«قازاقفيلم» كينوستۋدياسىنىڭ شاڭىراق كوتەرگەنىنە – 70 جىل
ناقتى دەرەككە سۇيەنسەك, قازاق سسر حالىق كوميسسارلارى كەڭەسىنىڭ 1941 جىلعى 12 قىركۇيەكتەگى №762 قاۋلىسىنا سايكەس الماتى كوركەمفيلم كينوستۋدياسى قۇرىلىپ, مۇنان كەيىن 1960 جىلى بۇل ات «قازاقفيلم» كينوستۋدياسى بولىپ وزگەرگەنى ءمالىم. ودان سوڭعى مادەنيەت وشاعى تاريحىنداعى ايتۋلى وقيعانىڭ ءبىرى – 1984 جىلى «قازاقفيلم» كينوستۋدياسىنا قازاقتىڭ ايتۋلى كينورەجيسسەرى, ساحنا ساڭلاعى شاكەن ايمانوۆتىڭ ەسىمى بەرىلگەندىگى. وسى ارالىقتا 228 تولىقمەتراجدى, 70 قىسقامەتراجدى كوركەمفيلم ەكرانعا جول تارتسا, 1133 دەرەكتى, 139 انيماتسيالىق تۋىندى كورەرمەننىڭ كوزايىمىنا اينالىپ ۇلگەردى.
«ەلۋ جىلدا – ەل جاڭا» دەيدى حالقىمىز. ەندەشە, ءبۇگىنگى كورەرمەن تالعامى مەن تالابىنا ساي ءونىم ۇسىنۋ كينوگەرلەرگە ۇلكەن جاۋاپكەرشىلىك جۇكتەيدى دەسەك, «قازاقفيلم» كينوستۋدياسى دا ءوزىن سوڭعى ۋاقىتتا تىڭ يدەيالار مەن جوبالار ارقىلى تانىتا تۇسۋدە. ستۋديانىڭ العاشقى كەزەڭى مەن قازىرگى تىنىسىن سالىستىرعاندا, اراسى جەر مەن كوكتەي دەپ ايتۋعا بولادى. ش.ايمانوۆ اتىنداعى بۇگىنگى «قازاقفيلم» اكتسيونەرلىك قوعامى زامان ۇنىنە ساي تەحنولوگيامەن جابدىقتالعان جوعارى ۇلگىدەگى كينوستۋديا سانالادى. حالىققا ساپالى ءونىم ۇسىنۋدا وزگە ءارىپتەستەرىنەن وق بويى وزىق كەلە جاتقان ستۋديانىڭ نەگىزگى ماقساتى كورەرمەندى كوركەم, دەرەكتى, انيماتسيالىق تۋىندىلارمەن قامتاماسىز ەتە وتىرىپ, شەتەلدىك فيلمدەردى قازاق تىلىنە ءتارجىمالاۋ دەسەك, ستۋديادا ساندىق كەشەننىڭ بولۋى قازىرگى كورەرمەن تالعامىنان شىعۋعا جاسالعان تاعى ءبىر ءمۇمكىندىك ەكەنى راس. ورتالىق ازيا بويىنشا تەك قانا قازاقستاندا عانا «Dolby» قايتالاپ جازۋ جۇيەسىنىڭ ورنى ەرەكشە سانالادى. دىبىستىق جازبالار, ءتارجىمالاۋ, ءونىمدى ءتۇرلى فورماتقا ءتۇسىرۋ, ت.ت سول سياقتى نەگىزگى جۇمىستاردىڭ ءجۇزەگە اسىرىلۋى ۋاقىتقا ساي جاڭعىرىپ, ەكى ءتۇسىرىلۋ پاۆيلونىنا يە بولۋ دەگەنىمىز قازاق ۇلتتىق كينوونەرىنىڭ جاڭا بەلەسكە كوتەرىلۋىنىڭ بىردەن-ءبىر ايعاعى بولىپ تابىلادى. جاڭا تەحنولوگيامەن جابدىقتالعان انيماتسيالىق كەشەن دە الۋان ءتۇرلى قىزمەتىمەن نازار اۋدارتادى. ال ەندى ونىڭ ناقتى ءناتيجەلەرى تۋرالى ءسوز ەتسەك, سوڭعى جىلدارعى قارقىن ايتارلىقتاي, ەكرانعا كوركەمدىك دەڭگەيى مەن ساپاسى كوڭىل كونشىتەرلىك دۇنيەلەر كوپتەپ شىعا باستادى. رەجيسسەر فارحاد ءشارىپوۆتىڭ «قىزعىلت قويان تۋرالى ەرتەگى», اقان ساتاەۆتىڭ «ليكۆيداتور», ءرۇستەم ابدراشەۆتىڭ «بالالىق شاعىمنىڭ اسپانى», قاناعات ءمۇستافيننىڭ «سەكىرىس», ەرجان رۇستەمبەكوۆ پەن الەكساندر چەرنياەۆتىڭ «ماحاببات تالكەگى» فيلمدەرى كوپشىلىكتەن وڭ باعاسىن الىپ, تاۋەلسىزدىك جىلدارىنداعى قازاق كينوسىنىڭ ايتارلىقتاي جەمىسىنە باعالانىپ وتىر.
«ەگەمەن-اقپارات».
