سەمەيدە ارەندالىق تۇرعىن ۇيگە قۇجات قابىلداۋ باستالدى

سەمەيدە 5 قاڭتاردان باستاپ, «وڭىرلەردى دامىتۋدىڭ 2020 جىلعا دەيىنگى باعدارلاماسى» نەگىزىندە «قازاقستان يپوتەكالىق كومپانياسى» اق ارقىلى جۇزەگە اسىرىلاتىن ارەندالىق تۇرعىن ۇيلەرگە قۇجاتتاردى قابىلداۋ باستالدى, دەپ حابارلايدى «قازاقپارات». قالالىق تۇرعىن ءۇي-كوممۋنالدىق شارۋاشىلىعى (تكش) ءبولىمىنىڭ حابارلاۋىنشا, جالعا بەرىلەتىن باسپاناعا وتىنىشتەر جەتى سانات بويىنشا قابىلدانادى - تولىق ەمەس جانە كوپبالالى وتباسىلار, اتا-انا قامقورلىعىنسىز قالعان جانە جەتىم بالالار, 1-2 توپ مۇگەدەكتەرى, مۇگەدەك بالا تاربيەلەپ وتىرعان وتباسىلار, مەملەكەتتىك جانە بيۋدجەتتىك مەكەمە قىزمەتكەرلەرى, ورالماندار, اسكەري قىزمەتشىلەر جانە ت.ب. باعدارلاماعا قاتىسۋشىلار ءتىزىمى توپتار بويىنشا جاساقتالادى, تولىق مالىمەتتى سەمەي اكىمدىگىنىڭ تكش بولىمىنەن بىلۋگە بولادى. وسى جەردەن قاجەتتى قۇجاتتاردىڭ ءتىزىمىن دە الۋعا بولادى. تۇرعىن ءۇي گلينكا كوشەسىندە ورنالاسقان. ساتىپ الۋ قۇقىعىمەن جالعا الۋ قۇنى 1 شارشى مەترى ءۇشىن شامامەن 924 تەڭگەنى قۇرايدى. جالعا الۋ مەرزىمى - 20 جىل.  ونىمەن ءبىر مەزگىلدە, شقو ەنەرگەتيكا جانە تكش باسقارماسىنان ءمالىم ەتكەندەي, مەملەكەتتىك تۇرعىن ءۇي قورىنان باسپانا الۋعا وبلىس بويىنشا 27 685 ادام كەزەكتە تۇر. بۇلار - جوعارىدا اتالعان ساناتقا (مۇگەدەكتەر, جەتىم بالالار, الەۋمەتتىك ءالسىز توپتار, اپاتتى ءۇي تۇرعىندارى, مەملەكەتتىك جانە بيۋدجەتتىك قىزمەتكەرلەر ت.ب.) جاتاتىن شىعىسقازاقستاندىقتار.