كەنت تۇرعىندارى ەلباسىن قولدايدى

ءبىز ەكىباستۇز قالاسىنا قاراستى سولنەچنىي كەنتىندە تۇرامىز. مەملەكەت باسشىسى نۇرسۇلتان نازارباەۆتىڭ ەل تاۋەلسىزدىگىنىڭ 25 جىلدىعىنا ارنالعان سالتاناتتى جينالىستا سويلەگەن ءسوزىن تەلەديدار ارقىلى تىڭداپ, كورىپ وتىردىق. ەلباسىنىڭ ءوزى دە «قازىر تىكەلەي ەفيردەن ءبىزدىڭ سالتاناتتى جينالىسىمىزدى بۇكىل ەلىمىز كورىپ وتىر. سوندىقتان وسى كۇردەلى جىلداردا وتانىمىزدىڭ يگىلىگى جولىندا ءبىرتۇتاس وتباسى سەكىلدى جۇمىلا جۇمىس ىستەگەن بارشاڭىزعا شىن كوڭىلدەن شىققان ريزاشىلىعىمدى بىلدىرگىم كەلەدى. ەلىمىزدەگى بارشا قازاقستاندىقتارعا, قازىر تەلەديدار ەكرانىنىڭ الدىندا وتىرعان ءار قالا مەن اۋىلداعى ادامدارعا, ءتىپتى وسى مەرەكەلى كۇندەرى جۇمىستارىن جالعاستىرىپ جاتقانداردىڭ بارىنە, بارشا ازاماتتارعا – جۇمىسشىلار مەن فەرمەرلەرگە, مۇعالىمدەر مەن دارىگەرلەرگە, عالىمدار مەن كاسىپكەرلەرگە, ونەر جانە مادەنيەت قايراتكەرلەرىنە, مەملەكەتتىك قىزمەتكەرلەر مەن اسكەري قىزمەتكەرلەرگە, جاستارىمىزعا ريزاشىلىعىمدى بىلدىرەمىن», دەدى. ارينە, جيىندى تىكەلەي ەفير ارقىلى كورگەن ءبىزدىڭ كەنت تۇرعىندارى دا, ەلىمىزدىڭ باسقا دا حالقى سياقتى, ريزالىق ءبىلدىرىپ, جالىندى سالەم جولدايدى. ال, ءبىزدىڭ كەنت ءوندىرىستى كەنت, وسى جەردە الەمگە ايگىلى گرەس-2 ستانساسى ورنالاسقان. جالپى, تۇرعىندارىمىزدىڭ سانى ءارتۇرلى ۇلت وكىلدەرىنەن قۇرالعان 7 مىڭداي ادامدى قۇرايدى. بىلتىر وزبەكستان مەن موڭعوليادان بىرنەشە وتباسى كوشىپ كەلدى. مەملەكەتتىك تۇرعىن ءۇي قورىنان ەسەپتە تۇرعان 4 ورالمان وتباسى پاتەرلەر كىلتىن الدى. نۇرسۇلتان نازارباەۆتىڭ جيىندا «اتامەكەنىنە اعىلعان قازاقتىڭ كوشى 25 جىلدان بەرى ءبىر ءسات تە توقتاعان ەمەس, قازىر دە جالعاسۋدا...» دەپ اتاپ ءوتۋى دە سوندىقتان. ءبىزدىڭ تۇرعىندارىمىز ەكىباستۇزدا, ءوزىمىزدىڭ ستانسادا ەڭبەك ەتۋدە. بارلىعى دا تۇگەلدەي ەڭبەكپەن قامتاماسىز ەتىلگەن. ءوندىرىس پەن اۋىل ءبىر-بىرىنە قاراسىپ, بىرلەسە جۇمىس جاساۋدا. ستانسا – ءبىزدىڭ كەنتتىڭ باستى دەمەۋشسى, قولداۋشىسى. «ءبىز جالپىعا ورتاق ەڭبەك قوعامى بىرەگەي يدەياسىن تابىستى