قاڭتاردا 4 كاسىبي بوكسشىمىز جەكپە-جەك وتكىزەدى

جاڭا جىلدىڭ العاشقى ايىندا 4 قازاقستاندىق كاسىبي رينگكە ورالادى. قازاقستاندىق كاسىبي بوكسشىلار اراسىندا جىلدىڭ العاشقى كەزدەسۋىن باقتيار ەيۋبوۆ (11-0-0, 10كو) باستايدى, دەپ حابارلايدى قازاقپارات. boxrec.com سايتىنىڭ جارىستار كەستەسىنە سۇيەنسەك, جارتىلاي ورتا سالماقتا ونەر كورسەتىپ جۇرگەن وتانداسىمىز باقتيار ەيۋبوۆ 7 قاڭتاردا جانە 22 قاڭتاردا ەكى كەزدەسۋ وتكىزۋدى جوسپارلاپ وتىر. ول ەرتەڭ اقش-تىڭ ديربورن قالاسىندا ارگەنتينالىق ەلۆين پەرەسپەن ( 28-16-4, 19KO) جۇدىرىقتاسادى, ال 22 قاڭتارداعى قارسىلاسى ازىرگە بەلگىسىز. 2016 جىلدىڭ قاراشا ايىندا ورتا سالماقتا كاسىبي مانسابىن باستاعان  بوبيرجان مومينوۆ ( 1-0-0, 1كو) 14 قاڭتار اقش-تىڭ مەيكون قالاسىندا اقش بوكسشىسى ستيۆەن باسسپەن (1-4-0) 4 راۋندتىق كەزدەسۋ وتكىزەدى. كانادادا ونەر كورسەتىپ جۇرگەن جەرلەستەرىمىز ءبىرىنشى جارتىلاي ورتا سالماقتاعى باتىر جۇكەمباەۆ ( 7-0-0, 6كو) پەن جەڭىل سالماقتاعى ابىلايحان قۇسايىنوۆ (4-0-0, 3كو) 28 قاڭتاردا كانادانىڭ مونرەال قالاسىندا جەكپە-جەك وتكىزەدى, قارسىلاستارى ازىرگە بەلگىسىز. ايتا كەتەرلىگى, 2017 جىلى قازاقستاندىق كاسىپقوي بوكستىڭ سەركەلەرى, ورتا سالماقتاعى WBA, IBF, IBO جانە WBC چەمپيونى گەننادي گولوۆكين (36-0-0, 33كو) 18 ناۋرىزدا نيۋ-يوركتە WBA تۇراقتى چەمپيونى دەنيەل دجەيكوبسپەن (32-1, 29 كو), سونداي-اق اسا جوعارى سالماقتاعى WBA تۇراقتى الەم چەمپيونى بەيبىت شۇمەنوۆ (17-2, 11 كو) 11 اقپان كۇنى ماياميدە WBA نۇسقاسىنىڭ ۋاقىتشا چەمپيونى, كۋبالىق بوكسشى يۋنيەر دورتيكوسپەن (21-0, 20 كو), WBA-نىڭ ۋاقىتشا الەم چەمپيونى جانات جاقيانوۆ (26-1,18 كو) 10 اقپاندا اقش-تا WBA (Super) جانە IBO تيتۋلى ءۇشىن كۋبالىق راۋسحي ۋوررەنپەن (14-1-0,4كو) جۇدىرىقتاساتىن بولادى.