جىلىنىپ الىڭىز, جولاۋشى

بيىل وڭىرگە قار جىلداعىدان ەرتەرەك ءتۇستى. ارا-تۇرا اياز قاتايىپ, «كارى قۇداڭ» قاھارلى قىس مىنەز تانىتىپ تا قويادى. قالاي بولعاندا دا, قىسقى اۋا رايىنىڭ وزىندىك ناعىز توسىن مىنەز تانىتاتىن كەزى الدا ەكەنىن ەسكەرسەك, جولاۋشىلار ءۇشىن دە, جول قىزمەتكەرلەرى ءۇشىن دە جەڭىل بولمايتىنى اڭعارىلادى. ءبىر سوزبەن ايتقاندا, قىسقى جولدىڭ قاۋپى كوپ. ونى وتكەن جىلعى قىستاعى قيىندىقتار دا ۇمىتتىرا قويعان جوق. وبلىستىق اكىمدىكتە وتكەن كەڭەستە مەملەكەتتىك ورگانداردىڭ اتقارۋشىلىق ءتارتىبى, جەرگىلىكتى جانە رەسپۋبليكالىق ماڭىزى بار اۆتوموبيل جولدارىن قىسقى كەزەڭدە جاراقتى ەتىپ ۇستاۋ ماسەلەلەرى, سونداي-اق, مەملەكەتتىك جانە ۇكىمەتتىك باعدارلامالاردى جۇزەگە اسىرۋعا قاتىستى اعىمداعى احۋال جايىنىڭ تالقىلانۋى دا سوندىقتان. ايماقتاعى اۆتوجولداردىڭ جالپى ۇزىندىعى 6983,9 شاقىرىمنان استام بولادى. وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ايازباي وسمانعاليەۆتىڭ ايتۋىنشا, جەرگىلىكتى ماڭىزى بار 5090,1 شاقىرىم جولدى ۇستاۋعا 305,7 ميلليون تەڭگە بولىنگەن. بۇل جۇمىستارمەن 31 كاسىپورىن شۇعىلدانادى, ولاردىڭ قاراماعىندا 201 تەحنيكا بىرلىگى جۇمىس ىستەيدى. بۇگىنگى كۇنى 2424,5 توننا تايعاققا قارسى جانە ينەرتتى ماتەريالدار, 322,3 توننا مولشەرىندە ديزەل وتىنىنىڭ قورى جاسالدى. بۇدان باسقا, مەردىگەرلىك ۇيىمدار قار جالدارىن تۇرعىزۋ ارقىلى جول بويىندا قار ۇستاۋ جۇمىستارىن جۇرگىزۋدە. قولايسىز اۋا رايى جاعدايىندا جۇرگىزۋشىلەر مەن جولاۋشىلاردىڭ قاۋىپسىزدىگىن قامتاماسىز ەتۋ ءۇشىن 49 جىلىنۋ پۋنكتتەرى دايىندالدى. «قازاقاۆتوجول» رمك وبلىستىق فيليالى اقتوبە وبلىسىنداعى رەسپۋبليكالىق ماڭىزى بار 1893,8 شاقىرىم جولدىڭ جاراقتىلىعى ءۇشىن جاۋاپ بەرەدى. وسى اۋقىمداعى جۇمىستارعا بيىلعى قىسقا 457,6 ميلليون تەڭگە بولىنگەن. جىلدىڭ سوڭىنا دەيىن بۇل مەكەمە 13 قار تازالاعىش تەحنيكامەن تولىقتىرىلادى. كىدىرىستەرگە جول بەرمەۋ جانە ءجۇرىس جولدارىن دەر كەزىندە تازالاۋ ءۇشىن جالپى ۇزىندىعى 4,7 شاقىرىم قار ۇستايتىن قالقاندار تۇرعىزىلدى, جەرگىلىكتى اتقارۋشى ورگانداردىڭ كومەگىمەن «رف شەكاراسى (سامارا) – شىمكەنت» اۆتوجولى بويىنان جۇرگىزۋشىلەردىڭ اۋا رايى بۇزىلعان جاعدايدا كولىكتەرىن يەسىز قالدىرماي, سول جەردە بولۋى ءۇشىن اۆتوكولىك قۇرالدارى تۇراتىن 3 ايالداۋ الاڭدارى ازىرلەندى. كەڭەس قورىتىندىسىندا وبلىس اكىمى بەردىبەك ساپارباەۆ جاۋاپتى مەملەكەتتىك ورگاندار مەن مەردىگەرلىك ۇيىمدار باسشىلارىنا جولدى جاراقتى ۇستاۋ ءۇشىن مىندەتتەمەلەرىنىڭ ءتيىستى دەڭگەيدە ورىندالۋىن قامتاماسىز ەتۋدى تاپسىردى. ساتىبالدى ءساۋىرباي, «ەگەمەن قازاقستان» اقتوبە