپ بەلگىلەنگەن. «ينتەرفاكستىڭ» اتاپ كورسەتكەنىندەي, ەو ينفراقۇرىلىمدىق جوبا بويىنشا كەلىسىم جاساسۋدى العاش رەت ۇسىنىپ وتىر. ەگەر جوبا جۇزەگە اسا قالعان جاعدايدا ترانسكاسپي گاز قۇبىرى وڭتۇستىك ءدالىز دەلىنەتىننىڭ ءبىر بولشەگى بولۋى ءتيىس. ەو-داعىلار وسىلايشا رەسەي گازىنا دەگەن تاۋەلدىلىكتى تومەندەتپەك.
پرەزيدەنتتىكتەن ۇمىتكەر سانى ازايدى
قىرعىزستاننىڭ ورتالىق سايلاۋ كوميسسياسى وتكەن اپتانىڭ سوڭىندا پرەزيدەنتتىك سايلاۋعا قاتىسۋشىلاردى قولداپ, قول قويعان قاعازداردى قابىلداۋدى اياقتادى. وسك-گە قول جيعان قاعازدارىن رەسپۋبليكا باسشىلىعىنان ۇمىتكەرلەردىڭ تەك 37-ءسى عانا تاپسىرىپ ۇلگەرگەن.
وسى ارالىقتا كانديداتتاردىڭ 4-ەۋى مەملەكەتتىك ءتىلدى بىلۋدەن تاپسىرعان سىناقتان وتە الماعان. ءسويتىپ, پرەزيدەنتتىككە تالاستى 33 ادام جالعاستىراتىن بولدى. وسىلايشا اۋەلگى وسىنداي نيەتتەگىلەردىڭ 50-ءى «كەمە سىرتىندا» قالدى. ونىڭ ۇستىنە پرەزيدەنتتىك جارىستان «ەل-جۇرت» پارتياسىنىڭ سەركەسى كۋبانىچبەك اپاس تا شىعىپ قالاتىن سەكىلدى. ويتكەنى, ول جيناعان قول 30 مىڭعا جەتپەيدى ەكەن.
لاڭكەستەر دەگەن ايىپ تاعىلدى
يوردان وزەنىنىڭ باتىس جاعالاۋىندا ءىس-قيمىل تانىتىپ جۇرگەن يزرايل ەكسترەميستەرىنە لاڭكەستەر دەگەن ايىپ تاعىلدى. ويتكەنى, ولار وڭىردەگى اراب تۇرعىندارىنا قارسى جەكەلەگەن اكتسيالاردان جوسپارلانعان ءىس-ارەكەتتەرگە كوشكەن. سولاردىڭ ءبىرى – بەلگىلى ءبىر ماقساتتا اقپارات جيناۋ.
ماسەلەن, وتكەن اپتادا راديكالدى پيعىلداعى يزرايلدىك قونىستانۋشىلار بىردەن بىرنەشە اكتسيا ۇيىمداستىرعان. ولار ارابتىڭ كۋسرا ەلدى مەكەنىندە مەشىتتى ورتەپ, ياتما اۋىلىنداعى جانە بير-زەيت قالاشىعىنداعى مەشىتتەر قابىرعالارىنا ار-نامىسقا تيەتىن سوزدەر جازعان. سونداي-اق پالەستينالىقتاردىڭ يەلىگىندەگى اۋىل شارۋاشىلىعى جەرلەرىن بۇلدىرگەن.
تەررورعا قارسى پيكەتتى بولدىرمادى
تاشكەنتتە تەرروريزمدى ايىپتاعان ۇرانمەن پيكەت ۇيىمداستىرماقشى بولعان قۇقىق قورعاۋشى ابدۋللو تودجيباي قاماۋعا الىنعان. ول ءوزىنىڭ اكتسياسىن 2001 جىلدىڭ 11 قىركۇيەگىندە اقش-تا جاسالعان قانقۇيلى لاڭكەستىكتىڭ 10 جىلدىعىنا ورايلاستىرىپ ۇيىمداستىرماق ەكەن.
سونىڭ الدىندا قۇقىق قورعاۋشى ينتەرنەت ارقىلى جاقتاستارىن ءوزى ۇيىمداستىراتىن اكتسياعا قاتىسۋعا شاقىرىپتى. 11-ءى كۇنى تاڭەرتەڭ بەلگىلەنگەن جەر – «ەرلىك» مونۋمەنتى جانىنا كەلگەن كەزدە ونى ميليتسيا قىزمەتكەرلەرى كۇتىپ تۇرسا كەرەك. ءسويتىپ, ول بىردەن قاماۋعا الىنىپتى. بيلىك قۇقىق قورعاۋشىنىڭ ارەكەتىنەن استارلى مەڭزەۋ ىزدەپ تاپقان سەكىلدى.
قىسقا قايىرىپ ايتقاندا:
تۇركيا پرەمەر-ءمينيسترى رەدجەپ تايىپ ەردوعان ءوز ەلىنىڭ تاياۋ شىعىستا جانە اراب الەمىندە كوشباسشى مەملەكەت بولۋ نيەتى بار ەكەنىن مالىمدەدى. وسى ماقساتتا ول بىرقاتار اتالعان ايماق ەلدەرىن ارالاپ قايتپاق. ال گازا سەكتورىنا بارۋدىڭ ۋاقىتى ازىرشە كەلگەن جوق, دەيدى ر.ەردوعان. يراكتىڭ شالعايداعى باتىس اۋدانىندا 22 قاجى-ءشيتتىڭ ءمۇردەلەرى تابىلعان. ولاردىڭ بارلىعى اتىپ ءولتىرىلىپتى. قاجى-شيتتەر يراكتىڭ وڭتۇستىگىندەگى قاسيەتتى كەربەلا قالاسىنان سيرياعا باعىت السا كەرەك. حالىقارالىق ۆاليۋتا قورى قىسقا مەرزىمدە پورتۋگالياعا 4 ميلليارد ەۋرو بولەتىن بولادى. مۇنداي شەشىمدى حۆق-نىڭ اتقارۋشى كەڭەسى قابىلداعان. جالپى, پورتۋگاليا حۆق مەن ەۋروپا وداعىنان ءۇش جىل ىشىندە 78 ميلليارد ەۋرو الادى. ال جوعارىداعى 4 ميلليارد ەۋرو حۆق ۋادە بەرگەن 27 ميلليارد ەۋرونىڭ ءبىر بولىگى بولىپ تابىلادى. تاجىكستاننىڭ سولتۇستىگىندەگى چوركۋ ەلدى مەكەنىندە اسكەري كوميسسارياتتىڭ باستىعى سوديك اشۋروۆ ۇرىپ ولتىرىلگەن. بەلگىسىز بىرەۋلەر اشۋروۆتى ۇيىنە قايتىپ كەلە جاتقاندا سوققىعا جىققان. اسكەري كوميسسارياتتىڭ باستىعىنا نە ءۇشىن شابۋىل جاسالعانى ازىرشە بەلگىسىز.ينتەرنەت ماتەريالدارى نەگىزىندە ازىرلەندى.
