اقمولا 17 سپورتشىسىن اتتاندىرادى

الەمدىك دەڭگەيدەگى ءدۇبىرلى دودا جاقىنداعان سايىن اقمولالىق سپورت­شىلاردىڭ دا جۇرەك ءدۇرسىلى جيىلەي باستاعانداي. ايتكەنمەن, وبلىستىق سپورت باسقارماسى باسشىسىنىڭ ورىنباسارى اسەت بۇكىباەۆتى جولىقتىرعانىمىزدا, جۇزىنەن جانعا جايلى جىلىلىق باي­قادىق. ءسوزىنىڭ نىقتىلىعىنان بولسا كەرەك, اسا الاڭدارلىق جاعدايدى كورىپ تۇرعانىمىز جوق. – وزدەرىڭىز بىلەسىزدەر, الامان ءباي­گەگە ەڭ مىقتىلار جولداما الدى, – دەيدى ول. – جولدامانىڭ سالماعى وتە اۋىر. وبلىستىق, رەسپۋبليكالىق, حالىقارالىق دارەجەدەگى كوپتەگەن جارىستارعا قا­تىستىق. ۋنيۆەرسيادا الدىنداعى تەستىك دودالار ايرىقشا تارتىستى ءوتتى. بۇل – ءوز تاۋەلسىزدىگىنىڭ 25 جىلدىعىن تولايىم تابىستارمەن اتاپ وتكەن قازاقستاننىڭ تمد اۋماعىندا تۇڭعىش رەت وتكىزىلگەلى وتىرعان ۋنيۆەرسياداسى. نامىس پەن جىگەردى قايرار بايراقتى باسەكەگە وبلىسىمىزدىڭ 17 سپورتشىسى قاتىساتىنى ۇلكەن قۋانىش. ءبىز ولارعا تەك قانا تابىس تىلەيمىز. اقمولا جۇرتشىلىعى ۋنيۆەرسيادا قۇرمەتىندەگى سپورتتىق, مادەني-كوپشىلىك شارالاردى جىل بويى جالعاستىردى. قازىر ەڭ ۇلكەن وقيعا – ۋنيۆەرسيادا الاۋىن وڭىرلەردە العاش تۇتاتۋعا ارنالعان سالتاناتقا دايىندىق قىزۋ ءجۇرىپ جاتىر. ۇيىمداستىرۋ القاسى بەكىتكەن كەستەگە ساي اقمولا وبلىسىندا ۋنيۆەرسيادا الاۋىن جاعۋ ەستافەتاسى 26 قاڭتاردا وتكىزىلەدى. ال الماتىداعى دۇنيەجۇزىلىك ۋنيۆەرسيادانىڭ اشىلۋ سالتاناتىندا وبلىس اتىنان كىشى وليمپيادا الا-ۋىن الىپ شىعۋ قۇرمەتى كوكشەتاۋداعى ا.مىرزاحمەتوۆ اتىنداعى ۋنيۆەرسيتەتتىڭ ستۋدەنتى, بوكستان الەم چەمپيونى دينا جولامانعا بەرىلىپ وتىر. جالپى, اقمولالىق سپورتشىلاردان ۋنيۆەرسيادا باعدارلاماسىنداعى شاڭعى جارىسىنا ولگا ماندريك, ولجاس كليمين, كونستانتين بورتسوۆ, ۆالەنتينا ەبەل جانە ۆالەريا تيۋلەنوۆا قاتىسادى دەپ كۇتىلۋدە. بياتلوننان ەلىمىزدىڭ نامىسىن اننا كيستانوۆا, الينا رايكوۆا, تيمۋر حاميتگاتين, اناستاسيا كوندراتەۆا جانە رومان ەرەمين قورعايدى. وسى ورايدا, الەنا رايكوۆانىڭ 2015 جىلعى ۋنيۆەرسيادا كەزىندە 15 شاقىرىمدىق قاشىقتىقتا جەكە باسەكەدە الدىنا جان سالماعانىن اتاپ وتكىمىز كەلەدى. الەم كۋبوگىنىڭ كەزەڭدىك جارىستارىندا دا ءتاۋىر كور­سەتكىشتەرگە جەتىپ ءجۇر. سونداي-اق, اتالعان ۋنيۆەرسيادادا قازاقستاننىڭ ارالاس ەستافەتاشىلار قۇرامىندا بولىپ, جۇلدەلى ەكىنشى ورىننان كورىنگەن اننا كيستانوۆانىڭ دا العى شەپتەن كورىنەتىنىنەن ءۇمىتتىمىز. شايبالى حوككەيدەن اقمولالىق التى سپورتشى سىنعا تۇسپەك. اتاپ ايتساق, كونستانتين ساۆەنكوۆ, انتون پەتروۆ, پاۆەل اكولزين, انتون بۋردەلەۆ, ۆيكتور يۆاشين, الەكساندر كازناچەەۆ قۇراماداعى بەلدى ويىنشىلار قاتارىندا. سونداي-اق, اناستاسيا سۋرگاي كەرلينگ سپورتى بويىنشا باق تالاستىرادى. اقمولالىق باپكەرلەردىڭ بولجا­مىنا قاراعاندا, جەرلەستەرىمىزدىڭ ۋنيۆەرسيادادا توپ جارىپ, جۇلدەگەر اتانۋىنا تولىق مۇمكىندىكتەرى بار. باقبەرگەن امالبەك, «ەگەمەن قازاقستان»