ماجىلىستە 2017 – 2019 جىلدارعا ارنالعان رەسپۋبليكالىق بيۋدجەت تۋرالى زاڭ جوباسى قارالادى, دەپ جازادى strategy2050.kz.
سپيكەر نۇرلان نىعماتۋليننىڭ توراعالىعىمەن ءماجىلىس بيۋروسى ءوتتى. وندا سالالىق كوميتەتتەردىڭ ۇسىنىسىمەن پالاتانىڭ الداعى جالپى وتىرىسىندا قارالاتىن كۇن ءتارتىبىنىڭ جوباسى ناقتىلاندى, دەپ حابارلادى ءماجىلىستىڭ ءباسپاسوز قىزمەتى.
جاڭا زاڭ جوباسى بويىنشا, 2017-2019 جىلدارعا ارنالعان رەسپۋبليكالىق بيۋدجەتتى بەكىتۋدە مۇنايدىڭ قۇنى بۇگىنگە دەيىن بەلگىلەنگەن 35 دوللاردان 50 دوللارعا كوتەرىلىپ, دوللاردىڭ باعامى 360 تەڭگەدەن 330 تەڭگەگە ءتۇسىرىلدى. ال مەتالل قۇنى 2016 جىلعى كورسەتكىشتەن 5,5 پايىز ارتىق بولادى دەپ ەسەپتەلدى. بۇل تۋرالى قر ۇلتتىق ەكونوميكا ءمينيسترى تيمۋر سۇلەيمەنوۆ مالىمدەدى.
دەپۋتاتتاردىڭ تالقىلاۋىنا ءبىرىنشى وقىلىمعا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ جۇيەسىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى شىعارىلاتىن بولدى.
ەكىنشى وقىلىمدا ءۇش زاڭ جوباسى: قىلمىستىق-اتقارۋ زاڭناماسىن جەتىلدىرۋ مەن ازاماتتىق زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ جانە ەكولوگيالىق ماسەلەلەرگە ەنگىزىلەتىن جاڭالىقتار تالقىلاناتىن بولادى.
كۇن تارتىبىندە ماجىلىسكە جاڭادان كەلىپ تۇسكەن زاڭ جوباسى دا بولدى. ول – «2017 – 2019 جىلدارعا ارنالعان رەسپۋبليكالىق بيۋدجەت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى. وسى زاڭ جوباسى بويىنشا سالالىق كوميتەتكە قورىتىندى ازىرلەۋ تاپسىرىلدى.
