ۋنيۆەرسيادا-2017 ەرىكتىلەرى ىرىكتەلدى

بۇگىن 2017 جىلعى 28-ءشى دۇنيەجۇزىلىك قىسقى ۋنيۆەرسياداعا دايىندالۋ جانە وتكىزۋگە اتسالىساتىن ەرىكتىلەردى ىرىكتەۋ بايقاۋى اياقتالدى, دەپ حابارلايدى قازاقپارات. ءبىرىنشى كەزەڭى الماتىدا 27 قىركۇيەكتە باستالدى. وتىنىمدەر جازباشا ساۋالناما تۇرىندە, سونداي-اق, ۋنيۆەرسيادا سايتىندا ونلاين ارقىلى قابىلداندى. بارلىعى 14 165 ءوتىنىم جىبەرىلىپ, كوبىسى الماتىلىقتاردان (الماتى قالاسىنداعى وقىپ جۇرگەن ستۋدەنتتەر - 9 303) كەلىپ ءتۇستى. سونداي-اق, ۋنيۆەرسيادا-2017 ەرىكتىسى اتانعىسى كەلەتىن شەتەلدىكتەردىڭ ىشىندە رەسەيلىكتەر باسىم بولدى. ولاردان بارلىعى 3594 ءوتىنىم كەلدى. وتىنىمدەر قازاقستان وڭىرلەرىنەن, سونىمەن بىرگە, يتاليا, كانادا, اقش, قىتاي, ليۆان, ۇلىبريتانيا, گونكونگ, ۋكراينا, مولداۆيا, وزبەكستان سەكىلدى الىس جانە تاياۋ شەتەلدەن دە كەلىپ تۇسكەن وتىنىشتەر بار. ۋنيۆەرسيادا-2017 ەرىكتىلەرىنىڭ نەگىزگى قۇرامى اعىلشىن ءتىلىن جاقسى مەڭگەرگەن, كوشباسشىلىق جانە ۇيىمداستىرۋ قابىلەتتەرى جوعارى جاسى 18-گە دەيىنگى جانە 80 جاستان اسپاعان تۇلعالار بولۋى ءتيىس. ۋنيۆەرسيادا كەزىندە جۇمىس جاساۋ ءۇشىن بارلىعى 3000 ەرىكتى تاڭداپ الىندى. نيەت بىلدىرگەن تۇلعالارمەن بەتپە-بەت جانە skype ارقىلى سۇحباتتاسۋلار وتكىزىلدى. الىس جانە تاياۋ شەتەلدەن قاتىساتىن ەرىكتىلەر سانى 200-دەن اساتىندىعى بەلگىلى. ەرىكتىلەرمەن جۇمىس جۇرگىزۋدىڭ كەلەسى كەزەڭىندە كەلىسىمدەرگە قول قويىلىپ, ولارعا قاجەتتى كيىم-كەشەك بەرىلەتىن بولادى. جۇمىس كەزىندە ەرىكتىلەر تاماقپەن, تەگىن جولاقىمەن جانە ۇيالى بايلانىسپەن قامتاماسىز ەتىلەدى. ۋنيۆەرسيادا كەزىندە ەرىكتىلەر 30-دان اسا قىزمەت باعىتىندا جۇمىس جاسايتىن بولادى.