ەل ءناسىبىن ەسەلەگەن

اۋىل شارۋاشىلىعىن قارجىلاي قولداۋ قورىنىڭ قامقورلىعى بۇگىندە اۋىل تۇرعىندارىن جۇمىسپەن قامتىپ, ولاردى كاسىپكەرلىككە تارتۋ مىندەتى كۇن تارتىبىندە تۇر. ەلباسىنىڭ بۇل تاپسىرماسىن ورىنداۋدىڭ ءتيىمدى ءبىر جولىن «اۋىل شارۋاشىلىعىن قارجىلاي قولداۋ قورى» اق ۇسىنىپ, اگرارلى سالادا جاقسى ناتيجەگە جەتىپ وتىرعانىن اۋىل حالقى راستاۋدا. الماتى وبلىسىنىڭ قاراتال اۋدانىنداعى ۇشتوبە اۋىلىنىڭ تۇرعىنى قايرات باەكەنوۆ تۇراقتى جۇمىس ورنىن تابا الماي جۇرگەن جانداردىڭ ءبىرى ەدى. جالدامالى جۇمىس, جەكە اۆتوكولىگىمەن ادام تاسۋ سەكىلدى كۇنكورىس كوزدەرىن ىستەي ءجۇرىپ اۋدانداعى جۇمىسپەن قامتۋ ورتالىعىنا جۇمىسسىز ساناتى بويىنشا تىركەلگەن بولاتىن. كوپ ۇزاماي «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسى اياسىندا نەسيەلەۋگە جولداما الدى. «اۋىل شارۋاشىلىعىن قارجىلاي قولداۋ قورى» اق جۇزەگە اسىراتىن «بەرەكە» باعدارلاماسىنا سايكەس مال بورداقىلاۋدى دامىتۋ باعىتىندا جۇمىس باستاۋعا جولى اشىلدى. زاڭناما تالابىنا ساي اۋىل شارۋاشىلىعى سالاسى ماماندارىنىڭ كومەگىمەن قۇجاتتار ەش كەدەرگىسىز تولتىرىلىپ 1,6 ميلليون تەڭگەنى 4 جىلعا جىلدىق 6 پايىزدىق ۇستەمەمەن لەزدە العانىندا ابدىراپ قالعانى دا اقيقات. سەبەبى, جىلدار بويى اۋىلدا جۇمىسسىز جۇرگەن جاننىڭ وتباسىن اسىراۋ, ءوسىپ كەلە جاتقان بالالاردى وقىتۋ, كيىندىرۋ سەكىلدى سان الۋان ماسەلەلەرى جەتىپ ارتىلاتىن. سودان نار تاۋەكەلگە سالىپ, بىردەن 10 باس ءىرى قارا ساتىپ الدى. توننالاپ مال ازىعىن دا دايىنداپ ۇلگەردى. ساباقتى ينە ساتىمەن دەگەندەي, ءىسى العا باسىپ بەردى. مال باسىن ساقتاپ, وسىمىنەن تۇسكەن پايدانى شىپ-شىرعاسىن شىعارماي كەلىسىمشارتتا كورسەتىلگەن كەستەگە سايكەس, توقسان سايىن 114 مىڭ تەڭگەدەن قورعا قۇيىپ وتىر. شىنى كەرەك, «بال ۇستاعان بارماعىن جالايدى» دەگەندەي, جەمشوپ ساتىپ الۋ, ۋاقتىلى مالدارىگەرلىك قىزمەت كورسەتۋ سەكىلدى قاجەتتىلىكتەردەن اسقان قاراجات وتباسى كەرەگىن تولىق وتەپ وتىر. ەڭ باستىسى – «بەرەكە» باعدارلاماسى ءۇيدىڭ بەرەكەسىن كىرگىزدى. ۇشتوبەلىك قايرات باەكەنوۆتىڭ وسىناۋ ىلكىمدى ءىسى اۋىلداستارىنا عانا ەمەس ءوڭىر حالقىنا