جۇزەگە اسىرىپ جاتىرمىز. بىزدە جۇمىسسىزدىق 2,6 ەسەگە قىسقاردى. سوڭعى بەسجىلدىقتا ءبىز جىلدا ورتا ەسەپپەن 270 مىڭ جاڭا جۇمىس ورنىن اشىپ كەلەمىز. كەيىنگى ون جارىم جىل ىشىندە ورتاشا ەڭبەكاقى مەن زەينەتاقى 10 ەسەدەن استامعا ۇلعايدى. اۋىلدى كوتەرۋدىڭ اۋقىمدى باعدارلاماسى جۇزەگە اسىرىلدى, اۋىلدىقتاردىڭ تۇرمىس دەڭگەيى ءوستى», دەپ اتاپ ءوتتى پرەزيدەنت. كەنتتىڭ نەگىزگى سالاسى ونەركاسىپ, سونداي-اق, مال شارۋاشىلىعىن, شاعىن جانە ورتا بيزنەستى دامىتۋ بولىپ تابىلادى. وسى سالتاناتتى جيىندا ەلباسى «ءبىز – دالامىز بەن قالامىزدى بىرگە كوركەيتكەن قۋاتتى حالىقپىز, ارقا توسىنە تاۋەلسىزدىگىمىزدىڭ سالتاناتتى سيمۆولى – ەلوردامىزدى ورناتقان حالىقپىز» دەپ ايتىپ وتكەنى ءبىزدىڭ دە كەنتكە ايتىلعانداي, ويتكەنى, كەڭ دالادا ورىن تەپكەن كەنتىمىزدى, بيىككە اۋەلەگەن ستانسانىڭ الىپ مۇرجاسى ەرەكشە ەتىپ كورسەتەدى. مۇندا تىنىمسىز ەڭبەك, ويتكەنى بۇل جەردە ەلەكتر ەنەرگياسى وندىرىلەدى. قازىر گرەس-2-دە ءبىرىنشى ەنەرگوبلوكتى كۇردەلى ءجون­دەۋ اياقتالدى. ىسكە اسىرىلعان ءجون­دەۋ جۇمىستارى ەنەرگەتيكالىق جاب­دىق­تاردىڭ جۇمىس ىستەۋ مەرزىمىن ۇزارتۋ­دى, ەنەرگوبلوك جۇمىسىنىڭ سەنىمدى­لىگىن جانە ۇنەمدىلىگىن ارتتىرۋدى قام­تاماسىز ەتەدى. ەلباسى جيىندا «ءبىز ەكونو­ميكانىڭ ءتيىمدى مودەلىن جاسادىق. بىزدە كوممۋنيكاتسيانىڭ, ءوندىرىستىڭ, ەلەكتر تاراتۋدىڭ بىرىڭعاي جۇيەسى بول­عان جوق. ءبىز ونى تاۋەلسىزدىك جىلدارى قالىپ­تاستىردىق. اۆتوموبيل جولدارى مەن تەمىر جولدار ءبىزدىڭ بايتاق ەلىمىز­دىڭ ءار تاراپىن تىكەلەي بايلانىستىرماي­تىنداي ەتىپ سالىنىپ, بارلىعى دا سول­تۇستىككە قاراي كەتەتىن», دەپ ايتىپ ءوتتى. 2014-2018 جىلدارعا ارنالعان جۇ­مىسپەن قامتۋدىڭ جول كارتاسىن ءازىر­لەدىك, ونىڭ نەگىزىندە وسى باعىتتاردا مونيتورينگ جانە جۇيەلى جۇمىس جۇرگىزىلىپ كەلەدى. بيىل مەملەكەتتىك تۇرعىن ءۇي قورىنان جالپى ەسەپتە تۇرعان 17 ازامات تۇرعىن ءۇي الدى. الداعى جىلى كەنتتە 700 وقۋشىعا ارنالعان قازاق مەكتەبىنىڭ قۇرىلىسى باستالادى. مارجان الشىمباەۆا, سولنەچنىي كەنتىنىڭ اكىمى پاۆلودار وبلىسى, ەكىباستۇز قالاسى