سىر ەلى جۇرتشىلىعى ريزاشىلىعىن بىلدىرەدى

مەملەكەت باسشىسى نۇرسۇلتان نازارباەۆتىڭ اتىنا ەل تاۋەلسىزدىگىنىڭ 25 جىلدىق مەرەيتويىنا وراي قىزىلوردا وبلىسى جۇرتشىلىعى وكىلدەرىنەن قۇتتىقتاۋ حات كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى. قىزىلوردا وبلىستىق قوعامدىق كەڭەسىنىڭ مۇشەلەرى, ءماسليحات دەپۋتاتتارى, وبلىستاعى قازاقستان حالقى اسسامبلەياسىنىڭ مۇشەلەرى, ارداگەرلەر كەڭەسى, ازاماتتىق قوعام ينستيتۋتتارى مەن جاستار ۇيىمدارى اتىنان جولدانعان حاتتا تاۋەلسىزدىكتىڭ شيرەك عاسىرىندا ەلىمىز قول جەتكىزگەن جەتىستىكتەردىڭ ءبىرى رەتىندە ارال تەڭىزىنىڭ قازاقستان اۋماعىنداعى بولىگىنىڭ قايتادان سۋعا تولىپ, تىرشىلىكتىڭ ورالعانى ەرەكشە اتاپ ايتىلعان. سونداي-اق, حات يەلەرى ارال ءوڭىرى حالقىنىڭ تىنىسى كەڭەيىپ, تۇرمىسى تۇزەلە باستاعانىنا نازار اۋدارعان. «ءوزىڭىز باستاپ, ىسكە اسىرعان ارالدى قالپىنا كەلتىرۋ جوباسىنىڭ ناتيجەسىندە ولگەنىمىز ءتىرىلىپ, وشكەنىمىز جاندى. وبلىس ىدىراپ, حالقى بوسىپ كەتۋگە از قالعان كيەلى ايماقتى ساقتاپ قالدىڭىز. اتا قونىس پەن ءوز كاسىبىنە ورالعان ءبىر قاۋىم ەل ەڭسە كوتەردى. ارالدىڭ بالىعى ءوزىڭىز سالدىرعان جاڭا جولمەن ەۋروپاعا مىڭ توننالاپ ەكسپورتقا شىقتى. اۋىل شارۋاشىلىعىنا كورسەتىلگەن كومەكتىڭ ارقاسىندا مالشىلار مال باسىنان, كۇرىششىلەر القاپتارىنان جىلدان جىلعا رەكوردتىق ءوسىم مەن ءونىم الۋدا», – دەلىنگەن حاتتا. بۇدان بولەك, «نۇرلى جول» باعدارلاماسىنىڭ ارقاسىندا ايماقتاعى قۇرىلىس قارقىنى بۇرىن-سوڭدى بولماعان دەڭگەيگە كوتەرىلگەنى ايتىلعان. «قالامىز قۇلپىرىپ, مىڭداعان وتباسى جاڭا ۇيدەن باسپانا الىپ جاتىر. تەك وتكەن ءۇش جىلدا وبلىس ورتالىعىندا 11 جاڭا شاعىن اۋدان بوي كوتەردى» دەپ جازادى حات يەلەرى. قىزىلوردالىقتار وسىنداي يگى ءىس-شارالار تاۋەلسىزدىكتىڭ 25 جىلدىق مەرەيتويىن شىن مانىندە ەلدىك مەرەكەگە اينالدىرۋعا سەپتىگىن تيگىزەتىنىن سەنىممەن اتاپ وتكەن.