ۇلگى بولۋدا. اۋىلداستارى ۇلگى تۇتىپ قانا قويماي, «ادامنىڭ ىستەگەنىن ادام ىستەيدى ءبىز نەگە العا ۇمتىلىپ «بەرەكە» باعدارلاماسىمەن بەرەكەمىزدى كىرگىزبەيمىز؟» دەپ وتىرعانىن جاسىرىپ قايتەمىز. – باستى ماقساتىمىز – اۋىلدى جەردەگى كاسىپكەرلىكتى دامىتۋ, – دەيدى «اۋىل شارۋاشىلىعىن قارجىلاي قولداۋ قورى» اق الماتى وبلىستىق فيليالىنىڭ ديرەكتورى ءمادي يبادۋللاەۆ. – مەملەكەتتىك ساياساتقا ساي ەڭبەك ەتەمىن دەپ ۇمتىلعان جانعا ءبىرىنشى قاجەتتىلىگى بولىپ تابىلا­تىن قاراجات ماسەلەسىن شەشۋگە كومەكتەسەمىز. ءسويتىپ, قولجەتىم­دى ءارى تومەنگى پايىزبەن اۋىل شارۋاشىلىعى سالاسىنا شاعىن نەسيە بەرەمىز. 2016 جىلى «بەرەكە» باعدارلاماسىنىڭ ۇستانىمى ناقتىلانىپ, الماتى وبلىسىنا «جۇمىسپەن قامتۋدىڭ جول كارتاسى-2020»-نىڭ ەكىنشى باعىتى بويىن­شا قاراستىرىلعان 2,9 ملرد تەڭگەنىڭ 80 پايىزىنان استامى مال بورداقىلاۋ سالاسىنا ءبولىندى. فيليال 150 الاڭ­دى قارجىلاندىرۋدى جوسپارلاپ, بيىل 857 وتباسىلىق مال بورداقىلاۋ الاڭىن اشۋعا 2,8 ملرد تەڭگە ءبولدى. اگرارلى وبلىس تۇرعىندارىنىڭ نەگىزگى كۇنكورىس كوزى مال باعىپ, جەر ونىمدەرىن ءوسىرۋ بولىپ سانالادى. تەك ۇقساتا بىلگەن دۇرىس. بۇل رەتتە قوڭى تايعان مالدى ارزان باعاعا ساتىپ الىپ, بورداقىلاپ ساتۋدىڭ پايداسى مول. سارالاي بىلگەن ادام تازا ەڭبەكتىڭ وتەۋىن كورەدى. «بەرەكە» باعدارلاماسى اياسىندا قولجەتىمدى ءارى تومەنگى پايىزبەن نەسيە العان ازاماتتار, وتباسىلارىن اسىراپ, اۋىلداستارىنا جۇمىس ورنىن اشادى, ساۋدا نۇكتەلەرىنە ەت تاپسىرادى. مەملەكەتكە ءتيىستى سالىق تولەنەتىنى ءوز الدىنا. وتباسىلىق شاعىن عانا مال بورداقىلاۋ الاڭى بىرتىندەپ ۇلعايادى. اۋقىمى ۇلكەيگەن سايىن جاۋاپكەرشىلىگى دە ارتادى. مەملەكەت تاراپىنان مۇنداي شارۋاشىلىقتاردى كوو­پەراتيۆتەرگە بىرىكتىرۋ جۇمىستارى دا قولعا الىندى, ال كوو­پەراتيۆتىڭ ءمۇم­كىندىكتەرى بۇدان دا كوپ. شاعىن بور­دا­قىلاۋ الاڭ­دارىنىڭ كوبەيۋى ناتيجەسىندە ەكولوگيا­لىق تازا ءونىمدى جەرگىلىكتى ساۋدا ورىندارىنا جەتكىزەتىن كاسىپ­كەر­لەرمەن قاتار, ەكسپورتقا شىعارۋعا وزىندىك ۇلەس قوسۋشىلار انىق­تالىپ, ىرىكتەلەتىنى تاعى بار.  ءاليا ەڭسەباەۆا الماتى وبلىسى