ۇستەل تەننيسىنەن «سامۇرىق» اشىق بىرىڭعاي ليگاسى وسىمەن ءۇشىنشى جىل قاتارىنان ۇيىمداستىرىلىپ وتىر. ءىس-شارانى «Astana» ۇستەل تەننيس كلۋبى» قوعامدىق بىرلەستىگى وتكىزىپ كەلەدى.
بيىل جارىسقا 16 كوماندا قاتىستى. ولاردىڭ اراسىندا مەملەكەتتىك جانە مەملەكەتتىك ەمەس ۇيىمدار, ۇلتتىق كومپانيالار جانە ولاردىڭ ەنشىلەس ۇيىمدارى, دەنە شىنىقتىرۋ جانە وقۋ ورىندارى قۇرعان كلۋبتار, كوممەرتسيالىق جانە كوممەرتسيالىق ەمەس كاسىپورىندار, سونداي-اق پاۆلودار, قاراعاندى, وسكەمەن, كوكشەتاۋ, پەتروپاۆلدان بىرقاتار سپورتشىلار باق سىنادى.
جوعارىدا ايتىلعان كوماندالاردىڭ قۇرامىندا حارەچكو مارگاريتا, گەراسيمەنكو گەننادي, پاحنو ماكسيم, سادىقوۆ الماز, ىسقاقوۆ اسقات, جۋكوۆا داريا سىندى ۇستەل تەننيسىنىڭ مايتالماندارى قاتىستى.
3 قىركۇيەك پەن 24 جەلتوقسان ارالىعىنداعى تۋرنير «Nazarbayev University» جانە «دينامو» دەنە شىنىقتىرۋ-سپورت قوعامى عيماراتتارىندا ءوتتى.
چەمپيونات تارتىسقا تولى ءوتتى. تەك play off كەزەڭىندە عانا جەڭىمپازدار انىقتالدى.
فينالدىق كەزەڭدە التىن جۇلدەنى «بايتەرەك» كومانداسى جەڭىپ السا, تۋرنيرلىك كەستەدە ەكىنشى ورىنعا «ەرسۇل جانە ك» جشس ۇجىمى جايعاستى. ال قولا جۇلدەگە «قازاقستان» رترك» اق قول جەتكىزدى. سونىمەن قاتار, ۇزدىك ويىنشى اتاعىنا «قازمۇنايگاز» اق اتىنان قاتىسقان پاحنو ماكسيم يە بولدى.
تۋرنير كەلەسى جىلدىڭ مامىر ايىندا جالعاسىن تابادى. وعان بىرقاتار وزگەرىستەر ەنگىزىلۋ جوسپارلانىپ وتىر.
